Bu gecədən, aprelin 5-dən ölkədə xüsusi karantin rejimi tətbiq olunur.

Belə rejimin qaydalarına görə, KİV də içində olmaqla, bir sıra sahələrdə çalışanlar çıxılmaqla heç kəsin SMS araçılığı ilə icazə almadan yaşayış yerindən çıxmaq hüququ yoxdur və bu qaydanı pozanları inzibati cəzalar gözləyir. İlk baxışdan hər şeyin dəqiq hesaba alındığı görünsə də, bir çox anlaşılmazlıqlar da var. Məsələn , məhkəməyə , hüquq mühafizə orqanlarının çağırışlarına getməyə heç bir icazə tələb olunmur , sadəcə , müvafiq bildirişi təqdim etmək yetərlidir. Axı, nə polis , nə prokurorluq çağırdığı şəxsi rəsmi qaydada - SMS-lə, bildirişlə bilgiləndirmir !? Eləcə zənglə hansısa hüquq mühafizə orqanının qapısında olmağı tapşırır. Biz hələ təhlükəsizlik xidmətini demirik. Məhkəmələrdən heç danışmağa dəyməz . Bildiriş vermədən zənglə çağırmaqdan tutmuş , 5-10 gün geri tarixə çağırışlar “məhkəmə- hüquq islahatlarının dərinləşdirilməsindən” qabaq da , indi də başlıca prosessual normalar olaraq qalır. Xüsusi karantin rejimində vətəndaş rejim nəzarətçisini necə başa salsın ki, bu gün verilən bildirişlə 10 gün qabağa iclasa çağırılması onun yox, məhkəmənin qaydanı pozmasıdır ?!
KİV -ə gəldikdə, hansısa informasiya vasitəsinin vəsiqəsinin və ya arayışının olması bəs edir ki, peşə borcunu və maddi ehtiyacını ödəmək üçün evdən çıxışına “yaşıl işıq yandırılsın” . Bəs bağımsız - müstəqil jurnalistlərə ilişgidə qayda tənzimlənməsi necə olacaq? Adından göründüyü kimi , bu media nümayəndələri fəaliyyətlərində tam özgürdürlər və təbii ki, heç bir redaksiya heyətinin üzvü deyillər. Sadəcə, istənilən redaksiya ilə əməkdaşlıq edən bağımsız jurnalistlər özlərini nə ilə tanıtsınlar? Özlərinə jurnalist vəsiqəsi verməyəcəklər ha! Hansısa KİV -in əməkdaşlıq haqqında arayışı da sistemdə adının olmaması nədəni ilə saxta sayılacaq və “qaş düzəltmək yerinə göz çıxarmaq “ effekti verəcək. Yəni, inzibati cəzaya “ saxta sənəd cinayəti” də qoşula bilər ki , bunun da xüsusi karantin rejimindən də uzun çəkəcəyi şübhə doğurmur. Bəlkə fiziki şəxs kimi sahibkarlıq fəaliyyəti ilə məşğul olmaq haqqında vergi ödəyicisinin eyniləşdirmə nömrəsi (VÖEN ) sözügedən problemin çözülməsində açar olar? Hər bir fərdi sahibkarın VÖEN -i sistemdə oturub və nömrəni qeyd etməklə rejim nəzarətçisi bunu asanlıqla müəyyən edə bilər. Bu çözümdə “əmma” odur ki, məhz jurnalistlik fəaliyyəti ilə məşğul olduğunu sübut etmək tələb oluna bilər. Fikrimizcə, Mətbuat Şurası da müstəqil jurnalistlərə gərəkən sənədi verməklə və müstəqil jurnalistlərin siyahısını sistemə yerləşdirməklə sözügedən problemin çözülməsinə töhfəsini verə bilər.

Məğrur Bədəlsoy