2015-ci ildə Cahangir Hacıyevlə birlikdə həbs edilən və daha sonra şərti cəza alan şəxs növbəti dəfə hakim önünə çıxarılıb. Bu dəfə o, zərərçəkmiş kimi tanınır.

Bakı Ağır Cinayətlər Məhkəməsində dələduzluq işi üzrə məhkəmə iclası baş tutub. Həmin iş üzrə zərərçəkmiş şəxs Məhəmməd Cahangirzadə olub.

Məhəmməd Cahangirzadənin kimliyi isə bizə daha əvvəldən məlumdur. O, "Beynəlxalq Bank işi"ndə Cahangir Hacıyevlə birlikdə həbs edilmişdi.

O zaman Məhəmməd Cahangirzadənin adı və soyadı Məmməd Cahangirov idi.

Məmməd Cahangirov o zaman Beynəlxalq Bankda milyonlarla mənimsəməyə görə məhkum olunurdu.

Məmməd Cahangirov uzun illər Beynəlxalq Bankda işləyib. 2001-2011-ci illərdə bankın Nərimanov, 2011-2014-cü illərdə isə Sənaye filialının müdiri olub.

2015-ci ildə Beynəlxalq Bankın İdarə Heyətinin sabiq rəhbəri Cahangir Hacıyevlə birlikdə cinayət məsuliyyətinə cəlb olunan 7 nəfərdən biri olub və həbs edilmişdi. Bakı Ağır Cinayətlər Məhkəməsinin hökmü ilə şərti cəza alaraq azadlığa çıxmışdı.

Dünən baş tutan məhkəmədə məlum olub ki, Məmməd Cahangirov adını dəyişərək Məhəmməd Cahangirzadə olub.

O, bunun səbəbini məhkəməyə izah etmək istəməyib. Məhəmməd Cahangirzadə hazırda "Gilan Holding"in prezidentinin müşaviri olduğunu deyib.

Məhəmməd Cahangirzadənin dələduzluqla üzləşdiyi cinayət işi ilə bağlı geniş məlumat verəcəyik.