Eldar Namazov dünyasını vaxtsız dəyişən şahmatçı ilə bağlı xatirələrini bölüşdü
İstedadlı Azərbaycan şahmatçısı, qrossmeyster, şahmat üzrə üçqat Azərbaycan çempionu, Avropa çempionu Vüqar Həşimovun yanvarın 16-da üç mərasimi keçirilib. 28 yaşında dünyasını dəyişən istedadlı şahmatçımızın dəfnində və hüzr mərasimində Azərbaycan siyasi kəsiminin tanınmış simalarından olan EL Hərəkatının sədri Eldar Namazov da iştirak edib. Sosial şəbəkədə Eldar Namazovun paylaşdığı bir şəkil isə onun Vüqar Həşimovla bağlı xatirələrinin olduğuna əminlik yaratdı. Ona görə də Eldar Namazovla əlaqə saxlayıb mərhum şahmatçı ilə bağlı xatirələrini bölüşməsini istədik.
Müsahibimiz öncə gördüyünüz bu şəkilin tarixçəsindən danışdı: “Bu şəkil 1995-ci ildə çəkilib. Şəkildəki yeniyetmələr bu gün Azərbaycanın adını dünyada ucaldan şahmatçılardır. Sağdan birinci Teymur Rəcəbov, Vüqar Həşimov, Nicat Məmmədov və Rauf Məmmədovdur. Mən Azərbaycan Şahmat Federasiyasının prezidenti olaraq o dövrdə bu uşaqların dünya səviyyəli şahmatçı olacağını və ölkəmizi adını ucaldacağını görürdüm və deyirdim. Bu şəkil çəkilən zaman onların 11-12 yaşı var idi. Onlar Avropa və dünya çempionatlarında uğur qazanıb Bakıya qayıdandan sonra biz həmişə görüşürdük. Görüşlərdən birində çəkilmiş şəkildir. Mən Vüqardan nə isə soruşmuşdum və hamı onun cavabını gözləyirdi, şəkil də həmin məqamda çəkiblər”.
E.Namazov Azərbaycan Şahmat Federasiyasının prezidenti olduğu dövrdə Vüqar Həşimov da daxil gənc şahmatçıların uğurlarından söz açdı: “1995-ci ildə mənə Azərbaycan Şahmat Federasiyasından müraciət olundu. Mən o dövrdə Azərbaycan prezidentinin köməkçisi vəzifəsində işləyirdim. Mənə müraciətdə Şahmat Federasiyasının prezidenti vəzifəsinə gəlməyim təklif olundu. Bu müraciət təsadüfi deyildi, mən vaxtilə şahmatla çox ciddi məşğul idim. Hətta 1971-ci ildə yeniyetmələr arasında mənim iştirak etdiyim komanda birinci yerə çıxıb Azərbaycan çempionu olmuşdu. O vaxtdan bəri professional şahmatla məşğul olmurdum, tarix elmini özüm üçün peşə seçmişdim. Amma o vaxtdan bəri məni həm şahmatçılar, həm də məşqçilər tanıyırdılar. Ona görə də 1995-ci ildə Şahmat Federasiyasından mənə müraciət olunmuşdu. Açığı, mən birinci dəfə razılıq vermədim və mövqeyimi onunla əsaslandırdım ki, işim həddən artıq çoxdur, demək olar istirahət günüm yoxdur. Ona görə də dedim ki, federasiyada formal rəhbər olmağı məqbul saymıram. Bir müddətdən sonra “Ayna” qəzetində Azərbaycanın nüfuzlu şahmatçısı Firuzə Vəlixanlının müsahibəsi dərc olundu. Müsahibədə Firuzə xanım Azərbaycanda şahmata diqqət olmadığından, şahmatçıların ciddi əziyyət çəkdiklərindən danışırdı. Mən o müsahibəni oxuyandan sonra narahat oldum və qərar gəldim ki, Şahmat Federasiyasına rəhbərliyi qəbul edib mümkün dəstəyimi verim. 1995-ci ildən başlayaraq 6 il Şahmat Federasiyasının prezidenti oldum. Bəri başdan deyim ki, şahmatın Azərbaycanda son dövrlərdə böyük inkişafına səbəb ilk növbədə federasiyada çalışanlardır. Yəni prezidentlər dəyişir, biri gedir, o biri gəlir, ancaq Şahmat Federasiyasında hörmətli Faiq Həsənov başda olmaqla, Fikrət müəllim, Namiq müəllim və digərləri şahmata o qədər fanatik dərəcədə vurğundurlar və gecə-gündüz əmək sərf edirlər. Məhz bu insanların əməyi nəticəsində Azərbaycanda çox güclü şahmat məktəbi yarandı. Federasiyaya rəhbər gələndə bu insanların fədakarlığını görəndə artıq əmin oldum ki, yaxşı işlər görə biləcəyik.
