Rayon təhsil sistemi rəsmən korrupsiya yuvasına dönüb

Peşə liseyləri ölkənin təhsil sisteminin ayrılmaz və çox önəmli bir hissəsi olmaqla yanaşı, bu sahədə əldə olunan uğur və nailiyyətlər ümumilikdə iqtisadiyyatlmlzln inkişafına böyük təkan verir. Peşə liseyləri sistemində həyata keçirilən hər hansı dəyişikliklər ən qısa zamanda ictimai həyatımızın bir çox sahələrində öz təzahürünü tapır. Lakin son vaxtlar respublikanın prşə təhsili sistemində yer almış qüsur və nöqsanlar bu müəssisələrdə mövcud tələbata uyğun tədris keçilməsinə imkan vermir. Bütün sahələrdə olduğu kimi təhsil sistemində də həyata keçirilən islahatların son nəticələri konkret müəssisəyə rəhbərlik edən kadrların həm şəxsi, həm də professional keyfiyyətləri ilə müəyyənləşir. Təhsil Nazirliyi tərəfindən kadr məsələlərində indiyədək yol verilmiş ciddi nöqsanlar isə bu sahədə həyata keçirilən əsaslı dövlət islahatlarının reallaşmasını əngəlləyir.
Redaksiyamıza daxil olan məlumatlarda Bərdə rayonunda fəaliyyət göstərən Peşə Liseyində yer almış çoxsaylı qanun pozuntularından bəhs olunur. İlk növbədə mənbələr liseyin direktoru Şəmil Şükürovun müavinlərini və tabeçiliyində çalışan digər şəxsləri işə götürərkən onlardan müəyyən məbləğlərdə rüşvət tələb etdiyini iddia edirlər. Bu barədə məlumat verən mənbənin sözlərinə görə, Bərdə Peşə Liseyinin direktoru əldə olunan məbləğin Təhsil Nazirliyindəki rəhbər şəxslərdən birinə çatdığını desə də, əslində, bu barədə deyilənlər həqiqəti əks etdirmir. Bu xüsusda əldə etdiyimiz məlumatda bildirilir: “Şəmil Şükürov iddia edir ki, işə qəbul olunan şəxslərdən aldığı pul ona guya ki, Təhsil Nazirliyinin razılığını almaq üçün lazımdır. Lakin bir müddət sonra məlum olub ki, deyilənlər tamamilə yanlışdır. Belə ki, həmin pul Təhsil Nazirliyinə yox, məhz Şəmil Şükürovun özünə çatır. Buradan aydın şəkildə görünür ki, Bərdə Peşə Liseyinin direktoru heç kimə təmənnasız iş görmür.” Digər tərəfdən isə Bərdə Peşə Liseyində tədrisin durumu da hazırda olduqca bərbad durumdadır. Artıq qışın ən soyuq aylarının olmasına baxmayaraq, liseyin qızdırılmasında böyük problemlər var. Şagirdlər bildirirlər ki, sinif otaqlarında nəinki dərs keçmək, hətta burada bir neçə dəqiqə oturmaq belə qeyri-mümkündür. Bu səbəbdən də əksər valideynlər övladlarını dərsə getməyə qoymurlar. Buna görə də liseydə onsuz da aşağı olan davamiyyət demək olar ki, sıfır səviyyəsinə düşür. Liseydə davamiyyətin aşağı səviyyəsi isə Şəmil Şükürova şagirdlərin təqaüd kartları vasitəsilə də maliyyə mənimsəmələri həyata keçirməyə geniş imkanlar yaradır. Məlumatı təqdim edən mənbə bildirir ki, bu kartları uzun müddət özündə saxlayan məktəb direktoru il ərzində şagirdlərə ayrılan təqaüd pullarının 60%-indən artıq hissəsini gözlərini belə qırpmadan mənimsəyir. Həmçinin məlumatlarda qeyd olunur ki, Bərdə Peşə Liseyin bu gün törədilən maxinasiyalar sırasında qeyri-qanuni şagird qəbulu, köhnə tarixlə arayış və sənədlərin verilməsi, saxta diplom təqdimatı və digər bu kimi korrupsiya əməlləri də öz yerlərini almışlar.Mənbənin verdiyi məlumatlarda belə bir maraqlı fakt da qeyd olunur ki, bütün nöqsanlara baxmayaraq növbəti tədris ilindən etibarən Bərdə Peşə Liseyində hər şagirdin qəbulu üçün valideynlərdən artıq 500 manat civarında pul alınması “planlaşdırılıb”. Bu planın müəllifi isə təbii ki, yenə də direktor Şəmil Şükürovun özüdür.

Sahib