Bəyanada deyilir:

Dünən (28.01.2022) "İşgəncələr Əleyhinə Araşdırmalar Mərkəzi" olaraq Yevlax Rayon Məhkəməsində xüsusi ittiham qaydasında CM 147.2-ci maddəsi ilə ittiham olunan Təhməzov İlham Aslan oğlunun məhkəmə prosesini müşahidə etmək istəsəkdə lakin hakim Ruslan Əlizadə açıq keçirilən məhkəmə prosesində iştirakımıza imkan vermədi. 

Hakimin qanunsuz hərəkəti ilə bağlı Məhkəmə Hüquq Şurasına etdiyimiz şikayət də nəticəsiz qaldı. 

İş üzrə şikayətçi Quliyev Tahir Qurban oğlu tərəfindən Təhməzov İlham Aslan oğluna qarşı CM 147.2-ci maddəsinə əsasən xüsusi ittiham qaydasında irəli sürülmüş iddia tələbi quramadır və əslində işin mahiyyəti, motivi siyasidir. 

Belə ki; 2017-ci ildə "Tərtər cinayətləri" kimi tanınan, qurama cinayət işinin “istintaqı” zamanı ağlasığmaz işgəncələrlə vəhşicəsinə qətlə yetirilmiş, yalançı və qurama şahidlərin ifadələrinə əsasən uzun müddətə barələrində qanunsuz hökmlər çıxarılmış, 1000-lə hərbçinin amansız işgəncələrə məruz qalmasına dair təkzib olunmaz faktların ortaya çıxmasında və həmin faktların, sübutların həm ölkə ictimaiyyətinə, həm də beynəlxalq aləmə çatdırılmasında araşdırmaçı hüquqşunas Təhməzov İlham Aslan oğlunun müstəsna xidməti vardır. 

Məhs həmin təkzib olunmaz faktların ictimailəşməsinə, cəmiyyətin və mötəbər beynəlxalq təşkilatların təpkisinə görə Baş prokurorluq 2017-ci ildə Müdafiə Nazirliyinin və Hərbi prokurorluğun bir qrup yüksək rütbəli generalları tərəfindən törədilmiş o amansız cinayət işinin istintaqını yeniləyərək, yenidən araşdırılmasına dair yeni istintaq qrupu yaratdı və hazırda da davam etdirilir. 

İlham Təhməzovun Yevlax Rayon Məhkəməsinin hakimi Ruslan Əlizadə tərəfindən qurama şikayətlə 5 ay müddətinə azadlıqdan məhrum edilməsinin əsas səbəbi də Baş Prokurorluqda aparılan istintaqın obyektiv araşdırılmasının qarşısının alınmasına yönəlmiş sifarişli addımdır. Bu sifarişi verən dövlət rütbəlilərinin əsas məqsədləri də yaradılmış yeni istintaqa mühüm və mötəbər sübutların təqdim olunmasında əsas fiqurlardan olan İlham Təhməzovun zərərsizləşdirilməsidir. 

İlham Təhməzov ilkin hazırlıq prosesində hakim-Ruslan Əlizadənin etdiyi prosesual pozuntulara etiraz etməsinə baxmayaraq onun vəsatəti təmin olunmamış və o ikinci məhkəmə prosesində də prosesual qanunvericiliyin tələblərini kopudcasına pozaraq qurama “əsaslarla” ittiham olunan İlham Təhməzovu müdafiə hüququndan səmərəli istifadə etməyə imkan verməmişdir. 

Belə ki, İlham Təhməzov ictimayi-siyasi xadimdir və o ictimai-siyasi xarakter daşıyan hadisələrə sərbəst fikir bildirə, ehtimallarını irəli sürə bilər. Azerfreedom YouTube kanalında yayımlanan həmin o məlum verlişdəki çıxışı söz və fikir azadlığına əsaslanır. Digər tərəfdən də İlham Təhməzovun çıxışı Tərtər qətliamı zamanı oğlu amansızcasına öldürülmüş İsmayılov Tehran Sabir oğlunun və işdə olan digər materiallara, ittiham aktına istinadan səsləndirmişdir.

Bu da Azərbaycan Respublikasının Konstitusiyasının 47-ci, Avropa İnsan Hüquqları Konvensiyasının 10-cu, Ümmumdünya İnsan Hüquqları Bəyannaməsinin və Siyasi Hüquqlar Haqqında Beynəlxalq Paktın 19-cu maddələrinin tələblərinə uyğundur. İlham Təhməzovun çıxışını diqqətlə izlədikdə tam aydın olur ki, həmin çıxışda insan ləyaqətini alçaldan və böhtan xarakterli hər hansı bir fikir yoxdur.

 “İşgəncələr Əleyhinə Araşdırmalar Mərkəzi” olaraq hesab edirik ki, İlham Təhməzovun 5 ay müddətinə azadlıqdan məhrum edilməsi siyasi sifarişdir. Məqsəd də Tərtər qətliamının açılmasında mötəbər sübutların daşıyıcısını siyasi yolla proseslərdən təcrid etməkdir. 

Mərkəz olaraq bir daha bəyan edirik ki, ictimi-siyasi xadim, araşdırmaçı hüquqşunas İlham Təhməzovun azadlıqdan məhrum edilməsi siyasi sifarişdir və onun dərhal azad edilməsini tələb edirik.

BundemXeber.Az