Ölkədə böyük fırıldaq şəbəkəsi ifşa olundu

Və ya öz ölkəsində burun-boğaz həkimi olan əcnəbilər azərbaycanlı ailələrə necə övlad “bəxş edir”...

-Dedilər ki, sənə yalnız türkiyəli həkim Öndər Tulumbaci kömək edə biləcək. Bu, mənim son şansımdır. Həyat yoldaşım altı ay vaxt verib. Budəfəki müalicənin də nəticəsi olmasa, məndən ayrılacaq.
-Neçə ildir müalicə alırsınız ki?
-9 ildir müalicə alıram. Biri deyir övladının olmaması genetik faktorla bağlıdır. O biri deyir səndə kişi hormonları qadın hormonlarından çoxdur. Başqası da infeksiya nəticəsində uşağımızın olmadığını bildirir...
Bu sözləri virtualaz.org saytının müxbiri ilə söhbətində “HB Güven” klinikasının qarşısında səbirsizliklə növbə gözləyən 27 yaşlı Bakı sakini Gülnarə Məmmədova deyib.
Sonsuzluq problemi ilə üzləşən gənc qadın söyləyir ki, reklamlara aldanaraq müxtəlif özəl klinikalara müraciət edib. Buna görə də indi nə reklamlara, nə də tərifi dillər əzbəri olan mütəxəssislərə inanmır. Gülnarə Məmmədova bizim “bəs Öndər Tulumbacı, onu haradan tanıyırsınız” sualımıza “televiziyada görmüşük” deyə cavab verir.

...Və 9 ildir övlad həsrəti çəkən cütlük az sonra bu həkimin qəbulundan da gözüyaşlı çıxır.
Sonsuz ailələr statistikada Azərbaycanda sonsuz ailələrin dəqiq statistikası aparılmır. Dövlət Statistika Komitəsinin məlumatına görə, 2009-cu ildə 7784 ailə boşanıb ki, onlardan 4634-nün uşağı olmayıb.
2010-cu ildə boşanan 9061 cütlüyün 5527-si övlad sahibi ola bilməyib. 2011-ci ildə 7368 ailə övlad həsrətindən yollarını ayırıb. Son iki ildə isə pozulan nikahların təxminən 15 mini sonsuz ailələrin payına düşür. Qəribədir ki, ölkəmizdə övlad həsrəti çəkən ailələrin sayının artımı ilə sonsuzluğu müalicə edən klinika və “mütəxəssislərin” artımı düz mütənasibdir. Hər iki proses eyni sürətlə gedir. Bu isə onu göstərir ki, ailələrin övlad istəyi bəzi klinikaların əsas qazanc mənbəyinə çevrilib. Mexanizm də çox sadədir: “xaricdən gələn filan məşhur həkim filan klinikada” məzmunlu yalançı reklamlarla müştəri yığırsan, adi fırıldaqçılıqla pul qazanırsan...
Virtualaz.org saytının əməkdaşları mətbuatda, xüsusən də TV-lərdə gen-bol reklam edilən özəl klinikalarda sonsuzluğun müalicəsi adı altında baş verənləri araşdırıb. Məlum olub ki, azərbaycanlı xəstələrə “yüksək səviyyəli xarici mütəxəssis” kimi sırınan əcnəbi həkimləri öz ölkələrində heç tanıyan yoxdur. Öz ölkələrində burun-boğaz, uşaq həkimi işləyənlər Azərbaycana gələndən sonar isə mama-ginekoloq kimi sonsuz qadınlara övlad bəxş etmək “istedadına” yiyələniblər.

“HB Güven” klinikasında qiymətlər

Başlayaq “HB Güven” klinikasından. Bu klinika daha çox türkiyəli həkim Öndər Tulumbaci ilə reklam olunur. Reklamlarda deyilənlərə inansaq, Ö.Tulumbaci Türkiyədə tanınmış ginekoloq, hətta sonsuzluqla bağlı elmi araşdırmaların müəllifidir. Bu həkimin qəbuluna düşməyin qiyməti 40 manatdır. Özü də Ö.Tulumbacinin qəbuluna yazılmaq istəyən xəstələr bir-iki həftə əvvəldən müraciət etməlidilər.
Klinikada növbə gözləyən Bakı şəhər sakini Elnarə Quliyevanın sözlərinə görə, Ö.Tulumbaci həm də süni mayalanma üzrə mütəxəssisdir: “Əgər özü xəstəyə kömək edə bilmirsə, ya Türkiyəyə, ya da Kiprə göndərir”.
Ö.Tulumbacinin müayinə etdiyi xəstələrlə söhbətimizdən məlum oldu ki, həkimin qəbulu da daxil olmaqla analiz və digər müayinələrə 120-200 manat xərcləyiblər.

Sonsuz ailələrin daha çox müraciət etdiyi əcnəbi mütəxəssislərin çalışdığı klinikalardan biri də “FİN-Azərbaycan” klinikasıdır. Reklamlarda deyildiyi kimi, sonsuz ailələr bu klinikaya müraciət edərək talelərini Finlandiyadan gələn həkimlərə etibar edirlər.

