İcra başçısının paytaxta gəlməsi üçün nəqliyyat naziri ilə razılığa gəldiyi bildirilir

Dəfələrlə müxtəlif mətbu orqanlarında Daşkəsən rayon İcra Hakimiyyətinin başçısı, keçmiş millət vəkili Əhəd Abıyevin paytaxt rayonlarından birinə icra başçısı təyin olunmaq istəyindən bəhs olunub. Müxtəlif rayonların adı hallandırılsa da, sonda bu iddialar öz təsdiqini tapmayıb. Əhəd Abıyevin bu istiqamətdə yenidən fəallıq göstərdiyi barədə informasiyalar yayılıb.

Məlumatlarda bildirilir ki, Əhəd Abıyev Nəsimi rayonuna başçı gəlmək üçün səylərini artırıb. Bundan əvvəl Əhəd Abıyevin Suraxanı rayonuna icra başçısı gəlmək planları olduğu deyilirdi. Lakin, bu plan baş tutmayandan sonra bir müddətdir ki, Əhəd Abıyev yeni seçimini Nəsimi rayonuna edib.

Bildirilir ki, Əhəd Abıyev Nəsimi rayonuna başçı gəlmək üçün uzun müddətdir ki, nəqliyyat naziri Ziya Məmmədovla (Nəsimi rayonu Ziya Məmmmədovun kurasiyasında olduğu üçün) danışıqlar aparıb və nəhayətdə Ziya Məmmədovu razı salmağa nail olub. Ziya Məmmədovun Nəsimi rayon İcra Hakimiyyətinin başçısı Nəsib Məhəməliyevdən niyə vaz keçdiyi barədə isə heç bir məlumat verilmir. Qeyd edək ki, Nəsib Məhəməliyev 9 ildir ki, Nəsimi rayon İcra Hakimiyyətinin başçısı vəzifəsində çalışır və bir müddətdir ki, onun vəzifədən alınacağı barədə söz-söhbət dolaşır.

Əhəd Abıyevin Ziya Məmmədovla anlaşa bilməsinin onların arasında olan qohumluq telləri ilə əlaqələndirir. Xatırladaq ki, Əhəd Abıyevin qardaşı oğlu Ziya Məmmədovun qardaşı qızı ilə evlidir.

Həmçinin Əhəd Abıyevin Daşkəsən rayon İcra Hakimiyyəti postuna varis belə seçdiyi bildirilir. Belə ki, Əhəd Abıyev öz yerində keçmiş köməkçisi, hazırda Daşkəsən İcra Hakimiyyətində müavin vəzifəsində çalışan və faktiki olaraq Daşkəsəni Əhəd Abıyevin (Əhəd Abıyev Daşkəsəndə çox az olur) adından idarə edən Namiq Süleymanovu görmək istəyir və artıq bu niyyətini də gizlətmir.

Mustafa