2 iyun 2017-ci il tarixdə Daşkəsən Rayon İcra Hakimiyyətinin iclas zalında Yeni Azərbaycan Partiyası (YAP) Daşkəsən rayon təşkilatının IX konfransı keçirildi.Konfransda Milli Məclisin deputatı,YAP siyasi şurasının üzvü Mirkazım Kazımov, Milli Məclisin deputatları Kamran Bayramov,Rövşən Rzayev, Naqif Həmzəyev, YAP Mərkəzi Aparatının məsul işçisi Rafael Gülməmmədov, Qərb bölgəsinin şəhər və rayontəşkilatlarının sədrləri, qonaqlar, rayon hüquq-mühafizə orqanlarının rəhbərləri,270 nəfər konfrans nümayəndəsiiştirak edirdilər.



Konfransı açıq elan edən Daşkəsən Rayon İcra Hakimiyyətinin Başçısı Əhəd Abıyev YAP-ın yaranması və keçdiyi inkişaf tarixindən, o cümlədən də YAP Daşkəsən rayon təşkilatının ötən dövrdən bu günədək gördüyü işlərdən bəhs edən geniş məzmunlu məruzə ilə çıxış etdi. O, məruzəsində dedi:
- Bu gün Yeni Azərbaycan Partiyası Daşkəsən rayon təşkilatının IX konfransına Ulu Öndər Heydər Əliyevin əziz ruhuna böyük hörmət və ehtiram hissi ilə toplaşmışıq. Sizlərin hər birinizi bu əlamətdar gün münasibətlə təbrik edib salamlayıram, qonaqlarımıza bir daha xoş gəlmişsiniz deyirəm.
Bildiyiniz kimi Yeni Azərbaycan Partiyası çətin tarixi dövrdə zərurətdən yaranmışdır. Belə ki, 1991-ci ildə dövlət müstəqilliyini qazandıqdan sonra ölkəmizin sonu görünməyən faciələrlə üzləşməsi, bacarıqsız rəhbərlərin hakimiyyət uğrunda çəkişmələri, ayrı-ayrı siyasi qüvvələrə xidmət göstərən şəxslərin öz maraqlarını dövlət mənafeyindən üstün tutması, torpaqlarımızın təcavüzkar Erməni silahlı birləşmələri tərəfindən işğalı bütün respublikamızın daxili ictimai-siyasi və iqtisadi sabitliyinin pozulmasına gətirib çıxarmışdı. Belə bir vəziyyətdə xalqı ağır durumdan çıxarmağa, onun sabaha olan inamını yenidən özünə qaytarmağa, xalqın bütün təbəqələrinin maraqlarını Azərbaycançılıq ideyası ətrafında birləşdirməyə qadir olan siyasi partiyanın yaradılması məhz xalqın tələbi idi.



1992-ci ilin noyabrın 21-də Azərbaycanın mütərəqqi qüvvələrinin Ulu öndər Heydər Əliyevin ətrafında sıx birləşərək Ümummilli liderimizin sədrliyi altında respublikanın ictimai-siyasi səhnəsində cəmiyyətdəki qüvvələr nisbətini və bundan sonra ölkədə baş verəcək hadisələrin axarını əsaslı surətdə dəyişən Yeni Azərbaycan Partiyasını yaratması Azərbaycanın müasir tarixini çox mühüm hadisəyə çevirdi.



