"Osmanqızı" kanalından edilən cavabsız zəng. 

İndi heç bir mübahisəsiz aydın olur ki, AXCP - nin qəfil prezident seçkisini boykot qərarı doğru imiş. Azərbaycan cəmiyyətinin bu seçkiyə münasibəti onu göstərir ki, əslində müxalifətin boykot qərarı bütövlükdə cəmiyyətin ovqatını, saxta seçki məsələsinə inamsızlığını əks etdirir.

Ölkədə seçki üçün minimum şərtlərin olmadığı bir şəraitdə müxalifətin seçkiyə qatılıb nəsə edə biləcəyi  üzərində qurulan təbliğatın nə qədər yanlış və siyasi reallıqdan uzaq olduğu indi daha aydın görünməkdədir. AXCP-ni seçkiyə qatılmadığı üçün "top atəşi"nə tutanlar, buna görə ona qarşı gecə gündüz təbliğat aparanlar özləri seçkiyə qatılmaq qərarı versələr də, bu gün ortaya  cəmiyyətətə təqdim edə biləcəkləri  hər hansı bir nəticə qoya bilmirlər. 

Seçkidə iştirak etmək istəyənləri heç "oyun meydanças"ına  buraxmadılar, onları "namizəd yerinə belə qoymadılar". İndi buyursunlar  bu iştirak qərarının seçkini boykot qərarından daha effektli və təsirli olduğunu göstərsinlər. Göstərə bilirlərmi, əsla yox. Əgər ortada nəticə yoxdursa, o zaman AXCP-yə qarşı apardıqları təbliğatın yanlış olduğunu da çıxıb  etiraf etmək daha kübar bir hərəkət olmazmı? 

Ötən gün sonradan bildim ki, hörmətli Sevinc xanım efirdən adımı çəkərək mənə birbaşa  zəng edib və seçkiyə qədər dəfələrlə inqilab edəcəyini deyən, sonradan hara qeyb olduğu bilinməyən "mühacir hökumət" yaradan hörmətli Tural bəylə məni debata çıxarmaq istəyib. 

Sonradan verlişə baxdım və gözlədim ki, Tural bəy AXCP-yə hücum etməzdən öncə cəmiyyətə deyəcək ki, bəs onun  mühacir hökumətlə bağlı xalqa  verdiyi vədlər nə oldu, niyə "hakimiyyətə gəlməmiş" belə tez dağıldılar? Axı belə "evcik- evcik" hökumət oyunları ilə xalqın inamını qazanmaq olmaz. Və ya onun mitinq çağırışı ilə meydana bir neçə nəfər çıxarsa, o, bu "qüvvə" ilə seçkiyə qədər verdiyi inqilab vədini necə həyata keçirəcək? Bəs dediyi o inqilabi qüvvələr harda qaldı, nəyi gözləyir? Axı onun efirindən  Beydulla Manaf da bir qədər irəli gedib deyirdi ki, bu qüvvələrlə polis idarələrinə basqın edib silahlanmaq, qan tökmək lazımdır. Nə oldu bu işlərin axırı? Cavab gözləyirik. 

  Bir vaxtlar aramızda çox yaxşı münasibətlər olan Tural bəy xeyli vaxtdır ki öz efirindən  müxalifəti fəaliyyətsizlikdə qınayıb, öz mühacir hökuməti ilə inqilab edəcəyi vədini  verirdi xalqa. Öncə gərək buyurub bizdən daha yaxşı ortaya qoyduğu nəticələri göstərsin ki, sonra bizi tənqid etmək haqqını da qazansın. O nəticələr niyə yoxdur, bəs bizim bacarmadığımızı niyə bacarmadılar? Ümid edirəm ki, hörumətli Sevinc xanım növbəti  efirində bu məsələlərə aydınlıq gətirəcək və inqilab gözləntisində olanların intizarına son qoyacaq.

