Məlum olduğu kimi 2011-ci ilin noyabrın ayının 28-də Berlində Qarabağın Azərbaycanlı icması ilə erməni icması arasında görüş keçirilməli idi. Dağlıq Qarabağın azərbaycanlı və erməni icmalarının “dialoq”u adlı foruma qatılan olmasa da, tədbirdə Ermənistandan gələn və Almaniyada təhsil alan erməni gəncləri də iştirak ediblər.

Həmin görüşdə vaxtilə “Qarabağın Azərbaycalı İcması” ictimai birliyinin idarə heyətinin üzvü, millət vəkli olmuş Rövşən Rzayev də iştirak edib. Dialoq təşəbbüsünün meydana gəlməsinə başlıca səbəb, 2007-ci ildə ziyalılarımızın Qarabağa səfər etmələri olmuşdur. Ziyalılar 2009-cu ildə bir daha Qarabağa üz tuturlar və həmin vaxt nümayəndə heyəti Qarabağa qayıdışı birmənalı şəkildə vurğulayırlar. Ona görə də icma mümkün variantlardan istifadə edib keçmiş əlaqələrini, münasibətlərini bərpa etməyə çalışır. Qeyd edək ki, həmin ildə Almaniyada keçirilən görüş yuxarıda qeyd olunan səfərlərin davamı olur. Keçirilən görüşün təşəbbüsçüsü “Avroqafqaz Mədəni-Elmi Mərkəzi”n professoru Yeva-Mariya Ayx və Azad Berlin Universitetinin professoru Udo Ştaynbax olurlar. Onlar Dağlıq Qarabağın azərbaycanlı və erməni icmalarının dialoqu adlı forumu təşkil edirlər.

Bizim də nümayəndə heyyəti protokola uyğun olaraq həmin görüşdə iştirak etmək üçün Berlində olurlar. Düzdür, görüş olur, amma əldə etdiyimiz məlumatlara görə icmalararası dialoq baş tutmur. Həmin görüşdə Ermənistandan olan QHT nümayəndələri bizim nümayəndələrlə bir araya gəlirlər. Diqqət çəkən məqam o olur ki, Almaniyada təhsil alan erməni tələbələrin təqribən 20 nəfəri həmin tədbirdə iştirak edirlər. Dialoqda erməni tərəfinin bizim nümayəndə heyyətində təmsil olunanlara ünvanladıqları suallar, bizimkilərin onlara verdikləri cavablar görüşün əhəmiyyətini xeyli canlandırır. Tədbirdəki çıxışlar belə bir görüşlərin əhəmiyyətli olduğunu bir daha ortaya qoyur.

“Qaçqınkom”un bugünkü sədri Rövşən Rzayev bir ziyalı olaraq, Azərbaycanın haqlı mövqeyini lazımınca müdafiə edir. Onun həmin dialoqdakı çıxışını ixtisarla təqdim edirik: ''Bizim öz torpaqlarımıza qayıdacağımız şübhəsizdir və bu, birmənalıdır. Təəssüflər olsun ki, 20 ildir belə bir görüşlər keçirilmir. Buna görə də erməni gəncliyində Azərbaycan haqda doğru olmayan, mənfi fikirlər formalaşıb. Həmin gərginliyi bu kimi görüşlərələ azaltmaq mümkündür. Bundan sonra həm Almaniya, həm də Avropanın digər dövlətləri, həmçinin ABŞ, Rusiya və digər ölkələrlə olan əlaqələrimizdən istifadə edib, eyni çərçivədə icmaların görüşünə çalışacağıq. Biz dialoqun baş tutması üçün lazımı addımlar atacağıq. Hesab edirik ki, nə qədər çox danışıb müzakirələr aparsaq, o halda birbirimizə qarşı inam hissi yarada bilərik, biri-birimizə tez inteqrasiya edə bilərik. Düzdür, problemin siyasi həlli dövlətlərarası məsələdir. Sadəcə biz icmalar arasında keçmiş əlaqələrin bərpa olunmasına çalışırıq və əməkdaşlığın bərpa olunması üçün, bu gün yaşlı nəsl olaraq körpü rolunu oynayırıq. Çünki, icmaların gənc nəsli biri-birini tanımırlar. Əminəm ki, bu yöndə olan fikirlərimi Qarabağdakı ermənilərdən dəstəkləyənlər çoxluq təşkil edəcəklər. Mən şəxsən 2009-cu ildə Qarabağa gedəndə söylədiklərimin canlı şahidi olmuşdum. Faktdır ki, sadə insanlar arasında heç bir problem yoxdur və mən bizə qarşı mənfi münasibəti görmədim. Hətta, orada olarkən jurnalistlər yaxınlaşıb “biri-birimizi tanımaqdan ötəri qarşılıqlı jurnalist səfərləri olmalıdır” dedilər. Mən hesab edirəm ki, belə səfərlər olmalıdır və inanıram ki, Ermənistanda da sülhsevər qüvvələr çoxdur. Onlar da sülhün əldə olunması üçün əllərindən gələni edəcəklər. Qeyd edim ki, alman depuatatlarla görüş bizim üçün çox vacib idi. Xüsusilə də Velmanla... Onunla görüşümüzü təşkil etdiyinə görə ölkəmizin Alamniyadakı sabiq səfiri cənab Pərviz Şahbazova təşəkkür edirik. Biz Velmanla görüşdük, aramızda geniş fikir mübadiləsi oldu və görüş zamanı əsl həqiqətləri ona çatdıra bildik”. Belə bir çıxışları Avropanın mərkəzindən səsləndirmək yüksək mədəniyyət və bacarıq tələb edirdi. Bəli, mədəni fikir formalaşdırmağı bacaran Rövşən Rzayevin bu cür addımları, heç də ölkə başçısının diqqətini cəlb etməyə bilməzdi. Bir neçə il Qarabağ həqiqətlərini dünya ictimaiyyətinə əsaslı şəkildə çatdıran bir ziyalının bu yöndə atdığı addımlar, məhz ölkə rəhbəri tərəfindən təqdirəlayiq addım hesab olunur və çox keçmir ki, onun Qacqınların və Məcburi Köçkünlərin İşləri üzrə Dövlət Komitəsinə rəhbərlik etməsi məsləhət görülür. Təbii ki, belə bir strateji sahəyə rəhbərlik edən şəxs lazımi potensiala, ağıla, düşüncəyə sahib olmalı idi. Buna görə də Prezident İlham Əliyevin 21 aprel 2018-ci il tarixli Sərəncamı əsasında Rövşən Rzayev, Qaçqınların və Məcburi Köçkünlərin İşləri üzrə Dövlət Komitəsinə sədr təyin olunur. Cənab Prezidentin “Qaçqınkom” sədrinin qarşısında qoyduğu başlıca vəzifələr- köçkünlərin mənzilə, normal şəraitə və digər sosial ehtiyaclarının ödənilməsi ilə bağlı məsələləri həll etməkdən ibarət olur. Bəli, bu gün verilmiş tapşırıqlar Komitə sədri tərəfindən ardıcıl şəkildə uğurla həyata keçirməkdədir.

