Cari ilin 01-10 oktyabr tarixlərində respublikada baş tutacaq əhalinin siyahıyaalınması ilə bağlı Abşeron rayonunda ictimaiyyət nümayəndələri ilə maarifləndirmə tədbiri keçirilib.

Xırdalandakı Heydər Əliyev Mərkəzində reallaşan tədbirdə Abşeron rayon İcra Hakimiyyəti başçısının müavini İlham Quluyev, rayon Statistika idarəsinin rəisi Təvəkkül Mirzəyev, siyahıyaalma məntəqələrinin nümayəndələri və ümumilkdə rayon ictimaiyyəti iştirak edib.



Əvvəlcə siyahıyaalmanın vacibliyini və prosedurun özünü əks etditrən videoçarx izlənilib.



Müstəqil Azərbaycanda ilk siyahıyaalmanın 1999-cu ildə keçirildiyini xatırladan İ.Quliyev bildirib ki, əhalinin siyahıyaalınması hər 10 ildən bir baş tutur və bu il artıq sayca üçüncü siyahıyaalma prosesidir. Siyahıyaalmanın ölkəmizin gələcək inkişafının müəyyən olunmasında baza rolunu oynadığını vurğulayan başçının müavininin sözlərinə görə, bu zamanı təkcə demoqrafik göstəricilərin dəqiqləşdirilməsi deyil, eyni zamanda iqtisadi, sosial məlumatların toplanılması prosesi də həyata keçirilir.



Bu da istər təhsil, səhiyyə, sistemində, məşğulluğun planlaşdırılmasında, istərsə də əhalinin elektrik enerjisi, su, təbii qazla təchizatda, nəqliyyat infrastrukturunun formalaşmasında , ümumiyyətlə, həyatın bütün sahələrində həmin məlumatlardan istifadəni mümkün edir.

Hazırda Abşeron rayonu üçün əhalinin siyahıyaalınmasının çox vacib bir məsələ olduğunu önə çəkən İ.Quliyev əlavə edib ki, rayon ərazisində qeydiyyatda olan əhalinin sayı çox aşağıdır. “Bu gün 214 min nəfərə yaxın qeydiyyatda olan sakinimiz var. Faktiki əhali isə ərazidə məskunlaşmış 40 min nəfərə qədər məcburi köçkünlə birgə 500 min nəfərə qədərdir.

Bunun nəticəsidir ki, bu gün 80 min nəfərə qədər əhalisi olan Masazır hələ kənd statusu daşıyır. Məktəblərimizdə, bağçalarımızda çox böyük şagird, uşaq sıxlığı var.



Bir çox səhiyyə müəssisələrimiz hələ feldşer mama, kiçik bir həkim məntəqəsi statusundadır. Polislərin sayı kifayət qədər deyil ki, bu da cinayətkarlığın qarşısının alınmasında çətinliklər yaranır. Sizə bunları deməkdə məqsədim ondan ibarətdir ki, əhalimizin sayının düzgün müəyyən olunmasının görün nə qədər böyük əhəmiyyəti vardır”.



Bildirilib ki, 2016-cı ilin 29 dekabrında Rayon İcra Hakimiyyəti başçısının sərəncamı ilə 15 nəfərdən ibarət Abşeron rayon İcra Hakimiyyəti yanında əhalinin siyahıyaalınmasına yardım Komissiyası yaradılıb. Ötən müddət ərzində Rayon Statistika idarəsi, rayonun inzibati ərazi dairəsi üzrə nümayəndəliklər tərəfindən əhalinin məskunlaşma yerləri tamamilə müəyyən olunaraq sxematik planlar hazırlanıb. Ümumilikdə Abşeron rayonu üzrə 36 siyahıyaalma məntəqəsi yaradılıb. Bu məntəqələrdə 334 nəfər təlimatçı-nəzarətçi, 1704 nəfər sayıcı müəyyən olunub.

Daha sonra rayon Statistika idarəsinin rəisi Təvəkkül Mirzəyev, Dövlət Statistika Komitəsinin nümayəndəsi Ruslan Əliyev, Rayon Ağsaqqallar Şurasının sədri Nadir Ağayev, rayon Təhsil şöbəsinin müdiri Nazilə Məmmədova, YAP Abşeron rayon təşkilatının qadınlar şurasının sədri Təyyubə Hüseynova çıxış edərək siyahıyaalmının ölkə üçün əhəmiyyətindən danışıblar. Bu istiqamətdə rayon ictimaiyyətinin üzərinə düşəcək vəzifələrin uğurla icra ediləcəyi qeyd onub.

GundemXeber.Az