Daha bir klinika - “Ava Skandinaviya” özəl tibb müəssisəsinin də sonsuzluğu müalicə etdiyi deyilir. Klinika daha çox internetdə reklam edilir. Yazılanlara inansaq, klinikanın baş həkimi Heli Efendi Avropada (Finlandiyada) lisenziya alıb, pediatriya və anesteziologiya sahələri üzrə ixtisaslaşıb. Amma həkimin fəaliyyət sahəsi çoxşaxəlidir. O, həm də mama- ginekoloqdur. Reklam mətnlərində deyilir ki, “analoqu olmayan istedad sahibi olan bu həkim uşaq həkimi və mama-ginekoloq kimi ağır ginekoloji xəstəliklərin kompleks müalicəsi ilə məşğul olmaqla yanaşı yüksək səviyyədə hamiləliyin planlı nəzarətini aparır, dölün morfoloji quruluşunu qiymətləndirir”.

“Sonsuzlara laçın kimi uşaq verən “Laçın””...

“...Biz bu uşağı “Laçın” klinikasının zəhməti hesabına əldə etdik. Sağ olsun “Laçın” klinikasının həkimlərini...”Əksər telefiziya verilişlərinə, maraqlıdır ki, özü də şou proqramlarına sponsorluq edən “Laçın” klinikasının reklam roliklərində qucağında körpə olan qadınları tez-tez görmək olar. Onlar uşağın dünyaya gəlməsində “Laçın” klinikasının böyük zəhmət çəkdiyini söyləyirlər.
“...7 ildir ki, ailə qurmuşam, övladım olmurdu. Televiziyada verilişə baxdıqdan sonra Bakıya gəlməyi qərara aldım. Burada 10 günlük müalicə kursu keçdikdən 2 ay sonra hamilə olduğumu biləndə çox sevindim...” Bu reklamdan belə bəlli olur ki, “Laçın” klinikası möcüzələrə qadirdir. Hərçənd ki, “Laçın”da bu möcüzələri yaradan həkim-mütəxəssis öz ölkəsində burun-boğaz-qulaq xəstəliklərinin müalicəsi ilə məşğul olub. Bu barədə bir qədər sonra...
Hələlik isə oxucularımızı “Laçın” klinikasına xəstə kimi etdiyimiz müraciətin nəticələri və ondan alınan təəssüratlarla tanış edək.
Əməkdaşlarımızdan biri klinikada sonsuz adı ilə ginekoloji müayinədən keçib. Digər əməkdaşımızın isə həyat yoldaşına aspermiya diaqnozu qoyulub. Həkim-mütəxəssislər bilirlər ki, aspermiya diaqnozu qoyulan kişilərdə uşağın olması əsla mümkün deyil.
“Laçın” klinikasının qeydiyyat otağından bizi İrandan gələn doktor Behnam Kazıminin köməkçilərinin yanına göndərirlər. Şikayətimiz dinləniləndən sonra bu sətirlərin müəllifini ginekoloqun müayinəsinə göndərirlər. Ginekoloq isə şikayətimizi dinləyəndən sonra ultrasəs müayinəsini, qanın analizlərini, o cümlədən estradiol, testesteron, prolaktin, FSN, Ln və daha bir sürü analizlərin verilməsini məsləhət görür. Üstəlik klinikada olan aparatların möcüzələr yaratdığını, sonsuzlara övlad bəxş edildiyini uzun-uzun anladır.
Bəlli olur ki, həkimin təyin etdiyi analizlərə nə az, nə çox - 150 manata yaxın pul tələb olunur.
Möcüzələr yaradan aparatlar haqqında məlumat öyrənmək istəyirik. Müayinəyə gələn qadınların əksəriyyəti müalicənin aparatlarla təyin edildiyini bildirir. Amma nə həkimdən, nə də bu aparatdan istifadə edən qadınlardan avadanlıqların nəyi müalicə etdiyinə dair dolğun məlumat əldə edə bilmirik.
Qəribədir ki, hər kəsin “aparat” dediyi avadanlıq haqqında telefonda da əlavə məlumat verilmir. Yəni özün istifadə etməyənəcən “aparat” deyilən möcüzənin nəyə yaradığından xəbərsiz olursan.
Keçək həyat yoldaşı “xəstə” olan digər əməkdaşımızın aldığı cavaba. Həkim qadını kişinin hərtərəfli müayinəsindən sonra ata olmaq şansının olmasına inandırır: “Bizim klinikaya gələrək təkrar müayinələrdən keçsin. Ola bilər ki, zəifliyi yaradan səbəbləri aydınlaşdırandan sonra müalicənin köməyi olsun. Tam sonsuz kişilərin müalicəsi də bəzən effekt verir”.
Təkrar müayinələr demişkən, bu müayinələr 200-250 manata başa gəlir. Əgər müalicə kursuna başlanılsa, bunun üçün dərmanların qiyməti də daxil olmaqla 200-500 manat verilməlidir. “Tutsa qatıq, tutmasa ayran” prinsipi ilə müalicədən sonra ailənin pulu ilə birgə ümidi də məhv olur...

