AtaBank-da yaranmış çətinliklərlə əlaqədar bankın H.Əliyev prospektində yerləşən “Xəzər” filialı bağlanıb.

Bu haaqda Yenisabah.az-a məlumat verən şəxs bildirib ki, bunun ardınca Maliyyə Bazarlarına Nəzarət Palatası AtaBanka qarşı tədbirlər həyata keçirməyə başlayıb. İlkin yoxlamalar nəticəsində müəyyən edilib ki, likvidliyi imkan vermədiyi halda bank tərəfindən prudensial normativlər pozularaq, əhalidən həddindən artıq əmanət cəlb olunub. 2-3 milyon manat kredit portfeli olan bankın filiallarının hər biri 20-30, bəzi hallarda isə 50 milyon manatadək əmanət cəlb edib.

Yoxlama zamanı o da müəyyən olunub ki, bank bu əmanətləri doğru iqtisadi münasibətlər çərçivəsində deyil, müxtəlif hədiyyələr verməklə, ən əsası o zaman qüvvədə olan sığortalanmış əmanət faizinə uyğun 15 faizədək yüksək faizlər təklif edərək qəbul edib. Bu isə kifayət qədər riskli addım hesab edilir və o deməkdir ki, bank iflas olacağı təqdirdə əhaliyə əmanətlərin qaytarılması dövlətin üzərinə düşəcək.

Bankın kredit portfelinin 70%-nin qeyri-işlək olması, maliyyə vəziyyətinə uyğun olmayaraq əmanətlər cəlb edərək böyük həcmdə öhdəlik altına girməsi, müştərilərə münasibətdə öhdəliklərini yerinə yetirə bilmədiyi və bununla da bank fəaliyyətinə dair tələbləri pozduğu üçün bankın əmanət qəbulu və kredit verməsinə Palata tərəfindən məhdudiyyətlər qoyulub.

Artıq əmanət cəlb etmək və kredit vermək səlahiyyətinə malik olmayan AtaBankda vəziyyət son dərəcə kritikdir. Bankın heç bir bankomatında demək olar ki, vəsait yoxdur. Vəsait olmadığı üçün bank əməliyyat edən müştərilərin köçürmələrini həyata keçirə bilmir.

Ən əsası isə bankda əmanəti olan müştərilərin əmanətlərini geri almaqda ciddi problemlər yaranmağa başlayıb. Bununla bağlı Palataya kifayət qədər şikayət xarakterli müraciətlərin daxil olduğu bildirilir. Hazırki dönəmdə bank əlində olan son resurslardan istifadə edir ki, bu da bankın gələcək fəaliyyətini şübhə altına alır.

Fazil Məmmədovun bir müddət öncə banka şəxsən gələrək səs-küylü qərarlar qəbul etməsi də heç bir işə yaramayıb. Onun sədr əvəzi kimi təyin etdiyi Samir Qəhrəmanov bankdakı vəziyyəti görüb, bir neçə gündən sonra bankı tərk edib əvvəlki işinə qayıdıb.

Mətbuata peşəkar kimi təqdim etdikləri, Məmmədovun Müşahidə Şurasına üzv təyin etdiyi 23 yaşı qardaşı qızı Xumar Əsədzadənin isə qanunla tələb olunan iş təcrübəsi olmadığı üçün Palata tərəfindən bu təyinata icazə verilməyib.

Verilən məlumata görə Fazil Məmmədov tərəfindən bacısı oğlu Dəyanət Quliyevin və müavini olmuş Etibar Babaşlının fəaliyyəti ciddi şəkildə yoxlanılır. Lakin bu addımların bankın gələcək fəaliyyətinə heç bir müsbət təsiri olmayacaq.

Fazil Məmmədovun yaxın ətrafından verilən məlumata görə, Məmmədov bankın bağlanmasında, beləliklə də yaranmış öhdəliyin dövlətin üzərində qalmaqla məsuliyyətin ört-basdır edilməsində maraqlıdır. Fazil Məmmədov gec-tez bank kimi bir önəmli təşkilatın onda qalmasının mümkün olmadığını yaxşı bilərək, onun dirçəlməsi istiqamətində hər hansı bir addım atmayacaq.

Yaranmış vəziyyətə uyğun olaraq, nəzarət orqanının sərt tədbirləri fonunda bankı hansı aqibətin gözlədiyi – Fazil Məmmədovun sərəncamında qalmaqla çökməsi, yoxsa təhvil alınıb sağlamlaşdırılmasının baş verəcəyi qeyri-müəyyəndir.