Qulaq gündə bir söz eşitməsə kar olar məsəli Azərbaycan üçün keçərlidir. General Novruzəli Orucovun oğlunun sərgüzəştlərindən, baş nazirin müavini Əli Həsənovun nəvəsinin avtoşluğundan sonra, indi də bəlli olub ki, deputat atasına heykəl qoyub. Əcaba, deputat bunu hansı məqsədlə edib, nədən belə addım atıb, özündən başqa bilən yoxdur. Söhbət Sabirabad rayonu 64 saylı seçki dairəsindən deputat olaraq Milli Məclisə gəlib çıxan Rüstəm Xəlilovdan gedir.

Açığı, uzun illər jurnalistikada olan biri kimi Rüstəm müəllimin millət və dövlət qarşısında hansı xidmətləri olduğundan bixəbərəm. O səbəbdən də, deputatın fəaliyyətini təftiş etməyi doğru saymıram. Ancaq fəaliyyəti barədə onu deyə bilərəm ki, seçildiyi 2015-ci ildən bu yana parlamentdə cəmi bir və ya iki dəfə çıxış edib.

Əslində deputatın fəaliyyəti çıxış etməklə də ölçülmür. Real fəaliyyəti qanunvericilik üzərində işləməkdən, qanunları şaha çevirməkdən, qanunvericiliyin insan rifahı üçün çalışmasından gedə bilər. Əfsuslar olsun ki, dediyim bu fəaliyyət növünü Rüstəm Xəlilova aid edə bilmərəm, çünki mən deputatın bu fəaliyyətini görməmişəm.

Son xəbərlərə inansaq vəziyyət bu cürdür: deputat Sabirabad rayon Nizami kənd bələdiyyəsinin qarşısında atasına heykəl qoydurub. Kənd sakinləri mühim günlərdə həmin heykəli ziyarət etməyə məcbur edilir. İddiaya görə, deputat atasına qoydurduğu heykəllə ŞƏHİDLƏR LÖVHƏSİNİN qarşısını kəsərək vətən uğrunda canından keçən oğullara hörmətsizlik nümayiş etdirir.

Yeri gəlmişkən, sözügedən heykəlin qızıl suya çəkildiyi haqda da fikirlər var və ortada olan foto da buna əyani sübut ola bilər.

Ancaq iş ondadır ki, wikipedia.org saytında deputatın atası Xəlilov Gülabba haqqında hər hansı bir informasiya yoxdur.

Üstəlik Rüstəm Xəlilov haqqında da bu saytda ciddi informasiyaya rast gəlinmir. Baxmayaraq ki, ictimai fiqurdur.

Deputat atasının heykəlini təmir etdirdiyini qeyd edir, lakin onun qızıl suyuna çəkilməsini qərəz adlandırır. Arqumenti də budur ki, atası zamanına II Dünya Müharibəsində iştirak edib, sonra SSSRİ vaxtı Jdanov kolxozunun sədri olub, Sosialist Əməyi Qəhrəmanı adına layiq görülüb, eyni zamanda Lenin Ordeni, “Oraq və Çəkic” qızıl medalı alıb. Xub, çox gözəl! Bəyəm buna görə adam atasına heykəlmi qoydurar? Lap tutaq ki, Xəlilov Gülabba SSSRİ zamanı sistemin nümunə göstərdiyi şəxslərdən olub, ona heykəldə qoyublar. Axı indi bizdə SSRİ sistemi yoxdur, kolxoz quruluşu da çoxdan dağılıb. Biz başqa quruluşa keçid etmişik-demokratik quruluş yaratmaq istəyirik. Bu halda necə ola bilər ki, bələdiyyənin inzibati binası qarşısında heykəli qoyulsun?

Üstəlik bəllidir ki, heykəl qoymaq və ya təmir etdirmək üçün müxtəlif proseduralar keçmək, dövlət orqanlarına müraciət etmək, onlardan razılıq almaq lazım gəlir. Bu razılıq alınıbmı? Belə davam etsə doğurdan da SSRİ kimi quruluşda yaşamağımız real olacaq. Görünən odur ki, çoxlarının qol saatı kimi elə beyni də SSSRİ quruluşunda olduğu kimi çalışır.

Nemət Orucov
Redaktor