Nəzərə çatdıraq ki, sonsuzluğun yeganə əlacı kimi reklam edilən “Laçın” klinikasında hələlik süni mayalanma həyata keçirilmir. Lakin sonsuzluğun müalicəsi üçün müraciət edənlərə yaxın günlərdə klinikada süni mayalanmanın da aparılacağı bildirilməklə gözləməyi tövsiyə edirlər.
Qeyd edək ki, reklamlardan tanıdığımız doktor Behnam Kazımi daha çox övlad sahibi olmaq istəyən kişiləri müalicə edir. Amma Kazımi öz ölkəsində - İranda burun-boğaz həkimi kimi tanınır. Əməkdaşımız Təbrizdəki “Behrud” klinikasında olarkən həkimlər ona doktor Kazıminin burun-boğaz üzrə mütəxəssis olduğunu deyiblər.
Yəni Azərbaycan yeganə ölkədir ki, burada burun-boğaz xəstəliklərini ginekoloq, ginekoloji xəstəlikləri stamotoloq, diş ağrısını qastroloq, böyrəkləri travmatoloq müayinə-müalicə edir. Başqa sözlə, sükansız maşının sərnişinləriyik...

Məşhur Canpolad həkim kimdir?

Sonsuzluğu və kişi zəifliyini müalicə edən həkimlərdən söz düşmüşkən, reklam “ulduz”larından biri olan Canpolad İmanovu unutmaq olmaz. Baxmayaraq ki, bu həkim mətbuatın tez-tez tənqid hədəfində olur.
Reklamda deyilənlərə inasaq, C.İmanovun rəhbərlik etdiyi 1-2 kabinetdən ibarət klinikada 12 androloji aparat var və bu aparatlar düzgün diaqnoz qoyub müalicə aparmağa xidmət edir. Xaricdən gətirilmiş və əcnəbi mütəxəssislər tərəfindən quraşdırılmış bu aparatları işlədənlər isə yerli həkimlərdir. Məhz həmin aparatların köməyi ilə hüceyrə səviyyəsində diaqnostika aparılır, infeksiyaların mənbəyinə nüfuz edilir. Diaqnoz qoyulduqdan sonra aparatların köməyi ilə 20-21 seans ərzində müalicə aparılır.
Canpolad İmanovun aparatları o qədər “möcüzəvidir” ki, müalicə seansı xəstəyə bəzən 500-1000 manata başa gəlir.Bu arada Azərbaycan kişisinin zəifliyi, qadınların ginekologi problemləri ilə məşğul olan mütəxəssislər arasında “Hind” klinikası da var. Klinikanın reklamında Azərbaycan dilində güclə danışan hindli kişi ilə qadın sanki əzbərlədiyi şüarı səsləndirirmiş kimi “Artıq Azərbaycanda cinsi zəifliyə son” deyirlər. Belə görüntü yaranır ki, Azərbaycanda cinsi zəiflik sanki epidemiya halını alıb və xaricdən mütəxəssislər axışaraq bu epidemiyanın qarşısını almağa çalışırlar. Biabırçılıqdır...
Yeri gəlmişkən, ölkənin baş pediatrı, Elmi-Tədqiqat Pediatriya İnstitutunun rəhbəri, professor Nəsib Quliyev müsahibələrinin birində özəl klinikaları sərt tənqid etmişdi. Baş pediatrın dediyi kimi, xarici ölkələrdə klinikalar yatırdığı sərmayədən 20-25 ildən sonra qazanc götürə bilir. Azərbaycanda isə klinikalar fəaliyyətə başlayan kimi reklamlar çəkdirir, şou verilişlərinin sponsoru olur, müğənnilərə klip çəkilişinə pul ayırır. Bu isə onu göstərir ki, klinikaların əksəriyyəti yalnız pul qazanmağa, bu sahədəki boşluqlardan yararlanmağa çalışır və buna nail olur da. Belə olmasaydı, 500-ə yaxın özəl klinikanın fəaliyyətindən sonra dərdimizə xarici ölkələrdə şəfa axtarmazdıq. Yeri gəlib, bunu da deyək. Azərbaycandakı özəl klinikaların əksəriyyətinin sahibi məmurlar və deputatlardır.
Qeyd edək ki, Səhiyyə Nazirliyinin tabeliyində özəl klinikaların fəaliyyətinə nəzarət edəcək, bir qədər də aydın danışsaq, səhiyyə sistemini ağ xalat altında gizlənmiş qəssab və fırıldaqçılardan təmizləyəcək yeni qurum yaradılıb. Gözləyək görək bu qurum nə edəcək, onun fəaliyyəti “qısır” olmayacaq ki...

N.KƏRİMLİ