Dələduzluq qadının müdhiş planları və 7 il həbs cəzası
Zərərçəkmiş: "Mehparə Kazımova pulu Daxili İşlər Nazirliyində işləyən yüksək vəzifəli şəxsə verəcəyini dedi"

Özünü Daxili İşlər Nazirliyində çalışan yüksək vəzifəli şəxsin adamı kimi qələmə verməklə Bakı şəhər sakininin külli miqdarda pulunu mənimsəyən Mehparə Kazımovanın cinayət işi üzrə məhkəmə prosesi başa çatıb.
İttihama görə, Mehparə Kazımova Bakı şəhər sakini Bahar Abbasovanın qardaşı Əfqan Abbasovu Daxili İşlər Nazirliyinə işə düzəldəcəyini vəd edərək ondan 30 min manat alıb. O, vədinə əməl etməyib və Bahar Abbasovanın pulunu dələduzluq yolu ilə ələ keçirib.
Törətdiyi cinayət əməlinə görə Mehparə Kazımovaya qarşı Cinayət Məcəlləsinin 178.2.4-cü (dələduzluq) maddəsi ilə ittiham irəli sürülüb. İstintaq orqanı onun barəsində polisin nəzarəti altına vermə qətimkan tədbiri seçib.
Cinayət işi baxılması üçün Bakı Ağır Cinayətlər Məhkəməsinə göndərilib. İş hakim Cavid Hüseynovun sədrliyi ilə keçirilən prosesdə araşdırılıb.
Məhkəmədə təqsirləndirilən şəxs qismində dindirilən Mehparə Kazımova ifadəsində Bahar Abbasovanı və qardaşı Əfqanı qəsəbə sakini kimi tanıdığını, Əfqanın taksi sürücüsü işlədiyini, onun idarə etdiyi avtomaşınla bir neçə dəfə Bakı şəhərinə gedib-gəldiyini göstərib.
Təqsirləndirilən şəxsin sözlərinə görə, 2013-cü ilin yay aylarında növbəti dəfə Əfqanın maşını ilə Mərdəkan qəsəbəsinə gedərkən Bahar da maşında olub: "Yolboyu telefonda kimisə işə düzəltməklə bağlı “işgüzar” söhbəti etdim. Buda Bahar Abbasovanın diqqətini çəkdi. Bahar Abbasova məndən qardaşı Əfqanı da işə düzəltməyimi xahiş etdi. Bahara yalandan dedim ki, Daxili İşlər Nazirliyində tanışım var, Əfqanı ora 4 min manat müqabilində sürücü düzəldə bilərəm. Əslində isə Əfqanı işə düzəltmək fikrim olmayıb. Ondan aldığım pulu öz ehtiyaclarıma xərcləmək niyyətində idim”.
Mehparə Kazımovanın ifadəsinə görə, ertəsi gün Bahar onunla əlaqə saxlayıb. Qardaşının tez­ bir zamanda işə düzələcəyinə ümid edən qadın həmin məbləği ona verib.
Mehparə Kazımova müəyyən sənədlərin hazırlanması üçün vaxt lazım olduğunu deyib: “Həmin vaxtlar maddi vəziyyətim yaxşı deyildi. Baharı mütəmadi aldadıb ondan pul götürmək niyyətindəydim. Hər dəfə Bahardan pul alanda Əfqanın işinin tez bir zamanda düz­ələcəyini deyirdim. O­na pulların sürücülük­ vəsiqəsinin kateqori­yasını artırmağa, stajı çoxaltmağa və s. bu kimi şeylərə xərcləndiyini deyirdim. Bu minvalla Bahardan dəfələrlə pul istəyirdim. Sonradan Əfqanın id­man intahanından keçməsi üçün pul lazım olduğunu, əks halda artıq çəkisinə görə imtahandan kəsiləcəyini söylədim, yenə də pul aldım”.
Müxtəlif yollarla Bahar Abbasovadan 2013-cü ildən 2016-ci ilə qədər pul qoparan, yaxın günlərdə qardaşının işlə təmin olubacağını vəd edən Mehparə Kazımovanın gec də olsa iç üzü ortaya çıxıb: “Bahar zəng vurub mənə verdiyi 30 min manat pulu qaytarmağımı tələb etdi. Bilirdim ki, polisə şikayət edəcək. Amma pulu qaytarmaq imkanım yox idi. Yalandan dedim ki, evimi satıb pulunu qaytaracam. Əslində o evi 2013-dən satmışdım, həmin evdə kirayədə qalırdım. Baharın atası da bunu hardansa öyrənmişdi”.
