Koronavirus pandemiyası dünyanı öz cənginə alandan Azərbaycanda 260 nəfər məhkum məhkəmələr tərəfindən şərti olaraq azadlığa buraxılıb, yaşı 65-dən yuxarı və xəstəliyi olan 176 nəfər məhkum isə prezidentin sərəncamı ilə əfv olunub.

Nəzərə alaq ki, ölkəmizdə ümumilikdə 18 minə yaxın məhkum var. Onlardan isə 340 nəfərə yaxını son iki ayda azadlığa çıxıb.

“Konstitusiya” Araşdırmalar Fondunu rəhbəri Əliməmməd Nuriyev cəza çəkən məhkumların azadlığa çıxmaları ilə bağlı işlərdən danışıb: “Ədliyyə naziri Fikrət Məmmədovun əmri ilə az ağır cinayətlər, nəqliyyat qəzalarına görə məhkum edilmiş şəxslərlə bağlı qanunvericiliyin tələbinə uyğun azad edilməsi üçün işlər görülür. Məntəqə Tipli Cəzaçəkmə Müəssisələrində cəzasının yarısını çəkmiş şəxslərin azad olunması məsələsi də gündəmdədir. Hətta qanunvericilik imkan verirsə, 2 il cəza müddəti qalmış şəxslərin də azad olunması üçün tədbirlər görülür. Cəzaçəkmə müəssisələrində seyrəlmənin təmin edilməsi üçün addımlar atılır. Xüsusilə ağır cinayət törətmiş şəxslərin azad edilməsi məsələsi nəzərdən keçirilimir. Bununla belə, yaşlı, xəstə məhkumların işləri də öyrənilir”.

Qeyd edək ki, hazırda həbsdə olan xəstə məhbusların çoxunun səhhəti qənaətbəxş deyil və onların azadlığa buraxılmasına ehtiyac var. Azərbaycan Respublikası Cinayət Məcəlləsinin 78-ci və Cəzaların İcrası Məcəlləsinin 167-ci maddəsinə əsasən məhkumlar ağır xəstəliyi ilə əlaqədar cəzasının qalan hissəsindən azad edilə bilər. Ancaq əfsuslar olsun ki, bu maddələr əsasında ağır xəstə olan məhkumların azadlığa buraxılması məsələsi dəfələrlə qaldırsa da lazımi tədbirlər görülməyib. Penitensiar xidmət isə həbsxanalarda məhbusların sağlamlığı ilə bağlı hər cür şəraitin yaradıldığını və onların həyatı üçün təhlükənin olmadığını dəfələrlə bəyan edir.

Hazırda adı 7 saylı cəzaçəkmə müəssisəsində olsa da, Müalicə Müəssisəsində Cinayət Məcəlləsinin 178.3.2-ci (dələduzluq- külli miqdarda törədildikdə) maddəsi ilə 10 il azadlıqdan məhrum edilməklə cəza çəkən Alim Əkbərovun atası Çərkəz Əkbərovun sözlərinə görə, onun oğlu elə əvvəldən, yəni məhkumluqdan qabaq da psixi xəstəlikdən əziyyət çəkib, rəsmi olaraq dispanserdə qeydiyyatda olub: “Alim Əkbərov 2003-2016-cı illərdə İmişli Rayon Mərkəzi Xəstəxanasının Poliklinikasının Psixatriya şöbəsində baş beyin üzvü xəstəliyi nəticəsində psixi pozuntular və nəzərə çarpan dərəcədə şəxsiyyət dəyişkənliyi dərk etmə qabiliyyətinin azalması və tez-tez qıc olma diaqnozu ilə müalicə alıb. 2016-cı ildən Baş Səhiyyə İdarəsinin 28 saylı şəhər Poliklinikasının Psixatriya şöbəsində qeydiyyatdadır. Ambulator kitabçanın çıxarışlarından göründüyü kimi 2017-ci il ərzində 5 dəfə Bakı şəhəri Baş Səhiyyə İdarəsinin 2 nömrəli Klinik Psixatriya xəstəxanasının Psixatriya şöbəsində və 1 nömrəli Respublika Psixatriya xəstəxanasında stasionar müalicə alıb. Neçə illərdi ki, psixatrik dərmanlar qəbul edir. Həbsxana həyatı isə onun xəstəliyini daha da artırıb. 2018-cı ilin fevral ayından 21.08.2019-cu ilədək Penitensiar xidmətin Müalicə Müəssisəsinin Psixatriya şöbəsində müalicə alıb. Yenə də həmin şöbədə müalicəsini davam etdirir. Son aylarda isə vəziyyəti kəskin olaraq pisləşib. Saxlanma şəraiti normal olsada artıq Alimin həyatı çox təhlükədədir, düzgün müayinə və müalicə ilə bağlı ciddi problemlər var. Artıq onu müalicə etdirməyə nə mənəvi, nə də maddi gücümüz qalmayıb. Yaşlı anası ölüm ayağındadı, 1 azyaşlı körpənin gözü hər gün qapıdadı ki, atam gələcək... Biz Alim Əkbərovun vəziyyəti ilə bağlı dövlət və məhkəmə orqanlarına müraciətlər etmiş, vəsatətlər vermişik ki, Alim ağır xəstə olduğu üçün Ali Məhkəmə onun cəzası ilə bağlı ədalətli qərar çıxarsın. Dəfələrlə Ədliyyə Nazirliyində, Ali Məhkəmədə aidiyyatlı şəxslərin qəbullarında olmuşam, sübutlar təqdim etmişəm ki, oğlum günahsız olaraq həbs edilib. Oğlum psixi xəstə ola-ola 10 il cəza verdilər. Alim Əkbərov kimi xəstə məhkumların sayının çoxluğunu nəzərə alaraq dövlət tərəfindən cəzaların dekriminallaşdırılması ilə yanaşı humanizm siyasəti həyata keçirilərək ağır maddələr üzrə amnistiya verilməlidir”.

Azər İsrafilov