Qarabağ qazilərinin intihar(lar)ı yenə gündəm olub. Jurnalistlər “kefdədir”, yazmağa “ceyran beli”nə çıxmağa gərək yoxdur. Qəribə situasiya yaranıb və elə əvvəl də belə idi . Elə bil çəkişmə gedir :bir yanda ”intihar tərəfi”, o biri yanda “hökumət, dövlət tərəfi”. Müxalifət, jurnalist qurumları da hakim rolunda. Bircə şeyi deyək ki, Sabirabadın Qalağayın kəndindən olan qazi Elnur Cəfərovu intihardan saxlamaq olardı. Elə son çəkilişi aparanın özünün çabası ilə. Necə bir neçə il qabaq qazi- jurnalist Tahir Abbas (“Millətin səsi.info” saytının qurucusu və baş redaktoru) bu sətirlərin yazarına zəng edib, özünü öldürməməyi yalvarmışdı. Yanlış duymadınız, Tahir bəy yalvararaq səbrli olmağa çağırırdı. ..Və ayrı cəbhələrdə döyüşdüyümüz savaş dostum məni ölümdən döndərdi. 

...Özünü öldürmə  (son) həddinə çatdırılmağım isə Nardarandakı bağıma girməyə Sabunçu RİH-in pulyığanı “komunxoz” Həbibin qohumlarından ibarət qoçu dəstəsinin bağda işləyən fəhlələrə və nəzarət edən Qarabağ qazilərinə zor tətbiq etməsi idi. Təsəvvür edin, Qarabağ qazisi öz bağına girməyə icra hakimiyyətinə rüşvət verməlidir! (?) Baş prokurorluqda qəbul edildim və qanuni tədbirlər görüləcəyi bildirildi. Qəbuldan çıxan kimi bağdan zəng edib, “komunxoz” Həbibin gəlib hörgünü uçurduğunu, şillə-təpik atdığını dedilər. İntihar məkanı seçilən Prezident Administrasiyası ilə baş prokurorluğun arası isə bir – iki yüz metr ola, ya olmaya. Hələ də həm Sabunçu prokurorluğu, həm də Baş prokuror yanında korrupsiyaya qarşı mübarizə baş idarəsi izahatımı alsa da, nə qərar verilib, nə də mənə dəyən ortalıq 5 min manatlıq mal -materialın məhv edilməsinə görə dəyən ziyan ödənilib.  Başçı Adil Vəliyev özü “çestinə” sığışdırmasa da, köməkçisi Müslüm bəy zəng edib, işi davam etdirməyi dedi, amma ilkin mal-materialla kömək edilmədi. Beləcə altı ildir evin özülü tökülüb, bir neçə maşın beton məhv edilib  və öz pulumuzla öz bağımda ev tikməyimə imkan verilmir. Arada beş min manatım da Sabunçu RİH-in reketliyinin qurbanı oldu. .

..Qarabağ savaşında olanda kimya doktoru həyat yoldaşımı iki körpə uşaqla AMEA-nın Şərifzadə küçəsindəki yataqxanasından işlər idarəsi çıxarıb. Həmin yataqxananın yerində tikilən evdən də keçmiş işlər müdiri Fətəli Abdullayev və müavini Sərdar Əliyev özlərinə, katibələrinə, sürücülərinə bir neçə çoxotaqlı mənzil götürdü, amma AMEA üzrə yeganə  (1-ci dərəcəli) Qarabağ qazisinə mənzil ayrılmadı. AMEA prezidenti Akif Əlizadənin qəbuluna isə həmin bu işləklər idarəsi qadağa qoydu. Hətta Sərdar Əliyev adlı işlər müdirinin müavini işlədiyim instituta gəlib,  müharibədə olmağımı abırsızcasına şübhə altına aldı və buna görə nə prokurorluq, nə polis, nə də məhkəmə tədbir gördü.   Son çıxış yolu nədir? İntihar çabası. ..

...Ağsu rayonunun Pirhəsənli kəndini mənim dədəm-babam salıb. Kənd üzrə yeganə zabit Qarabağ əliliyəm. Mənə bir pay bələdiyyədən pulsuz,  dövlət torpağından da iki pay torpaq ayrılması qanunun tələbidir. Di gəl, nəinki toplam 3 pay qazi kimi torpaq verilib, əksinə, 22 ildir istifadəmdə olan torpaq sahəsini Ağsu RİH başçısı , Pirhəsənli kənd icra nümayəndəliyi və bələdiyyəsi vəzifə səlahiyyətlərindən sui-istifadə edərək ələ keçirib satıblar. İndi 3 ildir nə prokurorluq, nə polis, nə də məhkəmə şikayətimə baxır. Daha doğrusu, Ağsu icra hakimiyyəti imkan vermir şikayət araşdırılsın.  Təsəvvür edin , mən döyüşlərdə olanda kəndin altındakı samanlıqda gizləndiyi deyilən  (evlərində gecələmirlərmiş ki, tutub “kişi” olmağa apararlar ) gələcəyin məmurları kəndin torpağını da ələ keçirib,  Bakıda da bir neçə mənzil, torpaq sahəsinə yiyələniblər. Bunların tamahları da qaziləri intihara sürükləyən amillərdəndir. 

BŞİH və Nərimanov RİH bütövlükdə Qarabağ qaziləri və şəhid ailələri üçün tikilmiş evi zəbt edib. Bu işğal dövlət səviyyəsində həyata keçirildiyindən hələ də sürür. Zavallı savaş adamları məmurların ayaqları altında qalıb. 

..14-cü ildir Nizami RİH, ƏMDK və Ədliyyə Nazirliyinin Xətai və Nizami icra şöbələri mütəşəkkil cinayətkar dəstə şəklində Xətai məhkəməsinin 2 qətnaməsi ilə mənə verdiyi Bəhruz Nuriyev -10a ünvanındakı otaqları zəbt edib. Bu 13 ildə minlərlə şikayət edilsə də, nə işğalçılar saxta şəhadətnamə ilə ələ keçirdikləri otaqdan çıxır, nə məhkəmə, prokurorluq, polis ,Ədliyyə Nazirliyi , Ombudsman məcburi icra tədbirlərinin həyata keçirilməsini təmin edir. 10 aydır Baş prokuror yanında korrupsiyaya qarşı mübarizə baş idarəsi şikayətimi qeydə alıb, amma heç bir tədbir görməyib. Heç cavab da vermir. Belə bəlli olur ki, Prezident köməkçisi Kərəm Həsənov , Dövlət Statistika Komitəsinin sədri Tahir Budaqov , onların pulyığanları Konstitusiyadan üstündür? Nə qazilərin köməyi ilə halal obyektimizə girişə imkan verilir, nə də “donuz özxoşuna darıdan çıxır”. İntihar xəbərdarlığı da sonuc vermədi.  Neyləyək? Tahir Abbas, döyüş dostum, yol göstər. Bu yol xəbərdarlıq olmayacaq ki, çəkindirən olsun. ..

Məğrur Bədəlsoy