Bunu Qaynarinfo-ya açıqlamasında İqtisadi və Sosial İnkişaf Mərkəzinin rəhbəri Rəşad Həsənov Moskvaya qarşı tətbiq edilən dördüncü sanksiyalar paketi fonunda Rusiyanın Ümumdünya Ticarət Təşkilatındakı (ÜTT) "ən əlverişli ölkə” ticarət statusunun ləğvinin bu ölkəyə hansı təsirlərinin ola biləcəyinə aydınlıq gətirərkən deyib. Ekspert bildirib ki, ÜTT istəsə belə, Rusiyanı ən əlverişli ticarət tərəfdaşı statusunda saxlaya bilməz:

"Rusiyaya qarşı tətbiq olunan beynəlxalq sanksiyalar və Moskvanın özünün xarici ticarətdə malların idxal və ixracı ilə bağlı qəbul etdiyi məhdudiyyət qərarları şimal ölkəsinin statusunun itirilməsi deməkdir. Ümumdünya Ticarət Təşkilatı bu fonda hətta istəsə belə, Rusiyanı ən əlverişli ticarət tərəfdaşı statusunda saxlaya bilməz. Ən əlverişli ticarət statusu bir reytinq, qiymətləndirmə əmsalı, ölkələrin gömrük, iqtisadi siyasəti, biznes mühiti, müəyyənləşən hüquqi bazadan asılı olaraq qiymətləndirmədə tutduğu mövqelərdən biridir. Yəni bu qiymətləndirmələrdə biznesin investisiya istiqamətini müəyyən etməsində istifadə olunan indiqatordur".

Rəşad Həsənovun fikrincə, indiki halda ÜTT-nin həmin addımı da təbii prosesdir: 

"Deməli Rusiya qəbul edilən son qərarlar fonunda faktiki olaraq əlverişli ticarət statusunu itirir. Bu o deməkdir ki, hansısa təşəbbüslə çıxış edən xarici investor Rusiyanı ixrac, idxal portnyoru kimi qiymətləndirməyəcək. Nəticədə Rusiya iqtisadiyyatı növbəti mərhələdə daha da zəifləyəcək”.