Hər kəsə məlumdur ki, qaçqın və məcburi köçkünlərin problemləri, bu gün Azərbaycan dövləti üçün ən ağrılı məsələlərdəndir. Bu sahədə çalışmaq üçün, həm vətənpərvər, həm də işgüzar olmalısan. Bəli, bir şəxsin bütün bunların öhdəsindən uğurla gəlməsi, sanki həmin şəxs üçün böyük çətinlik deməkdir. Ətrafdakı vəzifə sahiblərindən bəziləri köhnədən qalsalar da, əslində onlar öz rəhbərlərinə sadiq olmalıdırlar ki, görülən işlərin effektivli olsun. Təəssüflər olsun ki, bu gün bəzi vəzifə sahibləri bacarıqsız addımları ilə, yaxud da bilərəkdən “Qaçqınkom” sədrinin adına xələl gətirən addımlarını atırlar. Əgər illər öncə Avropanın yüksək tribunalarından Rövşən Rzayevin vasitəsilə Azərbaycana başucalığı gətirən çıxışlar baş tuturdusa, bu gün Avropadan heç bir əsas olmadan bu şəxsin adının da hallandığı, bir növ özfəaliyyətilə məşğul olan rüşvətxor məmurların korrupsiya əməlləri haqda məlumatlar ötürülür və bunlarla bağlı tənqidi məqalələr də dərc olunur. Yəqin ki, bu kimi xoşagəlməz halların baş verməsinin kökündə, komitədə həyata keçirilən islahatların hələ də yekunlaşmaması səbəb olur. Düşündürücü haldır ki, bu gün Komitə sədri gecə-gündüz qaçqınlara və məcburi köçkünlərə məxsus problemlərin həllinə çalışsa da, adı çəkilən qurumun üst sütunlarında aparıcı sahələrdə çalışan elə vəzifə sahibləri var ki, bu gün onlar problemlərin üstünə yeni-yeni problemlər gətirməklə məşğul olurlar. Faktdır ki, həmin şəxslərin çoxu hazırda Rövşən Rzayevin ətrafında yer alsalar da, onlar sədrlə sadə sakinlər arasında uçurum yaradıb narazılıq hissinin baş qaldırmasına səbəb olurlar. Bir sözlə, bu gün baş verənləri təhlil edib belə bir qənaətə gəlmək olar ki, Qacqınların və Məcburi Köçkünlərin İşləri üzrə Dövlət Komitəsində əsası qoyulmuş islahatları yekunlaşdırmaq lazımdır ki, həm Komitə sədri, həm də maddi və sosial sıxıntılar içində yaşayan qaçqınlar və məcburi köçkünlər “azad nəfəs” alsınlar. Yoxsa, dərdimiz bol, yaralarımız isə sağalmaz olacaq.

Gundemxeber.Az