Gundemxeber.az bildirir ki, bunu Qaynarinfo-ya açıqlamasında psixoloq Elnur Rüstəmov həyat yoldaşını azyaşlı uşaqlarının gözü önündə öldürən Nizami Rayon Polis İdarəsinin Post Patrul Xidmətinin əməkdaşı İsmayıl Məmmədovun cinayətindən danışarkən deyib.

 

"Qohumlar, doğmalar, qonşular var. Biz nə qədər desək də, onlar anasını öldürən atanın övladlarıdır. Ana öldü, ata da həbs olunacaq. Ona görə də uşaqlar psixoloji dəstək almalıdırlar. Onlar hansı məktəbdə oxuyacaqlarsa, sinif rəhbərliyi və məktəbdə olan psixoloq tərəfindən həssas yanaşma olmalıdır. Çünki bu uşaqlar həssas uşaqlar qrupuna daxildir. Ona görə də həmin uşaqlar mütləq nəzarətə götürülməlidir. Əks təqdirdə bu uşaqlar gələcəyində problemlər yarana bilər”.

 

"Burada elə məsələlər var ki, müxtəlif dövlət və özəl qurumların inteqrasiyası şəklində bu iş həyata keçirilməlidir. Elə məqamlar var ki, ona Ailə Qadın Uşaq Problemləri üzrə Dövlət Komitəsi baxır, yaxud da Daxili İşlər Nazirliyi baxır. Bu kompleks, bir-biri ilə əlaqəli şəkildə aparılmalıdır”. 

"Bu problem, yaxud da narahatlıq evdə baş verib və uşaqlar da onun şahidi olublar. Məntiqlə qadın birdən-birə polis şöbəsinə getməyib. Böyük ehtimalla evdə mübahisə olub və bu problemi də uşaqlar müşahidə ediblər. Nəzərə almaq lazımdır ki, ana polis şöbəsinə uşaqlarla birlikdə gedib. Ana tək də gedə bilərdi. Ancaq bunun səbəbi var. Ananın polis şöbəsinə uşaqlarla getməyinin səbəbi ancaq özünü qorumaq məqsədi daşıyıb. Yəni, mən gəlmişəm polisə, uşaqlarım da yanımda, onlara görə kimsə mənə nəsə edə bilməz”.

Qeyd edək ki, sentyabrın 29-da Nizami Rayon Polis İdarəsinin Post Patrul Xidmətinin əməkdaşı İsmayıl Məmmədov həyat yoldaşını 24-cü Polis Şöbəsində öldürüb. O, həyat yoldaşı Xanım Məmmədovanı xidməti silahı ilə güllələyib. İsmayıl Məmmədov həbs edilib.

Faktla bağlı Baş Prokurorluğun İstintaq İdarəsində Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə cinayət işi başlanıb.