Ətraf mühitin mühafizəsi, problemlərinin aradan qaldırılması, bir sözlə ekoloji tarazlığın qorunub saxlanılması və s. hər zaman aktuallıq kəsb edən məsələlərdən biri olub.

Ətraf mühit dedikdə tam əksəriyyətin nəzər-diqqətində əsas bir anlam, ucsuz-bucaqsız meşə zolaqlarının varlığı nəzərdə tutulur. Düzdür, bu gün meşə zolaqlarının olduğu rayonlar, iri yaşayış məntəqələri, ayrı-ayrı kəndlər bir-birindən əhatə etdikləri ərazilərinin ölçülərinə görə fərqlənirlər. Bəzilərində bir neçə min hektarlıq meşə zolaqları olsa da, bəzilərində isə daha fərqli ölçüdə meşə zolaqları var. Belə rayonlardan biri də Göygöl rayonudur ki, bu rayonun meşə zolaqları olduqca böyük əraziləri əhatə edir və əksər ağac növlərinin varlığına görə də, məhz bu rayonun adı dillər əzbəri olub.



GundemXeber.Az xəbər verir ki, Belə bir göstəriciləri ilə fərqlənən Göygöl rayon Meşə Mühafizəsi və Bərpası Müəsssisəsinə bu gün Vəlyyəddin Baxşəliyev adlı şəxsin rəhbərlik etməsi, əslində bu rayonun meşə zolaqlarında “yaşıl soyqırım”ın əmələ gəlməsinə səbəb olan əsas şərtdir. Çünki redaksiyamıza çatdırılan bəzi məlumatlara görə, adı çəkilən bu şəxs Göygölün meşə təsərrüfatında direktor müavini vəzifəsini daşısa da, o, hal-hazırda meşə təsərrüfatını gəlir mənbəyinə çevirib və kəsilməsi qadağan olunmuş hər cür ağac növlərinin kəsilməsinə şərait yaratmaqla məşğul olur.



Artıq xeyli müddətdir ki, hansısa himayədarlarına arxalanaraq, Göygölün olub-qalan meşə təsərrüfatına qənim kəsilən bu şəxs deyəsən bir kimsədən nə qorxur, nə də ki, çəkinir. Əgər bu belə olmasaydı, o halda rayonun mərkəzi ərazilərində, ayrı-ayrı kənd və qəsəbələrində, digər yaşayış məntəqələrində irili-xırdalı bir neçə taxta sexləri fəaliyyət göstərməzdi. Hələ bunlar harasıdır, əldə etdiyimiz müəyyən məlumatlara görə Vəlyyəddin Baxşəliyev, elə hallar da olur ki, kəsilməsi qadağan olunmuş ağac növlərinin kəsilməsinə şərait yaradır və onların qonşu rayonlara, hətta paytaxt Bakı şəhərinə daşımasını da təşkil edir.



İndi isə bəzi ciddi faktların varlığına diqqət yetirək. Əldə etdiyimiz müəyyən məlumatlara görə, Göygölün Hacıkənd ərazisində 12 dolay var və hər bir dolayda fıstıq, palıd və vələs ağac növləri daha çoxluq təşkil edir. Xeyli müddət bundan öncə bu ərazinin 14 hektarlıq sahəsində “Nəsimi parkı” adı ilə tanınan yaşıllıq zolağı salınsa da, bu gün həmin yaşıllıq zolağından heç bir əsər-əlamət qalmayıb. Buna da əsas səbəb, meşə təsərrüfatı rəhbərliyinin ərazidə məskunlaşmış məcburi köçkünlərə yaratdığı şəraitin varlığıdır. Yəni, məcburi köçkünlərin saxladıqları mal-qara təsərrüfatı “Nəsimi parkı”nın “itbat”a düşməsinə səbəb olub. Bundan əlavə, Göygölün Toğana, Sarısu və Zurabad kənd ərazilərindəki meşə zolaqlarından gün ərzində 6-7 maşın odunun daşındığı və onların yeşik sexlərinə verildiyi söylənilir.



