Norveç Helsinki Komitəsi (NHC) Azərbaycanda həbs edilmiş səkkiz qadın jurnalistin 8 Mart Beynəlxalq Qadınlar Günü ərəfəsində humanitar əsaslarla şərti azadlığa buraxılmasına çağırıb.

Komitə fevralın 18-də yaydığı çağırışda qeyd edir ki, hökumət qadın jurnalistlərə saxta ittihamları tamamilə ləğv etməkdən imtina etsə də, uzunmüddətli həbsin təkcə həddindən artıq deyil, həm də “qeyri-insani və vicdansız dərəcədə qəddar” olduğunu qəbul etməlidir.
“Görünür, Azərbaycan hökuməti heç bir tənqidə və etiraza yer olmadığı və yeganə mümkün cavabın həbs və ya təqib olduğu paralel reallıqda yaşamaq üçün şüurlu qərar verib”, NHC qeyd edib və ölkədəki son insan haqları böhranının “ön cəbhəsində dayanan” qadın jurnalistlərin ağır bədəl ödədiyini əlavə edib.
2023-cü ilin sonlarından başlayaraq “Abzas Media”, “Toplum TV” və “Meydan TV” əməkdaşlarına qarşı təzyiqləri vurğulayan Komitə həbs edilən qadın jurnalistlər – Sevinc Vaqifqızı, Nərgiz Absalamova, Elnarə Qasımova, Aynur Elgünəş, Aytac Əhmədova, Aysel Umudova, Xəyalə Ağayeva və Şahnaz Bəylərqızının işlərinə diqqət çəkib.

Bəyanatda onların bəzilərinin səhhətində ağır problemlərin və ya himayələrində azyaşlı uşaqların olduğu, qeyri-adekvat tibbi xidmət və təhlükəli həbsxana şəraitinin onların həyatlarını və himayələrində olan şəxslərin rifahını riskə atdığı vurğulanır.

NHC qeyd edir ki, məhkəməyəqədər həbs son tədbir olmalıdır, ancaq Azərbaycan hakimiyyəti bu qadınların həbsdə saxlanması ilə bağlı heç bir etibarlı əsas təqdim etməyib.

“Azərbaycan məhkəmələri siyasi motivli işlərdə həbsdən alternativ cəza tədbirlərinə nadir hallarda əl atır. Halbuki, bu səkkiz jurnalist cəmiyyət üçün heç bir təhlükə yaratmır və ev dustaqlığı kimi alternativ tədbirlər tətbiq oluna bilər”, bəyanatda bildirilir.

Bundan əlavə, təşkilat azərbaycanlı rəsmilərin qadına verilən dəyərlə bağlı çıxışları xatırladaraq, qadın jurnalistin həbslərinin bu narrativlə ziddiyət təşkil etdiyini qeyd edib.

“Qürurla qadına dəyər verdiyini iddia edən bir ölkədə 8 tənqidçi qadının cəzalandırılmasının ironiyası sözlə əməl arasında ziddiyyət təşkil edir”, bəyanatda deyilir.

Təşkilat sonda qeyd edib ki, qadın jurnalistlərin azadlığa buraxılması yalnız humanitar addım deyil, həm də cəmiyyətdə siyasi gərginliyi azaltmağa xidmət edəcək konstruktiv qərar ola bilər.
“Beynəlxalq Qadınlar Gününün mahiyyətinə uyğun olaraq, Azərbaycan hökuməti ədaləti təmin etməli və bu jurnalistlərin azad edilməsinə nail olmalıdır” Norveç Helsinki Komitəsi bildirib.

Azərbaycanda jurnalistlərə və fəallara qarşı 2023-cü ilin sonlarından başlayan təqiblərin dayandırılmasına dair çoxsaylı çağırışlara baxmayaraq, azərbaycanlı rəsmilər fikir və mətbuat azadlığının hədəf alınması, jurnalistlərin əsassız həbsi ilə bağlı ittihamları rədd edir və ölkədə fundamental hüquq və azadlıqların, eləcə də media azadlığının “tam olaraq” təmin edildiyini vurğulayır.
Rəsmi Bakı hökumət tənqidçilərinə qarşı cinayət işlərinin siyasi motivli olmasına dair ittihamların “kökündən yanlış və qəbuledilməz” olduğunu, bu cür çağırışların məhkəmə sisteminə müdaxilə olduğunu vurğulayır.
Ancaq yerli hüquq müdafiə təşkilatlarına əsasən, Azərbaycanda hazırda 350-dən artıq siyasi məhbus var.
Azərbaycan Sərhədsiz Reportyorların 2024-cü il Qlobal Mətbuat Azadlığı İndeksində media azadlığı sahəsində 180 ölkə arasında 164-cü yerdə qərar tutub

Gundemxeber.az