Ümummilli liderimizin nüfuzu, Azərbaycan xalqının ona göstərdiyi yüksək etimad Yeni Azərbaycan Partiyasının qısa müddət ərzində təşkilatlanmasına, ölkənin bütün regionlarında özəklərini yaratmasına və 1993-cü ildə prezident seçilməsinə şərait yaratdı. Yeni Azərbaycan Partiyası yarandığı az müddətdən sonra xalqın yüksək etimad və inamı ilə siyasi hakimiyyətə gəldi. Beləliklə, Ulu Öndər Heydər Əliyevin uzaqgörən siyasəti nəticəsində yaranan və xalqımızın böyük dəstəyini qazanan Yeni Azərbaycan Partiyası Azərbaycanı çox mürəkkəb siyasi vəziyyətdən çıxardaraq ölkəmizi müstəqilliyini itirmək təhlükəsindən xilas etmiş, kütləvi siyasi qüvvəyə çevrilərək ictimai həyatımızın bütün sahələrində tərəqqiyə nail olmaq məqsədilə yüksək fəallıq nümayiş etdirmişdir.



Azərbaycan xalqının Ümummilli lideri Heydər Əliyev bütün həyatını xalqa sədaqətlə xidmətə həsr etmiş, öz fəaliyyətində həmişə xalqa arxalanmış, ən çətin anlarda xalqımıza üz tutmuşdur. Azərbaycan xalqı heç vaxt ondan dəstəyini əsirgəməmişdir. Azərbaycan xalqının Ümummilli lideri, müdrik rəhbər, dahi şəxsiyyət, Yeni Azərbaycan Partiyasını yaradan Heydər Əlirza oğlu Əliyevin əziz xatirəsi Azərbaycan xalqının qəlbində əbədi yaşayacaqdır!



Ulu Öndərin siyasi kursunun ən layiqli davamçısı möhtərəm Prezident cənab İlham Əliyevin 2003-cü ildən başlayaraq Azərbaycanın hərtərəfli inkişafı üçün apardığı mükəmməl islahatlar kursu yüksək sosial standartlara malik cəmiyyətin qurulmasının təminatına doğru mühüm addımların atılmasına zəmin yaradıb. Möhtərəm Prezidentimiz cənab İlham Əliyev Ulu Öndərin ideyalarını rəhbər tutaraq Azərbaycan iqtisadiyyatını dəfələrlə artıra bilmiş, Azərbaycanı dayanıqlı və sabit inkişaf edən, çoxşaxəli iqtisadiyyata malik, vaxtilə xarici investisiyalardan asılı olduğu halda, indi isə xarici ölkələrə investisiya qoymaq imkanı olan etibarlı bir ölkəyə çevirmişdir.



Ölkə Başçısının apardığı uzaqgörən siyasətin nəticəsidir ki, bu gün Azərbaycan beynəlxalq tədbirlərə yüksək səviyyədə uğurla ev sahibliyi edir. Bildiyiniz kimi, ötən ay ölkəmizdə daha bir mötəbər beynəlxalq tədbir keçirildi. Bütün İslam dünyasının müsəlmanlarını bir araya gətirmək, onların arasında sülhü, əmin-amanlığı, həmrəyliyi daha da möhkəmləndirmək məqsədi ilə bu ilin may ayının 12-dən 22-dək Bakı şəhərində IV İslam Həmrəyliyi Oyunları keçirilmişdir. Bu oyunların ölkəmizdə keçirilməsi Azərbaycanı istəməyən qüvvələrə ən tutarlı cavabdır. Oyun iştirakçıları, qonaqlar, turistlər hər kəs respublikamızdakı reallıqları, bütün sahələrdəki inkişafı öz gözləri ilə gördülər. Oyunların Təşkilat Komitəsinə rəhbərlik Azərbaycan Respublikasının Birinci vitse-prezidenti xanım Mehriban Əliyevaya tapşırılmışdı. Keçirilən yarışlarda Azərbaycan qazanılmış medalların sayına görə İslam ölkələri arasında komanda hesabında birinci oldu. Əlbəttə, biz hamımız yaxşı bilirik ki, bu qələbə təsadüfi qələbə deyil.



İdmançılarımız müxtəlif beynəlxalq yarışlarda, dünya, Avropa çempionatlarında, Olimpiya oyunlarında artıq öz güclərini göstərmişlər və Azərbaycan dünya miqyasında güclü idman dövləti kimi tanınır. IV İslam Həmrəyliyi Oyunları müstəqil Azərbaycan tarixinə növbəti parlaq qələbələrdən biri kimi daxil oldu.