İndi də bizə deyilir ki, nədən AXCP bu saxta seçki prosesinə qarşı etiraz aksiyaları təşkil etmir? Fikir verin, dünənə qədər seçkidə niyə iştirak etmirsiniz deyənlər, indi də niyə bu saxta seçkiyə etiraz etmirsiniz deyirlər. 

Bunu deyənlər yutub üzərindən 10 minlərlə insana çağrış etdilər, nəticə nə oldu bunu qiymətləndirməyi onların öz üzərinə buraxırıq. Sadəcə onu deyək ki, ötən gün keçirilən bu etiraz aksiyasına qatılanların sayı bizim haqlı olduğumuzu bir daha təsdiq etdi. Cəmiyyət heç bir önəm vermədiyi, gözləntisi olmadığı və boykot etdiyi saxta seçkiyə qatılmaq istəmədiyi kimi, ona etiraz üçün də meydana çıxmağa da istəkli deyil. Biz bunu deyəndə əksini idda edənlər buyurub indi reallığı auditoriya qarşısında etiraf etsinlər. 

Bu həm də onu göstərdi ki, bəziləri dinləyici, auditoriya sayına baxıb özləri üçün çox uzağa gedən nəticələr çıxarmaqda tələsiblər. İzləyici sayı hələ tərəfdar, aktiv iştirakçı demək deyil. İndiki çətin repressiya şəraitində insanlar az da olsa o zaman meydana çıxırlar ki, bu çağırışı edənləri mövcud hakimiyyətə qarşı siyasi alternativ kimi qəbul edib ona inansınlar, etimad bəsləsinlər. İnsanlar hər eşitdikləri çağırışa görə meydana çıxsaydılar daha nə vardı ki. Əgər sən çağrışınla 30-40 adamı meydana çıxara bilmirsənsə, o halda hansı məntiq və niyyətlə bu çətin repressiya şəraitində duruş gətirən və dəfələrlə meydana çıxmış və lazım gələndə yenə də meydanda olacaq qüvvəni hədəf alırsan? Ortaya daha yaxşı bir nəticə qoymamış, ortada olanı sıradan çıxarmaq istəyinin bir izahı varmı? 

Və xüsusi olaraq vurğulanır ki, sanki bir neçə nəfərin iştirakı ilə keçirilən etiraz aksiyası bu saxta seçki prosesinə etirazı göstərmək üçün mütləq lazım imiş. Əvvəla cəmiyyətin müxalifətlə birlikdə bu seçkini boykot etməsi elə etirazın bir formasıdır. Bunu etiraf etmək lazımdır.

Digər tərəfdən də müxalifət ona görə boykot qərarı verib ki, digər azadlıqlar kimi bu seçki dönəmində sərbəst toplaşmaq azadlığı yoxdur. Belə bir şəraitdə təcrübə onu göstərir ki, yalnız azsaylı fədakar müxalifət fəalları hesabına keçirilən razılaşdırılmamış aksiyalar nə ictimai rəyə, nə də ki, hakimiyyətin mövqeyinə təsir göstərmək iqtidarında deyil. Biz bunu dəfələrlə təcrübədə görmüşük. 

Beynəlxalq reaksiyalar da onu göstərir ki, ölkədə keçiriləcək seçkilərə münasibət kifayət qədər mənfi olacaq. Bunu Avropa Parlamentinin və Avropa Şurasının son qərarları da göstərdi. Ona görə də  bu seçkinin saxtalığını dünyaya sübut etmək üçün  azsaylı etiraz  aksiyaları keçirilməsi o qədər də vacib deyil. Rusiyada bu cür aksiyalar olmadan, hətta 6 ay öncə Avropa Parlamenti seçkini qeyri legitim elan edib. Müxalifətin nə zaman aksiya keçirəcəyinə gəldikdə isə əvvəllər çoxsaylı bu cür qərarlar vermiş AXCP qarşıdakı mərhələdə siyasi şərtlərə görə bu məsələni də  dəyərləndirərək gərəkən addımları atacaq. Daha yaxşısını etməyi bacaran varsa meydan mübarizə aparmaq istəyən hər kəsə açıqdır. 

Fuad Qəhrəmanlı