Zərərçəkmiş şəxs qismində dindirilən Bahar Abbasova da ifadəsində Mehparə Kazımova ilə ilk dəfə qardaşının maşınında yol gedərkən tanış olduğunu göstərib: “Anam rəhmətə gedib. Atam və bacı-qardaşımla birlikdə yaşayıram. Tibb bacısı işləyirəm, qardaşım Əfqan taksi sürücüsü kimi fəaliyyət göstərir. Bacım işləmir, xəstə olduğuna görə pensiya alır. 2013-cü ilin yay aylarında qardaşımın maşını ilə Mərdəkana gedəndə yolda Mehparə də maşına əyləşdi. Mehparəni həmin vaxt tanımışam. Özü danışırdı ki, Daxili İşlər Nazirliyində yaxın tanışı var. Mən də Əfqanı işə düzəltməsini xahiş etdim. Problem olmadığını bildirdi, bu işi həll edəcəyinə söz verdi. Atamla danışıb, məsləhətləşib sonra xəbər verəcəyimi dedim. Evə gəlib atamla danışdım, razılaşdım. Xalam qızı Rəsmiyyədən 4 min manat borc pul alıb Mehparəyə verdim”.
Zərərçəkmişin ifadəsinə görə, Mehparə Kazımova ona həmin məbləği Daxili İşlər Nazirliyində işləyən yüksək vəzifəli şəxsə verəcəyini deyib: “Konkret heç nə demədi, kiminsə adını çəkmədi. Pulu alandan bir neçə gün sonra sağlamlıq kağızı, vərəm dispanserindən arayış və s. bu kimi sənədləri toplamağı tapşırdı. Hamısını topladım. Tez-tez əlaqə saxlayırdıq. Mehparə yaxın günlərdə Əfqanın işinin həll olunacağını deyirdi. Hər dəfə də müxtəlif sənədlər üçün bizdən pul alırdı. Amma Əfqanın işi düzəlmirdi. Mehparəyə zəng vurub dedim ki, atam narahatdır, xalamqızı borcunu istəyir. O, isə cavabında Əfqanın yaxın günlərdə əmrinin veriləcəyini bildirdi”.
Bahar Abbasova bildirib ki, Mehparə Kazımovaya verdikləri pulu geri ala bilməyəcəklərini görüncə polisə müraciət etmək məcburiyyətində qalıblar: “Atam özü zəng vuraraq Mehparə ilə danışdı. Bu dəfə atama Əfqanın işinin alınmadığını, tez bir zamanda bizdən aldığı pulları geri qaytaracağını dedi. Mehparəyə verdiyimiz pulların hamısını xalamqızı Rəsmiyyədən borc almışdıq. Ötən ilin yanvar ayında Mehparə ilə telefon əlaqəsi saxlayan zaman evini satlığa çıxardığını, yaxın günlərdə pulumuzu qaytaracağını bildirdi. Amma sonradan onun yaşadığı evin özünəməxsus olmadığını öyrəndik. Ötən il Mehparənin barəsində Pirallahı Rayon Polis Şöbəsində araşdırma aparıldığını eşitdik. Bizdən xahiş etdi ki, polisə şikayət etməyək, tez bir zamanda hamının pulunu qaytaracaq. Amma bu dəfə də vədinə əməl etmədi".
Məhkəmə heyəti işdə olan sınədləri araşdırandan sonra Mehparə Kazımovanın barəsində hökm elan edib. Hökmə görə, onun əvvəllər dələduzluq əməlinə görə, cərimə cəzasına məhkum.olunması işin ağırlaşdlrılması nəticəsinə gəlinib.
Hakimlər Mehparə Kazımovanın barəsində 7 il müddətinə azadlıqdan məhrum edilməsi barədə hökm elan ediblər. Onun barəsində həbs qətimkan tədbiri seçilib və məhkəmə zalından həbs edilib.

Aslan

gundemxeber.az