Rauf Daşdəmirovun Abid Qafarovu həbs etməsi Konstitusiyaya tüpürməkdir

Bakı Birlik Təşkilatının sədri Abid Qafarovun 13.07.2022-ci ildə həbs olunacağına ümidli olmağımı ölkədə ən yüksək hüquqi qüvvəyə malik olan qanun – Azərbaycan Respublikasının Konstitusiyası diktə edirdi. Ana Qanunun 125-ci maddəsinin Vll hissəsində doğrulanıb ki, məhkəmə icraatı həqiqətin müəyyən edilməsini təmin etməlidir. Nə yazıq, dünənki məhkəmə sonucu nəinki həqiqəti müəyyən etdi, əksinə, həqiqətə, haqqa, hüquqa hökm oxundu. Abid Qafarov Ana Qanunun 47-ci maddəsi ilə doğrulanan söz və fikir azadlığının qurbanı oldu.

Bəli, bəli, İNSAN İFADƏ ETDİYİ FİKRİNƏ GÖRƏ BİR İL MÜDDƏTİNƏ AZADLIQDAN MƏHRUM EDİLDİ! (?) Bəs hakim niyə Konstitusiyanın 127-ci maddəsinin tələblərinə uyğun olaraq, yalnız tabe olmalı olduğu Konstitusiyaya yox, qıraqdan birbaşa və ya dolayı sifarişə boyun əydi və işə qərəzsiz, ədalətlə, tərəflərin hüquq bərabərliyinə, faktlara əsasən və qanuna müvafiq olaraq baxmadı?

Heç bir suçu olmayan, “suçu” ümumi xarakterli ifadələrlə qaziləri müti olmamağa, intihardan çəkinməyə çağırmaq olan şəxsin azadlığı  hansı vicdanla   bir il əlindən alındı ? Konstitusiya Məhkəməsinin sədrinin hakimləri vicdanlı olmağa çağırmasından heç bir həftə keçə, ya keçməyə. Yoxsa, hakimlər işə çıxanda Azərbaycan Respublikasının Dövlət bayrağı önündə içdikləri andı və vicdanlarını evdə unudurlar? “Məhkəmələr və hakimlər haqqında” Azərbaycan Respublikası Qanununun 95-ci (“Hakimin andı”) maddəsini unutqan hakimlərin yadına salırıq:

“Ədalət mühakiməsini Azərbaycan Respublikasının Konstitusiyasına və qanunlarına tam uyğun olaraq, qərəzsiz, ədalətlə həyata keçirəcəyimə , hakimin müstəqilliyini və ləyaqətini qoruyub saxlayacağıma , yüksək hakim adına hörmət ruhunda davranmağıma and içirəm”.

Bu andı necə içmisiniz ki , Azərbaycan Respublikasının Konstitusiyasına və qanunlarına  tam ZİDD olaraq, QƏRƏZLƏ, ƏDALƏTSİZLİKLƏ, SIFARIŞƏ MÜTİLİKLƏ, LƏYAQƏTSİZCƏSİNƏ , HAKİM ADINA HÖRMƏTSİZLİKLƏ hoqqa-məzhəkə  çıxarır, şou göstərirsiniz !? Özünüz deyin, çıxardığınız hökm həqiqəti ortaya qoydu, yoxsa zorakılığı, gücü? Haqq -məhkum olunan vətəndaşda , hökm , zor hakimiyyətdə .  Əlbəttə, zor haqqı üstələyər. Yeri gəldi -gəlmədi, Şekspirin 66 saylı sonatından misralar ölməzdir və bugünkü durumu açıq ifadə edir:

Şərəf dustaq olub şərəfsizliyə,

Saflıq dərd içində göynəyir, əsir.

Kütlük əqlə gülür, yalan düzlüyə

Gücün qollarına vurulub zəncir.

Azərbaycan Respublikası Cinayət Prosessual qanunvericiliyinin təyinatı da unudulur. Bu unudulmaya hüquqi qiymət verilməsini isə Məhkəmə Hüquq Şurası , baş prokuror, Milli Məclis təmin etməlidir. Azərbaycan Respublikası  Cinayət Prosessual Məcəlləsinin 1.2.2 maddəsində doğrulanıb ki, Azərbaycan Respublikasının Cinayət Prosessual qanunvericiliyi ona yönəlib ki, cinayət törətməkdə təqsiri olmayan heç kəsi cinayət prosesini həyata keçirən orqanların vəzifəli şəxslərinin və ya HAKİMLƏRİN özbaşına hərəkətləri ilə qanunsuz şübhə altına almaq, ittiham və ya məhkum etmək mümkün olmasın. Həm Xəzər rayon məhkəməsinin hakimi Tərlan Əkbərov, həm də Yasamal məhkəməsinin hakimi Rauf Daşdəmirov özbaşınalıqla Abid Qafarovu qanunsuz məhkum ediblər və bu özbaşınalığa görə Cinayət Məcəlləsinin 295-ci maddəsi ilə məsuliyyətə cəlb olunmalıdırlar. Hansı vicdanla insanı sözünə, fikrinə görə məhkum etmək olar? Özü də ən yuxarı həddə? Açıq-aşkar qəsd – qərəz ortadadır. Belə məhkəmə hüquq sistemi ilə hakimlərin məzhəkə- hoqqabazlıq sirk-şousu göstərməsi gerçəkləşər, ədalət mühakiməsi yox.

İyulun 12-də 41-ci ad günü təbriklərini  qəbul edən  Abid Qafarov ertəsi gün -13 iyulda 1 illik həbslə “mükafatlandırıldı”. QƏZAN MÜBARƏKDİR, MƏHƏMMƏD ƏMİN NƏTİCƏSİ!

Məğrur BƏDƏLSOY

P.S. İyulun 14-də Azərbaycanın Milli Qəhrəmanı, general Polad Həşimovun ölümün zirvəsinə - ŞƏHİDLİYƏ UCALDIĞI GÜNDÜR. Şəhid adın mübarək, paşam! Biz ölüm ayağındayıq, ölümün zirvəsinə qalxmağa POLAD RUHUN yardımçımız olsun!