Naxçıvanda müalicədə olan qaziyə Bakıda “sosial məhkəmə” qurulub

On gündən çoxdur Naxçıvanda “Duzdağ” fizioterapiya mərkəzində müalicədəyəm. Bakıda isə pensiyamın “qol-qabırğası”nı pensiya təminatı orqanı “qırıq-qırıq edib”.

Artıq 29 aydır ƏƏSMN tabeliyində DSMF-in Xüsusi Şərtlərlə Təyinat üzrə Mərkəzi Filialının (XŞTMF) məhkəməyə müraciət etdiyimə görə məhkəmə qərarı ilə pensiyama əlavə olunan 110 manatın verilməsini dayandırmasına və qəsd-qərəzlə bərpa etməməsinə məhkəmənin qiymət verməkdən imtinası Konstitusiyadan da üstün qüvvəsini alıb. Qərarı çıxaran 1 BİİM-in varisi Bakı İnzibati Məhkəməsi nəinki məhkəmə qərarının icrasını təmin edir, tələbkar ərizə vermədikdə belə xidməti vəzifəsinə görə İCRA HAQQINDA QƏRARDAD çıxarır, əksinə tələbkar kimi verdiyim ərizələrin qəbulundan sərgiləyici şəkildə imtina edir. (?)

Məhkəmə qərarının icrasına 2 il inzibati yolla nail ola bilmədiyimdən qərarı çıxaran Bakı İnzibati Məhkəməsinə 9 ay qabaq “məhkəmə qərarının icrasının özbaşına dayandırılmasından dəyən ziyanın ödənilməsinə” iddia verdim. Hakim Aygün Əhədova iclasın yataqda olduğumdan videokonfrans əlaqə sistemi vasitəsilə keçirilməsi, dövlət hesabına vəkillə təminat barədə vəsatətlərimə baxmadan, özü də hüquqi yardımdan imtina edərək, iddianı mümkün saymadı ki, icra icraatı qaydasında ərizə verməklə məqsədə daha tez çatmaq olar. Tələbkar kimi borclu XŞTMF-nin 28 aydır özbaşına dayandırdığı qərarın icrasına məcbur edilməsinə ərizə verdim. Bu yol 7 ildir oxşar məhkəmə qərarının icrasına saxtalıqla qadağa qoyan hakim Aygün Abdullayevanın növbəti cinayətkar saxtalığı ilə üzləşdim. Qocaman saxtalıq, qərəz hakimi etirazıma baxmadan  tələbkarın ərizəsini saxtalaşdırıb, “iddianı” mümkün saymadı ki, icra icraatı qaydasında məqsədə daha tez çatmaq olar. (?)

Naxçıvanlılar demiş, ə bə biz nə qaydasında ərizə vermişik, hı?

Apellyasiya şikayətim Bakı Apellyasiya Məhkəməsində Elvin Əliyevin sədri olduğu 4 nəfərlik heyətə veriləndə qərəzlərinə şübhə olmayan  Cahangir Yusifov, Aytən Oruczadə, Günel Abbasova üçlüyünə etiraz(lar)ımı kabinetdən təqdim etdim. Baxılmadı, bircə Cahangir Yusifov uzaqlaşdırıldı. Bu üçlüyün 2 ildir 1-ci dərəcəli Qarabağ qazisi ilə qərəz davası aparması xəstəxanada yatdığımı bildirməyimə baxmayaraq nə iclası ertələməməsindən, nə də dövlət hesabına vəkillə təmin etməməsindən, hətta kassasiya şikayəti verməyə belə vəkildən imtinasından bəlli edir. Ünlü filmdə deyildiyi kimi, yenə həmin dalğa, həmin koordinat. Eyni heyət bu yol Naxçıvanda müalicədə olanda və bu barədə kabinetdən məhkəməyə bildirməyimə baxmayaraq nə vəkillə təminatıma, nə iclasın videokonfrans əlaqə sistemi vasitəsilə keçirilməsi vəsatətimə baxıb, nə şikayətimin dəlillərinə. Amma borclu XŞTMF yenə də, 2 il qabaq olduğu kimi, prosessual hüquq fəaliyyəti qabiliyyəti olmayan ƏƏSMN-in DSMF-də yaratdığı MƏHKƏMƏ FİLİALI-39 SAYLI VƏKİL BÜROSU ilə təmsil olunub. Yeni DSMF sədrinin toplam 43 vəkil-məmura verdiyi 2 etibarnamənin “əsli ilə düzlüyünü” yenə də “dəftərxana sənədləri” təsdiqləyib. Tərəflərin hüquq bərabərliyinə baxın, mən tək kontrabasda Konstitusiya ilə, qarşı tərəf birində 23, o birində 20 vəkil- məmurun saxta etibarnaməsi ilə antikonstitusion korrupsiya xorunda. Hələ üstəlik BİM-in , BAM-ın, Ali Məhkəmənin, Konstitusiya Məhkəməsinin (KM Aparatı 1,5 ildir 3 şikayətimə baxmır, “itirib”), Ombudsman Aparatının ( 2 il qabaq xəstəxanadan məhkəməyə qatılmamağımı suç sayan aparat rəhbəri, indi hakimlərin özbaşınalıqda müstəqil olduğunu, məhkəmə qərarlarının icrasına qadağa qoymaq “hüququnun” Konstitusiyaya uyğunluğunu bildirməkdən doymur) korrupsiya xoruna qatqısı. Gəl bu xorun səsindən kontrabasın səsini eşitdir görüm, necə eşitdirirsən.

Bakı Apellyasiya Məhkəməsinin sədri Elvin Əliyev olan heyəti apellyasiya şikayətimin dəlillərindən başqa qərardadında nə gəldi yazıb. Yenə də məhkəmə qərarının icrasını tələb etməyin mümkün olmadığı həmkarlığı qüvvəyə minib. Qalır kassasiya şikayəti vermək üçün vəkil ayrılması, ona da bu heyət 2 ildir qadağa qoyub ki, tərəflərin hüquq bərabərliyi pozulacaq. (?). Heyət qərardadını yenə də “icra icraatı qaydasında məqsədə daha tez çatmaqla” “əsaslandırıb.”

“Ə bə biz nə qaydasında ərizə vermişik, hı?”

Məğrur Bədəlsoy, Naxçıvan