Hal-hazırda diqqət mərkəzində duran vacib məsələlərdən biri də, paytaxtın Nəsimi rayonunun “3-cü mkr-n Dairəsi” adlanan ərazisindən “3-cü mkr-n Bazarı”na və ona bitişik fəaliyyət göstərən “Kəndli Yarmarkası”na gedən yolda heç bir sərnişindaşınma ilə məşğul olan avtobusun hərəkət etməməsidir. Ona görə də uzun müddətdir ki, belə bir problemin varlığı tam əksəriyyətin müzakirə etdiyi əsas mövzulardan birinə çevrilib. Baxmayaraq ki, həmin yol tam təmirlidir və hər növ nəqliyyat vasitələrinin hərəkət etmələri üçün heç bir problem yoxdur. Belə bir halın varlığına baxmayaraq, “3-cü mkr-n Bazarı”nda və ona bitişik “Kəndli Yarmarkası”nda çalışan satıcılar, həmçinin bu ticarət mərkəzlərindən alış-veriş edənlər bu cür problemin varlığı ilə bağlı hədsiz narazılıqlarını ifadə edirlər. Qeyd edək ki, illər öncə büdcə vəsaitləri hesabına bu ticarət mərkəzlərinin qarşısında dayanacaq quraşdırılıb və hal-hazırda hər iki ticarət mərkəzində daha çox bölgələrdən gətirilən kənd təsərrüfatı məhsullarının satışı həyata keçirilir. Təəssüflər olsun ki, bu gün həmin yolda bir ədəd olsun belə sərnişindaşıma ilə məşğul olan avtobusun hərəkət etməməsi həm satıcıların, həm alıcıların “yaralı yerinə” çevrilib. Bundan əlavə, sərnişindaşınma ilə məşğul olan avtobusun hərəkət etməməsi qiymət artımı ilə bərabər, müştəri azlığına da öz təsirini göstərir. Unutmaq olmaz ki, bu iki ticarət mərkəzində qiymətlər digər ticarət mərkəzlərinə nisbətən daha ucuz olur. Yaşanan belə bir problemin varlığını əsas tutaraq o qənaətə gəlirik ki, Bakı Şəhər İcra Hakimiyyətinin  və Bakı Nəqliyyat Agentliyinin rəhbər şəxsləri qeyd olunan problemin varlığına diqqət yetirib, şəhər sakinlərinin haqlı narazılıqlarını aradan qaldıracaqlar.

O da hər kəsə məlumdur ki, 7 fevral 2022-ci il tarixdə Azərbaycan Respublikasının Prezidenti İlham Əliyev cənabları “Bakı şəhərinin inzibati ərazisində nəqliyyat sahəsində idarəetmənin təkmilləşdirilməsi haqqında” Fərman imzalayıb. Bu  Fərman əsasında Bakı Nəqliyyat Agentliyi publik hüquqi şəxs statusu ilə, Bakı Şəhər İcra Hakimiyyəti başçısının tabeliyinə verilib. Fərmanda Bakı şəhərinin inzibati ərazisində yol hərəkətinin təşkili, ümumi istifadədə olan nəqliyyat vasitələri ilə müntəzəm sərnişindaşıma və taksi minik avtomobilləri ilə sərnişindaşıma sahəsində göstərilən xidmətlərin keyfiyyətinin yüksəldilməsi, habelə bu sahədə idarəetmənin təkmilləşdirilməsi ilə bağlı həyata keçirilən tədbirlərin davam etdirilməsi nəzərdə tutulur.

 Ona görə də ümid edirik ki, ölkə rəhbərinin imzaladığı Fərman əsasında Bakı Şəhər İcra Hakimiyyətinin tabeliyinə verilən Bakı Nəqliyyat Agentliyinin rəhbər şəxsləri, həm bu ticarət mərkəzlərində çalışanların, həm də tam əksəriyyətin haqlı narazılıqlarını nəzərə alıb, “3-cü mkr-n Dairəsi”ndən adları çəkilən ticarət mərkəzlərinin qarşısına gedən yolda sərnişindaşıma ilə məşğul olan avtobusların hərəkət etmələrini təşkil edəcəklər. Onu da qeyd edək ki, belə bir problemin hansı səbəbdən əmələ gəlməsi, yaxud da aradan qaldırılması və s. kimi məsələlərlə bağlı, redaksiyamız tərəfindən Bakı şəhər İcra Hakimiyyətinin başçısı cənab Eldar Əzizova, həmçinin Bakı Nəqliyyat Agentliyinin baş direktoru cənab Vüsal Kərimliyə rəsmi qaydada məktubla müraciət etmişik. İnanırıq ki, hər iki dövlət qurumunun rəhbərliyi problemin aradan qaldırılması yöndə lazımi addımlarını atacaqlar. Mövzu diqqətimizdədir.

Gundemxeber.az