Baş konsulumuz danışdı: “Başqa cür olsa, kütləvi şəkildə saxtakarlığa göz yummuş olarıq”
Dünya mediasında konsulluğa girən və salamat çıxmayan jurnalist haqda yazıların, reportajların davam etdiyi bir vaxtda tənqidi bir şeylər yazmış jurnalist olaraq konsulluğa dəvət edilməyimi zarafata salaraq baş redaktorumuza xəbər verəndən sonra o məkana getdim.

Əslində 2 saat öncə konsulluğun fəaliyyəti barədə yazdığım tənqidi yazıyla bağlı Azərbaycanın İstanbuldakı konsulluğuna dəvətə görə bir az da sevindim ki, qaldırdığım məsələyə belə tez reaksiya verdilər. Tənqidi məqalələrə məhəl qoymayan, bildiyi kimi öz işinə davam edən məmurlar, jurnalistlərin gözünün düşmənidir.

Konsulluqda baş konsul Məsim Hacıyevlə görüşdüm. O, bu vəzifədə iki ildən artıqdır ki, çalışır. Amma onu media mühitində, ölkəmizin ictimai-siyasi dairələrində tanıyanlar çox azdır. Çünki cənab konsul mediatik adam deyil. Sələflərindən fərqli olaraq, onun heç qəzetlərdə, saytlarda dərc olunmuş şəkli də yoxdur. Söhbətimizi müşayiət edəcək şəkil çəkməyə cəhd etdim, Məsim müəllim ona da rüsxət vermədi və bir kəlməylə dedi ki, reklam olunmağı, özünü öyməyi sevmir.

Tənqidi yazımda qeyd etdiyim kimi, bəzi suallar vardı, ona cavab verilməsi lazım idi. Tərcümə edilən sənədlərin bahalı olmasından başladıq.

Baş konsul dedi ki, bu xüsusda durum çox qəlizdir: “Məsələ ondadır ki, İstanbulda yaşayan azərbaycanlılar çoxdur və onların çoxu qeyri-qanuni yaşayır. Onlar özlərinə qanuni sənədlər düzəltmək üçün qanunsuzluğa, saxtakarlığa əl atır, bundan ötrü bəzi saxta sənədlər hazırlayan şirkətlərə üz tuturlar. Həmin şirkətlər əsli olmayan sənədlər hazırlayır, tərcümə etdikləri sənədə artırmalar edirlər. Bəzən notariat kontorlarının möhürünü belə saxtalaşdırırlar. Biz sənəd verən kaymakamlığa, yəni hansısa rayonun icra hakimiyyətinə müraciət etdikdə məlum olur ki, onlar belə bir sənəd verməyiblər və bizə təqdim olunan sənəd tam saxtadır. Belə olanda da məcburuq sınanılmış, etibarlı tərcümə mərkəzlərinin və notariat kontorlarının xidmətindən istifadə edək. Başqa cür olsa, kütləvi şəkildə saxtakarlığa göz yummuş olarıq”.

İkinci məsələyə keçdik: konsulluğa müraciət edənlər nədən küçədə gözləyirlər, onların qapalı gözləmə zalında gözləməsinə, lazımi sənədləri münasib vəziyyətdə hazırlamalarına niyə şərait yaradılmır?

Baş konsul bildirdi ki, hər gün təxminən 150-200 nəfər konsulluğa müraciət edir: “Onların hamısını eyni zamanda konsulluğun binasının içindəki gözləmə zalında yerləşdirmək mümkün deyil. Qəbul otağında 15 nəfərlik yerimiz var. Beş nəfər üçün də ərizə yazmaq, anket doldurmaq üçün masalarımız var. Bu yerlər dolandan sonra müraciət edənlər gərək növbədə durub gözləsinlər. Onlara nömrə veririk, hər kəs öz növbəsini gözləyir, gözləmə zalında yerlər boşaldıqca bayırda gözləyənlər bir-bir gəlirlər”.

1.jpg (111 KB)

Məsim Hacıyev sözlərinin doğruluğunu əyani şəkildə göstərmək üçün əməkdaşlardan birini mənimlə birlikdə qəbul otağına göndərdi. Birinci mərtəbəyə endik, müşahidə etdim, baş konsulun dedikləri doğruydu. Mühafizəçilər məni XİN-dən gəlmiş müfəttiş hesab etsələr də, mühafizə xidmətinin rəhbəri bu məkanda şəkil çəkməyin qaydalara uyğun olmadığını dedi, daha mən də israr etmədim.

Konsulluq əməkdaşları baş konsulun təvazökar və sadə bir adam olduğunu, həm də bu vəzifəyə öz gücünə, uzun illərin zəhmətindən sonra, pillə-pillə irəliləyərək gəldiyini bildirdilər.

Bəs narazılıqlar nədən qaynaqlanır?

Onların dediyinə görə, saxta sənədlər hazırlayaraq pul qazanmaq istəyən bəzi işbaz şirkətlərin adamları bu cür söz-söhbətlər yayır və şişirdirlər. Üstəlik, müraciət edənlər çoxdur, onların hamısını qəbul edib, razı yola salmaq da çətindir.

Konsulluq əməkdaşı dedi ki, bəzən hətta çox xırda məsələ üstündə narazılıq yaranır: “Məsələn, bir qadın gəlib, deyirik, içəri keçməzdən öncə çantanı mühafizəçilərin yanında qoymaq lazımdır, kəskin şəkildə etiraz edir, səs-küy qaldırır. Belə şeylər az qala hər gün olur. Yaxud tez-tez müraciət edirik ki, yeni doğulmuş övladları üçün konsulluqdan doğum şəhadətnaməsi alsınlar, cavab verirlər ki, hələ lazım deyil. Uşaq böyüyüb məktəbə gedəsi yaşa çatanda gəlirlər. Sənədlərin tam və dürüst olması ondan ötrü vacibdir ki, vətəndaşlarımız Türkiyə dövlətinin səhiyyədə, təhsildə verdiyi imkanlardan yararlana bilsinlər”.

Konsulluğu ziyarətimin sonunda baş konsula da, digər konsullara da dedim ki, tənqidi yazılardan heç vaxt çəkinməsinlər, çünki tənqidi yazılar problemlərin həllinin təkanverici qüvvəsidir.

Ümid edək ki, İstanbul kimi böyük şəhərdə yaşayan həmvətənlərimiz də yaşadıqları ölkənin qanunlarına ciddi şəkildə riayət edəcəklər ki, sonra kütləvi şəkildə gəlib küçədə, konsulluq binasının önündə qalmasınlar.

Sözü gedən yazının linki burada: http://musavat.com/news/azerbaycanin-istanbuldaki-konsullugunun-fealiyyetinden-sikayetler-var-hadise-yerinden-reportaj-fotolar_579406.html