Azərbaycanın siyasi tarixinin mühüm əlamətdar hadisəsi olan Yeni Azərbaycan Partiyasının V Qurultayı çərçivəsində qəbul edilən qərarlar və edilən seçimlər partiyanın gücləndirilməsi istiqamətində mühüm əhəmiyyət kəsb edib. Belə ki, partiyanın strukturlarına yeni seçimlərin edilməsi təşkilati nöqteyi-nəzərdən xüsusi önəm daşımaqla yanaşı, partiyanın fəaliyyətinin səmərəlilik səviyyəsinin artırılmasına əhəmiyyətli töhfələr verib. Bu məqamda Azərbaycanın müstəqilliyinin ilk dövrlərindən etibarən milli mədəniyyətin qorunması sahəsində çoxşaxəli və genişmiqyaslı fəaliyyət göstərən ənənəvi muğam və musiqinin, ədəbiyyat və idmanın inkişafına verdiyi töhfələrə, dünya mədəniyyətlərinin mübadiləsi sahəsindəki xidmətlərinə görə Azərbaycan cəmiyyətinin hər bir üzvü tərəfindən sevilən Azərbaycanın Birinci vitse-prezidenti xanım Mehriban Əliyevanın Yeni Azərbaycan Partiyası Sədrinin müavini seçilməsi və çalışdığı ötən müddət ərzində uğurla yüksək səviyyədə fəaliyyət göstərməsini ayrıca qeyd etmək lazımdır.



Bütün daşkəsənlilər və şəxsən öz adımdan Azərbaycan Respublikasının Birinci vitse-prezidenti xanım Mehriban Əliyevanı “Bakı-2017” IV İslam Həmrəyliyi Oyunlarını Azərbaycan standartları əsasında yüksək səviyyədə keçirdiyinə görə ürəkdən təbrik edir və minnətdarlığımızı bildiririk!
Regionların sosial-iqtisadi inkişafı ilə bağlı qəbul olunan qərarlar olduqca böyük əhəmiyyət kəsb edir. Möhtərəm Prezidentimiz cənab İlham Əliyevin rəhbərliyi altında «2014-2018-ci illərdə regionların sosial iqtisadi inkişafı Dövlət Proqramı» ölkəmizdə uğurla icra olunur. Həmin Proqrama uyğun olaraq Daşkəsən rayonu da günbəgün inkişaf etməkdədir.



Bu gün Daşkəsən rayonunda ucqar dağ kəndlərinə çəkilən yollar və körpülər Azərbaycan xalqını inamla qələbəyə doğru aparan yollardır. Daşkəsənin ucqar dağ zirvələrində çəkilən yollar işğal altında olan ərazilərimizə aparan azadlıq, qələbə, zəfər yolu bugünkü iqtidarın, partiyamızın, Ulu Öndər Heydər Əliyev ideyalarının, dünya şöhrətli Prezidentimiz cənab İlham Əliyev uğlurlu siyasətinin eyni zamanda da təntənəsidir.
Bu gün rayonumuzda abadlıq, təmir-tikinti işləri geniş vüsət almışdır. Daşkəsən rayonunun tarixində Sovetlər dövründə görünməyən hazırda çoxsaylı məktəblər, uşaq bağçaları, xəstəxana və tibb məntəqələri, inzibati binalar inşa olunmuş, dam örtükləri müasir dəmir şifer lövhələrlə əsaslı təmir edilmişdir.



Daşkəsən şəhərində və Quşçu qəsəbəsində 16 mənzilli yaşayış binaları tikilərək rayon əhalisinin istifadəsinə verilmişdir.



