Martın 31-də Qarabağda “parlament və prezident seçkiləri” zamanı Muş kəndinin rəhbəri Petros Avetisyan kəndi gəzərək qışqıra-qışqıra bu sözləri deyib: “Hələ dünyaya elə bir adam gəlməyib ki, mənə, xüsusilə Araikə (Arutyunyan) qarşı çıxsın. Əgər beləsi varsa, ayaqlarını sındıraram”. Bir qrup şəxs sərxoş vəziyyətdə seçki məntəqəsinə yaxınlaşaraq dava salıb, sonra isə Kovsakana gedən yolda Samvel Babayanın “Vahid Vətən” Partiyasının vəkilinin avtomobilinə zərbə vurub.

Gundemxeber.Az xəbər verir ki, bu barədə məlumatı Vətəndaşlar ittifaqı təşkilatının sədri, hüquq müdafiəçisi Daniel İoannisyan Facebook səhifəsində yazıb.

O, qeyd olunan informasiyaların 4 mənbədən təsdiqlədiyini deyir.

Postda deyilir ki, kənd başçısını və davanın digər iştirakçılarını polis şöbəsinə aparıblar, lakin sonradan azad ediblər. Cinayət işi hələlik yoxdur, verilən məlumat isə “iki qadının kənd başçısına etdiyi hücum” nöqteyi-nəzərindən araşdırılır.

İoannisyan səhər Cinayət Məcəlləsinin bir neçə maddəsi üzrə ərizə vermək niyyətində olduğunu bildirib.

“Əgər Martuni şəhərinin meri tərəfindən yolun kəsilməsi ilə bağlı iş lazımi şəkildə araşdırılsaydı, belə hal baş verməyəcəkdi. Polisin hərəkətsizliyi cinayətkarlığa kömək edir”, – hüquq müdafiəçisi yazıb.

Bundan əvvəl məlum olub ki, Qarabağın Kaşataq rayonunun Muş kəndində 8/46 seçki məntəqəsində sabiq baş nazir, prezidentliyə namizəd Araik Arutyunyanın adamları kənd başçısı başda olmaqla, namizəd Masis Mayilyanın tərəfdarlarına hücum ediblər.

Sabiq baş nazir Arutyunyan və hazırkı “xarici işlər naziri” Mayilyan aprelin 14-nə təyin olunmuş ikinci turda “prezident kürsüsü” uğrunda mübarizə aparacaq. Rəsmi məlumatlara görə, onlar müvafiq olaraq 49.26% və 26.4% səs toplayıblar.

GundemXeber.Az