Gənc oğlan sevgilisini döydü və həbsə düşdü

Xırdalan şəhərində qeyri-rəsmi yaşadığı qadına qarşı cinayət törətməkdə təqsirli bilinən Şəmkir rayon sakini, 1989-cu il təvəllüdlü Anar Muradinin cinayət işi üzrə məhkəmə prosesi başa çatıb.
İttihama görə,Anar Muradi Şəmkir rayonunda anadan olsa da, paytaxtın Binəqədi rayonu, 9-cu mikrorayon, M.Cəlal küçəsi, ev 121, mənzil 84 ünvanında qeydiyyatda olub. Paytaxtda fərdi əməklə məşğul olan Anar Muradi Xırdalan şəhər sakini Səbinə Əliyeva ilə sossial şəbəklərdən birində tanış olub və sonra onunla sevgili olub .
Anar Muradi ilə Səbinə Əliyevanın münasibətləri daha da istləşib və onlar qeyri-rəsmi ər-arvad kimi yaşamağa başlayıblar. Anar Muradi bir neçə il əvvəl Səbinə Əliyervanın Xırdalan şəhəri, “Kristal Abşeron” yaşayış kompleksindəki evinə köçüb və orada birgə yaşayıblar.
Sonra Anar Muradi ilə Səbinə Əliyeva birlikdə yaşadıqları evi satmaq qərarına gəliblər. Qadının razılığı ilə həmin ev satılıb və sonradan onların arasında pul bölgüsü üstündə dava baş verib.
Onların arasında dava 21 may 2017-ci il tarixdə, təxminən saat 23 radələrində baş verib. Satdıqları mənzilə görə yaranmış mübahisə zamanı Anar Muradi Səbinə Əliyevanı əli ilə vuraraq, ona bədən xəsarəti yetirib.
Məlum olub ki, Səbinə Əliyevanın satdığı mənzilin pulundan Anar Muradiyə heçnə çatmayıb. Anar isə qadından pulun yarısını ona verməsini tələb edib. Amma qadın ona pul verməyəcəyini deyib. Buna görə də onların arasında mübahisə, daha sonra cinayətlə nəticələnən hadisə baş verib.
Anar Muradi Cinayət Məcəlləsinin 127.1-ci (zərərçəkmiş şəxsin həyatı üçün təhlükəli olmayan və bu Məcəllənin 126-cı maddəsində nəzərdə tutulan nəticələrə səbəb olmayan, lakin sağlamlığın uzun müddət pozulmasına səbəb olmuş və ya ümumi əmək qabiliyyətinin üçdə bir hissəsindən az olmaqla əhəmiyyətli dərəcədə itirilməsi ilə nəticələnən qəsdən sağlamlığa az ağır zərər vurma) maddəsi ilə ittiham edilib.
Abşeron rayon Məhkəməsinin hökmü ilə Anar Muradi 1 il müddətinə azadlıqdan məhrum edilib. Hökmdən narazı qalan Anar Muradi apelyasiya şikayəti verib. O barəsində olan hökmün ləğv edilməsini, təyin edilmiş cəzanın şərti və ya cərimə cəzası ilə əvəz edilməsini xahiş edib.
Anar Muradinin şikayəti araşdırılması üçün Sumqayıt Apelyasiya Məhkəməsinə göndərilib. Apelyasiya şikayəti hakim Fərmayıl Zeynallının sədrliyi ilə baş tutan iclasda araşdırılıb.
Anar Muradi apelyasiya şikayətində birinci instansiya məhkəməsi tərəfindən ona cəza təyini zamanı zərərçəkmiş şəxslə barışıq əldə etməsini, zərərçəkmiş şəxsin ondan hər-hansı bir iddia və tələbinin olmamasını, himayəsində bir azyaşlı uşağının olmasını nəzərə almadan ona sərt cəza təyin edildiyini qeyd edib.
Təqsirləndirilən şəxsin vəkili M.Süleymanov apelyasiya şikayətinin dəlillərində göstərib ki, birinci instansiya məhkəməsi hökmündə Anar Muradinin əməlini səmimi etiraf edib: “Anar Muradi əməlindən peşmançılıq hissi keçirib, yaşayış yeri üzrə müsbət xarakterizə olunub. Onun himayəsində bir azyaşlı uşağı var. Zərərçəkmişlə barışıq əldə etməsini onun məsuliyyətini yüngülləşdirən hal kimi hökmdə göstərilsə də cəza təyin edilərkən faktiki olaraq göstərilən məsuliyyəti yüngülləşdirən halları nəzərə alınmayıb.
Halbuki, məhkəmə bu halları Cinayət Məcəlləsinin 62-ci madəsinin tələbində göstərildiyi kimi müstəsna hal hesab etməli və yenə Cinayət Məcəlləsinin 65.3-cü maddəsinin tələblərinə əsasən cəza təyin etməli idi. Lakin məhkəmə bunu etməyib. Abşeron rayon Məhkəməsi hökm çıxararkən yuxarıda geyd olunanlarla yanaşı, Anar Muradiyə cəza təyin edərkən bu cəzanın cinayətin xarakterinə, ictimai təhlükəlilik dərəcəsinə, məhkumun şəxsiyyətinə və eləcə də ailəsinin həyat şəraitinə təsirini nəzərə almadan ağır cəza təyin edib. Qeyd etdiyi hallardan da aydın görünür ki, birinci instansiya məhkəməsi tərəfindən cəza təyin edilərkən ədalətsizliyə yol verilib, yəni təyin edilmiş cəza sərt olub və bu da məhkumun şəxsiyyətinə uyğun olmayıb”.
Apelyasiya şiakyətinin dəlillərini araşdıran hakim heyəti qərar açıqlayıb. Qərara görə, Anar Muradinin apelyasiya şikayəti qismən təmin edilib və Abşeron rayon Məhkəməsinin hökmü dəyişdirilib.
Məhkəmə Anar Muradinin cəzasıını 4 ay 6 günə endirilməsi barədə qərar qəbul edib. Yeni təyin edilmiş cəzanı Anar Muradi həbsdə yatdığı müddətlə hesablanıb.
Bu səbəbdən onun barəsində seçilmiş həbs qətimkan tədbiri ləğv edilib və o, saxlanıldığı 3 saylı İstintaq təcridxanasından həbsdən dərhal azad edilməsi barədə qərar qəbul edilib.

Aslan
gundemxeber.az