Sevinc hissi ilə qeyd etməliyəm ki, Daşkəsəndə Çovdar qızıl yatağının ən müasir texnologiyalarla istismarını təşkil edən qızıl zavodu tezliklə istehsala başlayacaq, brend markalı 999,9 əyarlı Daşkəsən qızılı ölkəmizə iqtisadi gəlir gətirməklə dünyada şöhrət qazanacaq.



Hazırda «Yeni Daşkəsən» layihəsi uğurla icra olunmaqdadır. Ötən hər gün Daşkəsənin xəritəsinə daxil olan tikintilər, sosial obyektlər bu layihəni günbəgün zənginləşdirir.



17 oktyabr 2014-cü il tarixdə Azərbaycan Respublikasının Prezidenti cənab İlham Əliyevin və xanımı Mehriban Əliyevanın Daşkəsənə tarixi səfərini daşkəsənlilər bu gün də sevinc hissi ilə xatırlayırlar və biz indi də həmin səfərin doğurduğu yüksək xoş əhval-ruhiyyənin içərisindəyik. Səfər çərçivəsində cənab Prezident şəhərin mərkəzi meydanında ucaldılan Ümummilli lider Heydər Əliyevin abidəsi önünə tər güllər qoymuş, yeni qurulmuş Heydər Əliyev Mərkəzində olmuşlar. Daşkəsən Rayon İcra Hakimiyyətinin yeni tikilmiş inzibati binasının, Avtovağzal kompleksinin, Gənclərin Təlim və İstirahət Mərkəzinin açılışlarında iştirak etmişlər.



