Azərbaycanda araşdırmaçı jurnalistlərin həbsi yerli və beynəlxalq tənqidlərlə səbəb olub.

ABŞ Dövlət Departamenti, Amnesty International, çoxsaylı jurnalist və insan hüquqları təşkilatları Azərbaycan hökumətini Abzas Media internet nəşrinin direktoru Ülvi Həsənlinin, baş redaktor Sevinc Vaqifqızının, həmçinin nəşrlə əməkdaşlıq edən Məhəmməd Kekalovun dərhal azalığa buraxılmasını tələb edən bəyanatlarla çıxış edib.

Azərbaycanın ictimai-siyasi xadimləri də jurnalistlərin həbsini sərt tənqid edib.

Milli Şura: Həbslərin yeni dalğası ölkənin xarici siyasətindəki dəyişikliklə paralel baş verir

“Azərbaycan hakimiyyəti özünün çoxillik repressiya siyasətini yenidən gücləndirib. Bu dəfə hədəfdə Abzas Media və onun rəhbərliyidir”.

Bu barədə Milli Şuranın etiraz bəyanatında deyilir.

Milli Şura bəyan edir ki, Abzas Medianın bir müstəqil media qurumu kimi sıradan çıxarılmasına hesablanan repressiya aktı orada hakimiyyətin yüksək dairələrindəki korrupsiya əməlləri barədə işıqlandırılan araşdırmalardır.

“Xalqın sərvətini getdikcə daha çox acgözlüklə talayan Əliyev rejimi həm də bu talançılıq barədə kimsənin danışmamasını istəyir. İstəyir ki, ölkədə onun nəzarətindən kənarda qalan, yürütdüyü soyğunçu, xalqa zidd siyasəti tənqid və ifşa edən ictimai-siyasi təsisat, fəal şəxslər olmasın. Bu səbəbdən də müstəqil və tənqidçi fəallara, qurumlara qarşı davamlı repressiya tətbiq edir”, sənəddə qeyd edilir.

Milli Şura xatırladır ki, jurnalistlərin həbsinə qədər də ADR Partiyasının sədri, professor Qubad İbadoğlu, iqtisadçı alim və iş adamı, keçmiş deputat Nazim Bəydəmirli, müstəqil siyasətçi Bəxtiyar Hacıyev kimi nüfuzlu şəxslər, öz işçi haqlarını tələb edən kuryerlər və başqaları müxtəlif qurama ittihamlarla həbs olunub.

“Hər zamankı kimi, həbslərin bu, yeni dalğası da Azərbaycan Xalq Cəbhəsi Partiyasından (AXCP) yan keçməyib. Hazırda AXCP -nin siyasi məhbus üzvlərinin sayı yenidən 9 nəfərə çatıb”.

Milli Şura narahatdır ki, həbslərin yeni dalğası ölkənin xarici siyasətindəki dəyişikliklə paralel baş verir.

“Ölkə müxtəlif bəhanələrlə demokratik Qərb dünyasından daha da uzaqlaşdırılaraq, işğalçı və avtoritar Rusiyaya yaxınlaşdırılır. İlham Əliyev hakimiyyəti ordumuzun Qarabağı işğaldan azad edib, oradakı erməni separatizminə son qoymasından sui-istifadə ilə ölkənin geosiyasi yönünü birmənalı şəkildə Rusiyaya tərəf çevirmək, buna paralel olaraq da ölkə daxilində demokratik ictimaiyyəti - azad mətbuatı, müxalifəti, ictimai fəalları tam susdurmaq planı qurub. Hazırda Azərbaycanda azad media və müstəqil jurnalistlər, vətəndaş cəmiyyəti fəalları, müxalifətçilər həddindən artıq çətin və riskli şəraitdə azadlıq və ədalət mübarizəsi aparır. Dünya ictimaiyyəti, beynəlxalq aləm Azərbaycanın demokratik qüvvələrinin hüquq və azadlıqlar uğrunda bu çətin mübarizəsinə daha ciddi dəstək verməli, Azərbaycandakı avtoritar rejimin bütün demokratik institutları məhv edərək ölkədə tam bir totalitar idarəetmə yaratmasına seyrçi qalmamalıdır”, Milli Şuranın bəyanatında deyilir.

İlqar Məmmədov: Azərbaycan hökuməti “araşdırmaçı jurnalistika” deyilən şeyə inanmır

Respublikaçı Alternativ - REAL Partiyasının Siyasi Komitəsinin sədri İlqar Məmmədov bildirib ki, Azərbaycan hökuməti “araşdırmaçı jurnalistika” deyilən şeyə inanmır.

“[Hökumət] hesab edir ki, hər kəsə bəlli olan şeyləri kimsə faktlar iddiası ilə birlikdə gündəmə gətirəndə bunu kimsə hakimiyyət daxilindən məqsədli şəkildə sızdırıb. Hökumətin bu əminliyi söz azadlığına zərbə vuran ən ciddi amillərdən biridir, özü də çoxdan. Amma zərbənin gücü heç də bu neyron impulsundan deyil, şişmiş korrupsiya əzələsindən irəli gəlir. Bu korrupsiya əzələsi olmasa onun gücünü heç bir qara güman hərəkətə gətirə bilməz”, REAL sədri jurnalistlərin həbsi ilə bağlı şərhində qeyd edib.

Məmmədov hesab edir ki, Absaz Mediada işləyən üç jurnalistin dünənki həbsi yuxarıda qeyd etdiyi sxemə tam oturan hadisədir.