Göygöl rayon Meşə Mühafizəsi və Bərpası Müəsssisəsi idarəsində direktor müavini vəzifəsini daşıyan Vəliyyəddin Baxşəliyev, hər il mövsüm vaxtı başlayarkən ayrı-ayrı şəxslərdən 1000-800 manat “haqq-hesab” alır və onların meşə zolaqlarında mal-qara təsərrüfatı saxlamalarına lazımi şərait də yaradır. Daha düşündürücü halın varlığı isə, direktor müavini vəzifəsini daşıyan bu şəxsin idarədə ştat cədvəli üzrə çalışan işçilərin aldıqları əmək haqlarına göz dikməsi olur. Məsələn, çatdırılan məlumatlara görə idarədə Bayram, Haqverdi və Nadir adlı işçilər var və bu şəxslər “Rəhbərliyin tapşırığıdır” adı altında, hər ay işçilər əməkhaqqı alan zaman onlardan 50 manat pul yığırlar. İlin bayram günlərində də, oxşar addımlarını atırlar. Adicə diqqət yetirmək lazımdır ki, Göygöl MMBM-nin balansında olan təkcə iki dolayda 70 gözətçi var və hər nəfərdən 50 manat pulun alınması külli miqdarda “haqq-hesab” deməkdir.
Bundan başqa, Vəlyyəddin Baxşəliyevin meşə zolaqlarında olan bulaq sularını ayrı-ayrı şəxslərə 500-600 manat pula satdığı da bildirilir. Belə bir halın varlığı da, olduqca təhlikəli məqamın varlığından xəbər verir. Çünki, əgər meşə zolaqlarında hər hansı yanğın hadisəsi baş verərsə, o halda su əldə edib baş verən yanğını söndürmək müşkül məsələ olacaq. Göygöl MMBM idarəsində direktor müavini vəzifəsini daşıyan Vəlyyəddin Baxşəliyevin, bu gün idarədə “ölü canlar” saxladığı da bildirilir. Məsələn, bu şəxsin katibəsinin qızının adı ştat cədvəli üzrə işdə getsə də, həmin xanım heç vaxt idarə üzü tanımadığı vurğulanır.
Meşə təsərrüfatı idarəsində rəhbərliyi həyata keçirən bu şəxsin “bic əməllər”indən biri də, meşə zolaqlarından maşınla odun çıxarılarkən yazılmış biletlərdə tarixin yazılmaması olur. Belə ki, Vəlyyəddin Baxşəliyevin tapşırığı əsasında yazılmış biletlərdə tarix yeri çox zaman boş saxlanılır. Elə ki, polis əməkdaşları daşınan odunların hara, hansı əsasla daşındığını araşdırmaq istəyirlər, o halda idarənin əməkdaşları təsdiq olunmuş biletin tarix yerini xəlvəti yolla yazıb doldururlar. Yəni, elə hallar olur ki, bu şəxslər bir biletlə meşə zolaqlarından 5-6 maşın ağac kəsib çıxara bilirlər. Daha faciləli hallardan biri də, Göygöl MMBM-nin balansında bir neçə nəqliyyat vasitəsi olsa da, onlardan heç biri işlək vəziyyətdə deyil. Buna baxmayaraq, hər ay nəqliyyat vasitələrinə görə dövlətdən yanacaq alınır və alınan yanacağı rəhbərlik şəxsi məqsədləri üçün istifadə edir. Idarəyə aid olan işləri isə, ştat cədvəli üzrə çalışan şəxslər özlərinə məxsus nəqliyyat vasitələri ilə görməyə məcbur olurlar.



Rayonun meşə zolaqlarında 10-dan çox kömür hazırlayan ocaqların olduğu və bunların hər birinin Vəlyyəddin Baxşəliyevə məxsus olduğu bildirilir. Söylənilənlərə görə, gün ərzində hər ocaqda 50-60 ədəd meşoy kömür hazırlanır və hər meşoy kömür yerində 14-15 manatdan satılır. Söylənilənlərə görə, Göygöl MMBM-nə rəhbərlik edən şəxsin bu cür “fironluq” etməsinə, məhz Nazir müavini Mehman müəllim “yaşıl işıq” yandırır və ona “arxa-dayaq” da durur.
Onu da qeyd edək ki, meşə zolaqlarının qorunması, mühafizəsi işinin təşkili hər zaman ölkə rəhbərinin də diqqət mərkəzində olub. Hələ, 2010-cu ili hörmətli prezidentimiz cənab İlham Əliyev “Ekologiya ili” élan etmişdi. Belə bir élanetmədən sonra meşə mühafizəsi və bərpası müəssisələrinə müvafiq tapşırıqlar verildi ki, ətraf mühütün qorunması istiqamətində diqqəti artırın. Çox təəssüflər olsun ki, verilmiş tapşırığa bir müddət əməl olunduqdan sonra, yenə də ümumi vəziyyət acınacaqlı duruma düşdü.
Yada salaq ki, Nazirlər Kabinetində keçirilən məlum müşavirədə möhtərəm Prezidentimiz bir daha bu mövzuya toxundu və birmənalı şəkildə “İstisna hallardan başqa, istənilən halda belə bir addımların atılmasına son qoyulmalıdır, ağac kəsilməsinin qarşısı alınmalıdır” deyə tapşırığını verdi. Təkrar belə bir tapşırıq verilsə də, Göygöldəki mənbəmiz bildirir ki, rayonun meşə təsərrüfatının rəhbəri bu gün də yaşıllıqları məhv etdirib özü üçün var-dövlət qazanır.
Ümumiyyətlə, ətraf mühit və onun problemlərinin varlığı hər zaman diqqət mərkəzimizdə duran məsələlərdən biri olub. Odur ki, Göygölün meşə zolaqlarında baş verən olayları, əmələ gələn fəsadları bundan sonra da diqqət mərkəzində saxlamağa çalışacağıq./xezerpress.az/