2022-ci ilin noyabrında İndoneziyanın Bali adasında 19 ölkəni və Avropa İttifaqını (Aİ) birləşdirən İyrimilər qrupunun (G20) növbəti görüşü keçiriləcək. Bu görüşdə ABŞ prezidenti ilə yanaşı, Çin və Rusiya liderləri də iştirak edəcək. Sammitdə Rusiyanın Ukraynada hərbi əməliyyatlar aparması və Çinlə Tayvan arasındakı gərginliyin müzakirə ediləcəyi gözlənilir.

Gundemxeber.Az bildirir ki, məsələ ilə bağlı medianews.az-a danışan Orta Doğu Araşdırma Mərkəzinin rəhbəri Sədrəddin Soltan bildirib ki, dünya üçün əhəmiyyətli məsələlər G20-liyin zirvə sammitində müzakirə ediləcək:

“Dünyanın iqtisadi cəhətdən inkişaf etmiş ölkələri G20-də toplaşaraq hər 1-2 ildən bir toplantı keçirirlər. Bu görüşdə G20-liyin üzvləri arasında gərgin müzakirə aparılacaq. Çünki dünyada kifayət qədər mübahisəli məsələlər var. Həmin gərginliyə səbəbkarlar da görüşdə iştirak edəcək. G20-liyin 20 üzvündən 3-ü ABŞ, Rusiya və Çindir. Onlar münaqişələrin başında dururlar”.

Siyasi şərhçi İndoneziyada keçiriləcək görüşün gündəliyində olan mövzuları da açıqlayıb:

“Gündəlikdə dünyada mövcud olan ərzaq böhranı, müxtəlif regionlardakı münaqişəli mövzular və enerji məsələləri müzakirə olunacaq. Görüşdə Rusiya prezidenti Vladimir Putinin iştirakı da gözlənilir. Əgər iştirak etsə, onu güclü şəkildə tənqid edəcəklər. Çünki Rusiyanın Ukraynada başlatdığı müharibə dünyanı böhrana sürükləyir. O da G20-liyin iyulda keçirilən görüşündə iştirak edən Rusiyanın Xarici İşlər naziri Sergey Lavrovla eyni addımı atacaq. Tənqid olunacağını anlayıb sammiti erkən tərk edəcək. Görüşə Ukrayna prezidenti Volodimir Zelenski də qonaq qismində çağırılacaq. Ukraynada gedən savaşın müzakirə mövzusu olacağı artıq bəllidir”.

Sədrəddin Soltan qeyd edib ki, Çinin Tayvana təzyiqi də müzakirə olunacaq:

“Çinin Tayvanı zəbt etmək istəyi də dünya ölkələri tərəfindən xoş qarşılanmır. Ona görə də toplantıda Çinlə geniş müzakirələr aparılacaq. Məsələnin həlli üçün təkliflər edilə bilər”.

O, enerji məsələlərinin də müzakirə olunacağını vurğulayıb:

“Dünyada gedən proseslər enerji ehtiyatlarına da təsir edir. Rusiya-Ukrayna savaşı nəticəsində Avropada qaz böhranı formalaşıb. Rusiyanın Avropaya gedən qazı kəsmə təhdidi qərbi təşvişə salıb. Artıq Avropa ölkələrində qaza olan tələbatı azaltmaq üçün addımlar atılır. Ona görə də İndoneziyadakı görüşdə bu məsələnin gündəmə gətiriləcəyi aydındır. Avropa qaz məsələsini qısa zamanda həll etmək istəyir”.

Analitikin fikrincə, toplantının qərarları dünya siyasətinə çox az təsir edir:

“G20-liyin verdiyi qətnamələr, qərarlar dünya ölkələrinin siyasətinə təsir gücü zəifdir. Onlar bu qurumun verdiyi qərarları əhəmiyyətli hesab etmirlər. G20 yalnızca məşvərətçi rol oynayır. Lakin dövlətlərlə məsləhətləşmələr və ikitərəfli görüşlərin keçirilməsində mühüm rol oynayır. Yenə də məsələlərin dünya ictimaiyyətinə çatdırılmasına çalışması vacibdir”.

Gundemxeber.az