Köhnə Bakı məhəllələrini bir-bir yox edirlər. İndi nə “Basin”, nə “Dmitrov” qalıb, “Sovetski” bu gün-sabah tamamilə xəritədən silinəcək, “Kubinka”, “Papanin”in də ömrünə çox qalmayıb…

Bu məhəllələrin koloritliyi nərd oynayan kişiləri, pinəçisi, dərzi dükanı, ora-bura qaçan uşaqlarında idi.

Kimi seçkidən, kimi pensiyadan danışır…

Dünyanın çox yerində, lap elə Amerikada, Türkiyədə, İranda şəhərlərdə məhəllələr bir-birindən spesifik cəhətlər ilə seçilirlər.



Bugünkü Bakıda isə şumlanan məhəllələrin yerlərini göydələnlər, parklar, “mal”lar əvəzləyir.

Yeni parklar isə daha köhnə bakılıların, şəhər adamlarının nərd oynamağa, təsbeh çevirib dərdləşmək üçün məkanına çevrilmirlər.



Belə gedişlə Füzuli meydanındakı parkdan da əsər-əlamət qalmayacaq. Və köhnə Bakı məhəllələri, parkları yalnız keçmişdə xatırlanacaq.

gundemxeber.az bildirir ki, azeuronews.com-un “Köhnə Bakı” rubrikası üçün belə parklardan birinin axtarışına çıxarkən Bakıxanov qəsəbəsindəki parkda köhnə şəhər mənzərəsinin şahidi olduq.



A.A.Bakıxanovun adını daşıyan bu kiçik parka “nərdtaxtalar parkı” adını da vermək olar.

Hər gün səhər açılandan axşama kimi parkın içində pensiyaçılar nərd, domino oynayırlar. Bunun üçün özləri masalar da düzəldiblər.

Və parka gələndə böyük nərd meydançasına daxil olduğunu təsəvvür edirsən. Hər masa ətrafında 4-5 kişi toplaşıb domino çırpırlar, zər cütləyib nərd atırlar.

Kimisi skamyada oturub pensiyadan gileylənir, kimisi seçkilərdən danışır, kimisi də televizorda eşitdiyini xəbər verir.



“İndiki cavanlar nərdi də kompüterdə oynayır”

Zöhrab kişi bizimlə söhbətində deyir ki, hər gün evdən çıxıb bu parka gəlir: “Neyniyim bala? Öyrəşmişəm bura.

Mən 25 ildir ki, “Razin”də yaşayıram. Səhər evdə nahar elədim, ayaqqabılarımı geyinib gəlirəm. Burda mənim köhnə dostlarım da var, qonşularım da. 3-4 saat vaxt “öldürüb” gedirəm evə”

Söhbətimizə qoşulan Nadir dayının sözlərinə görə, bu park onların ikinci evidir: “Pensionerlərin hamısı bura yığışır. Cavanların maşallah hər şeydən başları çıxır.

Biz interneti zadı bilmirik. Hərdən evdə nəvəm qoyur internetdə maraqlı videolar göstərir mənə.

İndiki cavanlar nərdi, şahmatı da komputerdə oynayırlar. Yox ay bala, bizlik deyil, bu daha e, üzbəüz kişi kimi oynamaq lazımdır (gülür)”.

Sabit müəllim vaxtilə Memarlıq və İnşaat universitetində işləyib. Təqaüdə çıxandan sonra vaxtaşırı evə yaxın olan Bakıxanov parkına gəlir.



Dediyinə görə, nərd çox oynamır, əsasən oyunçulara tamaşa edir: “İşləyən adam üçün pensiyaya çıxmaq çətin olur. Mən işə gedib-gəlməyə öyrəşmişəm. Düzdür, yolum uzaq idi. Ancaq iş adamı gümrah saxlayır”.

Nərd oynayanlar isə zəri cütləyib atırlar, arada seçkilərdən danışırlar. Deyirlər ki, seçən də bəlli, seçilən də…

Onları pensiyanın məbləği də artıq maraqlandırmır. Çünki uzaqbaşı 10 manat artım olur ki, dərhal bazarlarda qiymətlər qalxır. Özləri belə deyirlər.

Ona görə də “nərdtaxtalar parkı” bu insanların dərd-sərini unutduğu yeganə məkandır, evə gedəndə isə…