"Pilgrim Education" Fərid Rüstəmzadə və Xanım Camalovanı məhkəmə ilə hədələyir

"Pilgrim Education" xaricə şirkəti hüquq müdafiəçisi Fərid Rüstəmzadə və zərərçəkmiş gənc Xanım Camalovanı xüsusi ittiham qaydasında məhkəməyə verib.
Gundemxeber.az bildirir ki, bu barədə "Arqument.az"a Fərid Rüstəmzadə məlumat verib.
Tələbə Xanım Camalova 2022-ci il 18 iyulda xaricdə təhsillə bağlı sənədləşmə işlərinin görülməsi üçün "Pilgrim Education” (Career Guide MMC) şirkəti ilə xidməti müqavilə imzalayıb.
Müqaviləyə əsasən, şirkətin birinci vəzifəsi Camalovanın sənədlərini toplayıb, Macarıstan təqaüdünə müraciət etmək olub.
Xanım Camalova da müqaviləyə əsasən, şirkətə 650 manat ödəniş edib, amma şirkət onun xaricdə təhsilini təmin etməyib, yəni müsabiqə barədə heç bir məlumat verməyib.


Xanım Camalova

Tələbənin hüquqlarının müdafiə edən Əmək Hüquqlarının Müdafiəsi İnstitutunun həmtəsisçisi Fərid Rüstəmzadə bildirib ki, sonradan işlər müqaviləyə uyğun getməyib, şirkət isə buna görə Elm və Təhsil Nazirliyini günahlandırıb.
Bildirilib ki, nazirliyin elektron sistemi işləmir. Nazirlik bunu təkzib edib və sonradan məlumat olub ki, əsas məsuliyyət şirkətdədir.
Bundan sonra şirkət Xanım Camalovaya ödənişi geri qaytaracağını desə də, buna əməl etməyib.
Rüstəmzadə deyir ki, özünü şirkətin rəhbəri kimi təqdim edən Aişə Aslanova və digər əməkdaşlar tələbəni təhdid edib, qorxudublar.
"Pilgrim Education” martın 11-də yaydığı ümumi açıqlamada isə iddiaları təkzib edib və məsələ ilə bağlı məhkəməyə müraciət ediləcəyi bildirib.
Fərid Rüstəmzadə deyir ki, hazırda da iş Sabunçu Rayon Məhkəməsindədir.
"Mənə və Xanıma qarşı xüsusi ittiham qaydasında açıqlan cinayət işinin hazırlıq iclası üçün 20 aprel səhər 10:30-da Sabunçu Rayon Məhkəməsinə çağırıldıq. Bizim əməllərimizdə hər hansı cinayət tərkibinin olmadığını nəzərə alaraq, hakim Elnurə Rəcəbovanın ədalətli qərar qəbul edəcəyinə ümid edirik", - o deyib.
Hüquq müdafiəçisi şirkətin məhkəməyə müraciətini qərəzli və əsassız sayır: ""Pilgrim Education" və onun təmsilçisi Aisa Aslanovanın qanunsuz əməllərini ictimailəşdirdiyim və vətəndaşların təhsil hüququnu müdafiə etdiyim üçün guya mənə bu yolla təzyiq göstərməyə, məni cəzalandırmağa çalışırlar. Bildiyiniz kimi, şirkət tələbəyə vurduğu bərpa edilməz zərərə görə səhvini qəbul etmək, ən azından tələbənin ödənişini geri qaytarmaq əvəzinə, əvvəl təqsiri Elm və Təhsil Nazirliyinin üzərinə atdı. Həqiqət üzə çıxandan sonra isə tələbəyə gizlicə üzr məktubu yazdırmağa çalışdılar. Bu alınmayanda isə polisdən vətəndaşa qarşı bir təzyiq vasitəsi kimi istifadə etdilər və üzr videosu tələb etdilər".


Fərid Rüstəmzadə

"Aisa Aslanova bu prosesdə gəncə "elə edərəm ki, ölkədən çıxa bilməzsən" deyərək onu məhkəmə ilə hədələyirdi. İndi də bizə təzyiq üçün həmin məhkəmə sistemindən bir alət kimi istifadə edir. Sosial şəbəkələrdə isə şirkətdən narazı olan tələbələrin sayı artmaqdadır. Həmçinin Aisa Aslanovanın mənə qarşı şikayət ərizəsində "müxalifətçi fikirləri ilə tanınan" tipli mənasız ifadələrdən də istifadə etməsi göstərir ki, bu prosesin başladılması həm də mənim ictimai fəaliyyətimə ləkə vurmaq, sosial-iqtisadi hüquqlar və təhsilin inkişafı sahəsində ardıcıl və peşəkar fəaliyyətimə maneə olmaq və fikir azadlığına qarşı təqib niyyəti daşıyır. Bu yolla məni və ya zərərçəkmiş gəncləri qorxuda biləcəklərini düşünürlərsə, onlara qəflət yuxusundan ayılmağı tövsiyə edirəm. Mən yenə həmişəki kimi əmək hüquqlarının müdafiəsi, sosial-iqtisadi rifahın artırılması və təhsil sisteminin inkişafı sahəsində peşəkar fəaliyyətimi həvəslə davam etdirəcəyəm", - Fərid Rüstəmzadə belə deyib.


Xanımdan tələb olunan üzr mətni

"Bu müddətdə iki əlim gəncləri aldatmağa, sındırmağa, ölkədən küsdürməyə çalışan şirkətlər və şəxslərin yaxasında olacaq! Zərərçəkmiş vətəndaş Xanım isə bu məsələdə haqlı olduğunu bilir və qətiyyətli olub oxşar situasiyalarda şirkətlər və şəxslər tərəfindən təhsil hüququ əlindən alınmış, aldadılmış və ümidsizliyə düçar edilmiş bütün gəncliyin səsi olacaq.
Bu vaxta kimi səbrli davrandıq, amma səbrimizdən sui-istifadə etdilər. Biz hələ təzə başlayırıq", - deyə o qeyd edib.

GUNDEMXEBER.AZ