Şahmatın inkişafı ilə bağlı müəyyən proqramlar tutuldu, Neft Şirkətinin dəstəyi təmin olundu, Gənclər və İdman, Təhsil nazirliklərinin dəstəyini təmin etdik. İlk növbədə bizim işimizin prioritet istiqaməti gənc və yeniyetmə şahmatçılar oldu. Biz onlarla işləməyə üstünlük verirdik. İndi Azərbaycanın yığma komandasını təşkil edən uşaqlar o dövrdə parlamağa başladılar, Avropa birinciliklərinə, dünya birinciliyinə çıxdılar. Onların içərisində o zaman ən məşhuru Teymur Rəcəbov idi. Onunla yanaşı yeni gənc dalğa gəlirdi ki, onların sırasında Vüqar Həşimov, Sərxan Həşimov, Şəhriyar Məmmədyarov, Nicat Məmmədov, Rauf Məmmədov və digərləri var idi. Onların hamısı istedadlı idi, ancaq Vüqar Həşimov xüsusilə istedadı ilə fərqlənirdi. Hələ o dövrdə biz bilirdik ki, Vüqar müəyyən xəstəlikdən əziyyət çəkir. Buna baxmayaraq, Vüqar şahmatdan bir an belə ayrılmırdı, həkimlərin bütün qadağalarına baxmayaraq bütün vaxtını şahmatla keçirirdi. Onun atası Qasım müəllim də şahmatla çox maraqlanırdı. Qardaşı Sərxan da istedadlı şahmatçı idi”.
E.Namazov qeyd etdi ki, Şahmat Federasiyasının prezidenti vəzifəsindən gedəndən sonra da həmin gənclərin, o cümlədən Vüqar Həşimovun fəaliyyətini ardıcıl izləyib, qələbələrindən qürur duyub: “Bu günün özündə də dünya və Avropa çempionatları olanda mənim üçün çox maraqlıdır ki, bu uşaqlar necə oynayırlar. Dünyada qəbul olunmuş Azərbaycanda bir lider üçlük var idi-Teymur Rəcəbov, Şəhriyar Məmmədyarov və Vüqar Həşimov. İndi bunların ardınca yeni bir dalğa gəlir-Rauf Məmmədov, Nicat Məmmədov, Eltac Səfərli, Vasif Turaybəyli və digərləri. Mən bir neçə ay əvvəl Rauf Məmmədovun reytinq üzrə ikinci olan erməni şahmatçı Levon Aranyanı necə pis duruma saldığını gördüm. Yəni Azərbaycanda çox güclü bir şahmat məktəbi formalaşıb və Vüqar Həşimovun ruhu rahat ola bilər ki, qələbələr davam edəcək. Əminəm ki, gec-tez biz şahmat tacını Bakıya qaytaracağıq. Çox yaxşı olardı ki, tacı məhz Vüqar Həşimov qaytaraydı. Təəssüf ki, ömür vəfa etmədi. Vüqar Həşimovun dünyasını dəyişməsi təkcə Azərbaycan şahmatına yox, dünya şahmatına böyük zərbə oldu. Allah Vüqara rəhmət eləsin”.