“Korrupsiyanı yığışdırsaq, siyasi sahəni seçki və sərbəst müzakirələrə açsaq, hökumətin bu cür qara gümanları da təsir gücünü itirər. Hələlik isə, həbslərin ölkəmizin daxili və xarici maraqlarına vurduğu zərəri ölçüb, nə edə biləcəyimizi götür-qoy etməyə məcburuq. Həbslərə qarşı deyilməyən söz qalmadı, yeni nə deyəcəksən ki? Avropa Məhkəməsinin təklif etdiyi müdafiələr də illər aparır və praktiki mənasını itirib. Bu jurnalistlərin isə haqqı dərhal azadlıqdır”, o qeyd edib.

Əli Kərimli: Rejim Qarabağın azad edilməsini xalqın müqavimətini qırmaq, xalqı tamamilə ram etmək fürsətinə çevirməyə çalışır

AXCP sədri Əli Kərimli bildirib ki, indi Azərbaycan tarixinin ən çətin zamanlarından birini yaşayır.

“Rejim Qarabağın azad edilməsini xalqın müqavimətini qırmaq, xalqı tamamilə ram etmək fürsətinə çevirməyə çalışır. Onun korrupsiya və rüşvətini ifşa edənlərdən, ölkəni yaxşıya doğru dəyişmək istəyənlərdən qisas alır. Rejimin qarşısında dik duruşunu qoruyub saxlayanların sırası təəssüf ki, seyrəlir”.

Kərimli hesab edir ki, xalq haqqın bu dərəcədə nazilməsinə icazə verməməli, üzülməməsi üçün “haqq davası aparanlara dəstəyini artırmalıdır”.

Anar Məmmədli: Müstəqil jurnalistləri həbs edirlər ki, oğru əməllərini ifşa edən olmasın

Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli bildirib ki, ölkənin sərvətlərini “oğurlayıb-taladıqları kimi tənqidçi kəsimin də ömründən oğurlayırlar”.

“Müstəqil jurnalistləri ona görə həbs edirlər ki, oğru əməllərini ifşa edən olmasın. Bu gün ifadə azadlığından istifadə etdiyi üçün həbs edilən Ülvi Həsənli və Sevinc Vaqifqızını tarix korrupsiyaya qarşı mübarizə qurbanları kimi xatırlayacaq. Onların həbsinə sifariş verənlər isə oğru və talançı siyasi rejimin təmsilçiləri kimi xatırlanacaq”, hüquq müdafiəçisi facebook səhifəsində qeyd edib.

Ələsgər Məmmədli: Media azadlığı dövlətin demokratiya barometridir

Media hüquqları üzrə hüquqşünas Ələsgər Məmmədli bildirib ki, media azadlığının, ifadə azadlığının vəziyyəti bir toplumun və dövlətin demokratiya barometridir.

“Həqiqəti yazmaq, gerçəkləri araşdırmaq, qaranlıqlara işıq tutmaq jurnalistin peşə borcudur. Bütün mərhumiyyətlərə baxmayaraq öz peşəsinə sədaqətlə xidmət edənlərin təqib edilməsi, hüquq adı altında komediyalar yaradılaraq təməl hüquqların məhdudlaşdırılması yolverilməzdir”, o qedy edib.

Hüquqşünas facebook səhifəsində yazıb ki, Sevinc Vaqifqızının bu gecə “terroristlərə rəva görülməyən bir biçimdə təyyarədən birbaşa polis idarəsinə aparılması normal toplum tərəfindən qəbuledilməz davranışdır və hüquqa qarşı ən böyük sayğısızlıqdır”.

“Jurnalist tərifləri yox, cəmiyyəti narahat edən, onun inkişafına mane olan, onu düşündürən, inkişaf etdirən məsələlərdən yazanda jurnalist olur. Yaşadığımız toplumda korrupsiya olmasa hazırda 7 rayonun icra hakimiyyətinin başçısı, keçmiş nazir, məsul vəzifəli şəxslərin heç biri məhkəmə qaydasında suçlu bulunaraq həbsdə olmazdı. Korrupsiya olmasa "Korrupsiyaya qarşı mübarizə haqqında" Qanun, Korrupsiyaya qarşı mübarizə üzrə komissiya, Korrupsiyaya qarşı Mübarizə Baş İdarəsi, yüzlərlə ştat yaradılmazdı. Korrupsiya olmasa Azərbaycan Prezidentinin 4 aprel 2022-ci ildə imzaladığı Sərəncamla Korrupsiyaya qarşı mübarizənin gücləndirilməsinə dair 2022─2026-cı illər üçün Milli Fəaliyyət Planı təsdiq edilməz, Nazirlər Kabinetinin “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”nın təsdiq edilməsi haqqında” Azərbaycan Respublikası Prezidentinin 2022-ci il 4 aprel tarixli 3199 nömrəli Sərəncamının icrasının təmin edilməsi barədə Sərəncamı imzalanmazdı. Sevinc xanım məhz bu sənədlərdə təsbit edilən problemlərə hüquq mühafizə orqanlarının daha sürətli çıxışına dəstək verən, korrupsiya ehtimalı olan məsələləri araşdıran jurnalistlərdəndir.

Onun sərbəst fəaliyyətinə dəstək olmaq lazımdır, onu məhdudlaşdırmaq yox!” o qeyd edib.

Qeyd edək ki, bu günlərdə Azərbaycanın hökumətyönümlü mətbuatında və digər kütləvi informasiya vasitələrində həbs olunan jurnalistlər, yerli vətəndaş cəmiyyəti təşəbbüsləri, müxtəlif Qərb institutları və ABŞ-ın ünvanına tənqidlər yer alıb.