Rayonumuza hər zaman göstərdiyi ali diqqət və qayğıya görə ölkə rəhbərimiz cənab İlham Əliyevə bir daha da öz dərin minnətdarlığımızı bildiririk!
Ötən dövrdə Yeni Azərbaycan Partiyası Daşkəsən rayon təşkilatı parlaq uğurlar əldə etmişdir. Rayon təşkilatı partiya məfkurəsinin əsasını təşkil edən müstəqil dövlətçilik, qanunçuluq, azərbaycançılıq, yaradıcı təkamül, vətəndaş həmrəyliyi və sosial ədalət prinsiplərinin həyata keçirilməsində yaxından iştirak edir. Yeni Azərbaycan Partiyası Daşkəsən rayon təşkilatı partiyanın Nizamnaməsinə uyğun olaraq partiyanın formalaşması, onun təşkilat strukturunun möhkəmləndirilməsi istiqamətində xeyli işlər görmüşdür. Bu illər ərzində Gənclər Birliyinin, Qadınlar Şurasının, təşkilat və ideoloji şöbələrin işi daha da genişlənmiş, rayon təşkilatının ilk partiya təşkilatları ilə əlaqələri möhkəmlənmiş, partiya maarifçilik işi güclənmişdir. Partiyaya daxil olan üzvlərin sayı kəmiyət və keyfiyyətcə artmışdır.
Rayon təşkilatının say tərkibinin böyük əksəriyyətini gənclər təşkil edir. Sevindirici haldır ki, gənclər partiyada çoxsaylı bir qrup kimi fəaliyyət göstərirlər. Gənclərin partiya sıralarına axını nəticə etibarı ilə hörmətli cənab İlham Əliyevin gənc nəslə hər cür qayğı göstərməsindən, gənclər siyasətini ölkədə əsas istiqamətlərdən biri kimi müəyyənləşdirməsindən irəli gəlir.
Rayon təşkilatı fəaliyyəti dövründə gənclərin bilik və bacarıqlarına görə irəli çəkilməsinə diqqətlə yanaşmışdır. Gənclər rayonda keçirilən bütün tədbirlərdə yüksək fəallıq nümayiş etdirmişlər, radikal müxalifətin ictimai-siyasi sabitliyi pozmaq cəhdlərinə qarşı sosial şəbəkələrdə, forumlarda tutarlı cavablar vermişlər.
Azərbaycan xalqının Ümummilli lideri Heydər Əliyev ideyalarına sadiq olan və bu ideyalar əsasında fəaliyyət göstərən Yeni Azərbaycan Partiyasının Prezident İlham Əliyevin Sədrliyi ilə ötən müddət ərzində keçdiyi böyük inkişaf yolu qürur və iftixar hissi yaradır. Sıralarını daim kəmiyyət və keyfiyyət etibarilə genişləndirən Yeni Azərbaycan Partiyası, sözün əsl mənasında, ümumxalq partiyası kimi çıxış edir. Bu gün ölkəmizin ən güclü siyasi qüvvəsi olan Yeni Azərbaycan Partiyasının sıralarına gənclərinkütləvi axını bu siyasi təşkilatın gələcəkdə daha böyük nailiyyətlər qazanacağına əminliyi artırır.
Mən həmişə olduğu kimi, bu gün də YAP Daşkəsən rayon təşkilatının maddi texniki bazasının möhkəmləndirilməsi və qarşıdan gələn Prezident seçkilərinin rayon ərazisində daha yüksək səviyyədə keçirilməsi üçün lazımi köməyimi əsirgəməyəcək, bütün qüvvəmi səfərbər edəcəyəm. Rəhbərlik etdiyim rayonda əməli işimlə möhtərəm Prezidentimiz cənab İlham Əliyevin daxili və xarici siyasətinə ideoloji təminat yaradacağam.
Seçkilər həmişə olduğu kimi Daşkəsəndə yenə şəffaf, ədalətli, tam demokratik, yüksək səviyyədə keçiriləcək, təbliğat, təşviqat işləri diqqətimizdə olacaqdır.
Prezident seçkilərinə hazırlıq ən başlıca vəzifədir. Həmişə olduğu kimi, Yeni Azərbaycan Partiyasının Liderinin qələbəsinə hər birimiz birmənalı şəkildə var gücümüzlə dəstək olacağıq.
Yaşasın Ümummilli lider Heydər Əliyevin ölməz ideyaları!
Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevə eşq olsun!
Yaşasın Yeni Azərbaycan Partiyası!
Daşkəsən Rayon İcra Hakimiyyətinin Başçısı Əhəd Abıyevin dərin məzmunlu çıxışından sonra konfransının gündəliyinə uyğun olaraq YAP Daşkəsən rayon təşkilatının sədri Meydanəli Yolçuyevin təşkilatın ötən dövr ərzində gördüyü işlər barədə hesabat məruzəsi dinlənildi. Sonra təşkilatın Nəzarət-təftiş qrupunun sədri Yaşar Məhərrəmov hesabat məruzəsi ilə çıxış etdi. Ardınca məruzələr ətrafında çıxışlar başladı. YAP rayon təşkilatının Qadınlar şurasının sədri Rəna Aslanova, YAP rayon təşkilatının Gənclər Birliyinin sədri Elşən Alıyev, Milli Məclisin deputatları Rövşən Rzayev, Kamran Bayramov, Naqif Həmzəyev, YAP Siyasi Şurasının üzvü Mirkazım Kazımov, YAP Şəmkir rayon təşkilatının sədri Fəxrəddin Vəliyevçıxış edərək YAP Daşkəsən rayon təşkilatının ötən dövr ərzindəki fəaliyyətini yüksək qiymətləndirərək, konfransın işinə uğurlar arzuladılar.
Konfransda təşkilati məsələlərə baxılaraq MeydanəliYolçuyevyenidən YAP Daşkəsən rayon təşkilatının sədri seçildi. Həmçinin rayon təşkilatına 25 nəfərdən ibarət şura üzvü, 5 nəfərdən ibarət nəzarət-təftiş qrupunun üzvü seçildi.
Sonda YAP sıralarına yeni qəbul olunan bir qrup gəncə YAP-ın üzvlük vəsiqələri təqdim olundu, onlara qiymətli hədiyyələr verildi.

Sahib ƏHMƏDOV
Respublika Jurnalistlər Birliyinin üzvü