Mikayıl Cabbarovun "professor"u direktor və müəllimləri necə qorxutdu?

Gəncə şəhərindəki Mikayıl Müşfiq adına 14 saylı məktəbdə görünməmiş hadisə baş verib. Bu barədə "Gündəm xəbər"ə məktəbin bir qrup müəllimi - Əhmədova Sucayət Nəriman qızı, Qoşqarova Məleykə Paşa qızı, Rüstəmova İlhamə Rüstəm qızı, Əliyeva Sadəgül Bala qızı məlumat veiblər.
Müəllimlərin şikayətindən aydın olur ki, 14 saylı məktəbin direktoru Qasımov Elnur Fazil oğlu məktəbi idarə edə bilmir. Bu direktor da Mikayıl Cabbarovun yararsız kadrlarından biridir. Məktəbdə tədris prosesi çox aşağı səviyyədədir. Belə ki, məktəbin IX, X, XI sinif şagirdləri dərsə gəlmir, repetitor yanına getməyə üstünlük verirlər. Məktəbdə şagirdlərdən pul yığılması artıq bütün məktəblərdə olduğu kimi burada da ənənə halını alıb. Lakin biz müəllimlərin bəhs etdiyi daha maraqlı bir faktdan danışacağıq.
Müəllimlər yazır ki, xeyli müddətdir ki, məktəbə vaxtaşırı bir müəllimə gəlir. Həmin müəllimə özünü professor və Təhsil Nazirliyinin səlahiyyətli nümayəndəsi kimi təqdim edərək, dərslərin keyfiyyətini yoxlamaq məqsədi ilə gəldiyini bildirir: "Təcrübəsiz və naşı direktorumuz isə ondan heç bir sənəd tələb etmədən bu xanımın fəaliyyətinə şərait yaradırdı. Bu günlərdə yenə də həmin xanım dərs otaqlarının birinə girib, dərsin gedişinə müdaxilə edərək müəllimənin savadsız olduğunu dedi və onu dərsdən çıxardı. Nəticədə müəllimə əsəb sarsıntısı keçirdi, hüşunu itirdi. Hadisə məktəbə təcili yardım maşını çağırılmısına səbəb oldu".
Daha sonra müəllimlər bildirir ki, sonradan məktəbə gələn qadının professor olmadığı bəlli olub: "Onun Təhsil Nazirliyi ilə də heç bir əlaqəsi yoxdur. Məlum oldu ki, bu şəxs Gəncə Dövlət Universitetinin Təsviri-incəsənət kafedrasının müəllimi Səidə Abdulla qızı Tağıyevadır.
Biabırçılığa baxın, "mən professoram" deyib məktəbin direktorunun üstünə şığıyan bu qadın cəzasızlıqdan qorxmayaraq direktoru və dərs hissə müdirini təhqir edir, "işləyə bilmirsiz ,çıxın cəhənnəm olun" deyə onlara qışqırır, direktorun iş planını, sinif jurnallarını , pedaqoji şuranın sənədlərini, əmrləri yoxlamaq üçün tələb edirdi. Bacarıqsız və təcrübəsiz direktor isə aldanaraq onun bütün göstərişlərinə tabe olurdu. Direktor o dərəcədə təcrübəsizdir ki, Gəncə şəhər Təhsil İdarəsinə belə bu haqda məlumat verməyib".
Müəllimlər daha sonra yazır: "Sonradan bizə məlum oldu ki, Səidə Tağıyeva məktəbimizin müəllimi Səhər xanımın bacısıdır. Səhər xanım müəllimlərin diaqnostik qiymətləndirməsi zamanı çox zəif nəticə göstərib. Ona görə də onun dərs saatları alınaraq həmin təhqir olunmuş müəllimlərə paylanıb. Direktora olan bu hücumun və yoxlamanın məqsədi onu qorxudaraq "professor"un bacısının - Səhər xanımın dərs yükünün qaytarılması məqsədi daşıyırmış".

Artıq özünü Təhsil Nazirliyinin səlahiyyətli nümayəndəsi kimi təqdim edib saxta vəsiqə göstərərək məktəbin altını-üstünə çevirən bu dələduz xanımın fəaliyyəti ilə bağlı direktor Elnur Qasımov tərəfindən Gəncə Dövlət Universitetinin rektoruna məlumat verilib.

Gözləyək görək, Təhsil Naziri Mikayıl Cabbarov və Gəncə Dövlət Universitetinin rəhbərliyi məktəb müəllimlərinin əsəbləri ilə oynayan , onları komissiya adı ilə qorxudan bu saxta professor dələduz xanım haqqında hansı tədbiri görəcək?

Ortaya maraqlı bir sual da çıxır: Nə üçün məktəbin direktoru Elnur müəllim bu olayla bağlı hüquq-mühafizə orqanlarına müraciət etmir? Bəlkə torbada pişik var? Bəlkə müəllimləri qorxutmaq üçün bu ssenarini elə Elnur Qasımov özü cızıb.

Hər halda Təhsil Nazirliyi bu məsələni araşdırsa bütün həqiqətlər ortaya çıxacaq. Ümid edirik ki, nazir Mikayıl Cabbarov bu məsələni nəzaərtə götürüb araşdırma aparılmasına göstəriş verəcək və bu qanunsuzluğa yol verən şəxslər cəzalandırılacaqlar.

“Gündəm Xəbər"