Azərbaycan hökumətinin tənqidçisi, bloger Arzu Sayadoğluna martın 3-ü Gəncə Ağır Cinayətlər Məhkəməsində 7 il hökm oxunub.

Sayadoğlu Cinayət Məcəlləsinin 182.2.4-cü (hədə-qorxu ilə tələb etmə, xeyli miqdarda əmlak əldə etmək məqsədi ilə törədildikdə) maddəsi ilə ittiham olunub. Cinayət işində iddia olunur ki, o, Tovuz Mədəniyyət Mərkəzinin tabeliyindəki işçilərin zorla iməciliyə cəlb olunması haqda video çəkib və görüntüləri sosial mediada yaymamaq üçün mərkəzin direktoru Asif Qasımovdan 6 min manat istəyib. Qasımov pulu vermədikdə isə Sayadoğlu videonu ictimailəşdirib.

Bloger məhkəmədə özünü günahsız hesab etdiyini və siyasi sifarişlə həbs olunduğunu bildirib.

YouTube-da “Arzu Sayadoğlu” adlı kanalın rəhbəri və aparıcısı olan Sayadoğlu bu kanalda ölkədəki siyasi vəziyyəti, məmur özbaşınalığı barədə davamlı olaraq sərt tənqidi fikirlər söyləyib. O, həmçinin “Xalqa Xidmət Hərəkatı” yaratdığını elan edib.

Sayadoğlu sonuncu dəfə “Azad Söz” kanalında qonaq kimi çıxış edib və xalqı dinc etirazlara səsləyib. O, 2024-cü il yanvarın 16-da saxlanılıb, iki gün sonra isə haqqında həbs qətimkan tədbiri seçilib. Sayadoğlunun işi üzrə istintaqı Dövlət Təhlükəsizlik Xidməti aparıb.
Azərbaycanda 2023-cü ilin sonralarından başlayaraq 20-dən çox jurnalist və media əməkdaşı həbs edilib. Jurnalistləri Müdafiə Komitəsinin (CPJ) 2024-cü il üzrə hesabatında Azərbaycan jurnalistlərin ən çox həbs edildiyi ölkələr sırasında yer alıb.

Azərbaycan hökuməti jurnalistlərin konkret cinayət əməllərinə dair şübhələr əsasında həbs edildiyini bildirsə də, insan hüquqları təşkilatları, o cümlədən CPJ hökumətə tənqidi mövqeyi ilə seçilən müstəqil media orqanlarının hədəf alınmasını siyasi motivli, jurnalistlərə qarşı ittihamları qondarma hesab edir.

Rəsmi Bakı daha əvvəl bir neçə dəfə jurnalistlərə və fəallara qarşı cinayət işlərinin siyasi motivli olduğuna dair fikirlərin “kökündən yanlış və qəbuledilməz” olduğunu bəyan edib. Ancaq yerli hüquq müdafiə təşkilatları Azərbaycanda hazırda 350-dən çox siyasi məhbusun olduğunu qeyd edirlər./amerikaninsesi.org/