Bakı şəhər Baş Polis İdarəsi və Baş Prokurorluq 19 yanvarda "Məhsul" stadionunda mitinq keçirən aksiya iştirakçılarına rəsmi xəbərdarlıq edib, amma hüquq mühafizə orqanlarının yaydığı məlumatda ziddiyyətlər var.

Baş Prokurorluğun yaydığı məlumatda bildirilir ki, mitinqdən sonra iştirakçıların bir qrupu Yasamal rayonunun Şərifzadə küçəsində və Bakı Metropoliteninin "İnşaatçılar" stansiyasının yaxınlığında qanunsuz yürüş keçirib.

Yürüşdə yetkinlik yaşına çatmayanların iştirakı, polisə qarşı tabesizlik hallarına yol verildiyi bildirilib.

Bakı Şəhər Baş Polis İdarəsinin saytında üç gün əvvəl, etiraz aksiyasında sonra yerləşdirilən məlumat isə bu həftə verilən məlumatdan fərqlənir. Ötən həftə sonu yayılmış məlumatda deyilirdi ki, aksiya zamanı "ictimai asayişin və hüquq qaydasının kobud şəkildə pozulması halları qeydə alınmayıb".

Polis və istintaq orqanının bu həftə yayılan birgə məlumatında isə deyilir ki, 19 yanvar mitinqinin təşkilatçıları yanvarın 22-də Bakı şəhər Baş Polis İdarəsinə dəvət edilərək onlara rəsmi xəbərdarlıq edilib.

Onlara belə hərəkətlərin təkrarlanacağı təqdirdə aksiyanın təşkilatçıları və iştirakçılarına cinayət məsuliyyəti və qanuni digər tədbirlərin görüləcəyi bildirilib. Hüquq-mühafizə orqanlarının niyə bir-birinə zidd məlumatlar yaymasının səbəbini isə onların özlərindən öyrənmək mümkün olmayıb.

Milli Şuranın sədri Cəmil Həsənli Turan informasiya agentliyinə müsahibəsində deyib ki, aksiya dinc şəraitdə, hər hansı qarşıdurma olmadan keçib və heç bir iğtişaşa, qanunazidd hərəkətlərə yol verilməyib.

Bakı şəhər Baş Polis İdarəsi rəisi Mirqafar Seyidov isə bildirib ki, yanvarın 19-da Bakıda mitinqi təşkil edənlər paytaxtda "asayişi pozmağa və iğtişaşlar yaratmağa cəhd göstərib".

Bu barədə məlumat Bakı şəhər Baş Polis İdarəsinin saytında qeyd olunub.

Mirqafar Seyidov onların hər hansı toplantı keçirməsinə icazə verilməməsi ilə bağlı Bakı şəhər İcra Hakimiyyəti qarşısında vəsatət qaldıracağını deyib.

Milli Şura sədri Cəmil Həsənli deyib ki, "hökumətin gözləntisinin əksinə olaraq mitinqin izdihamlı keçməsi onları qorxuya salıb və bu tip açıqlamalar da həmin qorxunun nəticəsidir".

"Bu polis rəisinin öz səlahiyyət həddini aşmasıdır. Polis siyasi proseslərə, siyasi aksiyaların keçirilməsinə mane ola bilməz. Əgər Milli Şuranın növbəti mitinqinə icazə verilməyəcəksə, bu, artıq dinc aksiyaların bitməsi dövrü kimi, hakimiyyətin dinc aksiyalara icazə verməməsi kimi dəyərləndiriləcək",- Cəmil Həsənli sözlərinə əlavə edib.

O əlavə edib ki, Milli Şura növbəti mitinqin keçirilməsi üçün artıq Bakı Şəhər İcra Hakimiyyətinə müraciət edib.//bbc.com