Borclarını qaytarmaq üçün yollar axtaran “qonaq” qohumunun evindən oğurluq etməyi qərara alıb. Hamının yatdığına əmin olduqdan sonra yataq otağına keçib və dolabları axtarmağa başlayıb. Ev sahibəsinin yuxudan oyanması isə oğurluq planını alt-üst edib.

Bakı Ağır Cinayətlər Məhkəməsində Səbuhi Həmidovun cinayət işi üzrə məhkəmə prosesi başlayıb. Virtualaz.org saytının xəbərinə görə, prosesə hakim Cavid Hüseynov sədrlik edib.

İstintaq materiallarına görə, S.Həmidov bu ilin mart ayında qohumu və yaxın qonşusu olan Habil Sultanovun dəvəti ilə onun evinə gəlib. Gecə saatlarında qohumunun mənzilindən qızıl və pul oğurlamaq istəyən S.Həmidov yataq otağına keçib. Bu zaman H.Sultanovun həyat yoldaşı Sahibə Mirzəyeva səsə yuxudan oyanıb. S.Həmidov əli ilə qadının ağzını tutaraq səs-küy salmağa qoymayıb. Əks təqdirdə, uşaqlarını və onu öldürəcəyini deyib. Ev sahibi Habil Sultanovun oyandığını görən S.Həmidov oğurluq niyyətini həyata keçirə bilməyərək hadisə yerindən qaçıb.

Hadisə ilə bağlı H.Sultanov polisə şikayət edib. S.Həmidov iki gün sonra saxlanılıb.

Təqsirləndirilən şəxs qismində dindirilən S.Həmidov ifadəsində ona elan olunmuş ittihamla özünü təqsirli bilib. İfadəsində Habilin onun atasının dayısı oğlu olduğunu, Hökməli qəsəbəsində qonşuluqda yaşadığını deyib. Oğurluq hadisəsini törətmək istəməsini maddi vəziyyətinin ağır olması ilə izah edib: “Əvvəllər daş karxanasında işləyirdim. Axır vaxtlar işsiz idim. Habilgilə tez-tez gedib gəlirdim. İşləmədiyimə görə atamla da aramızda problemlər yaranmışdı. Hadisə baş verən gün Habillə söhbət elədik. Onlardan çıxıb iş axtarmağa getdim. Habil dedi ki, əgər istəyirsənsə, gecə bizdə qal. İş axtarsam da, tapa bilmədim. Yarım litr araq, yüz qram kolbasa və çörək aldım, yolda yeyib-içdim. Fikirləşdim ki, evə getsəm, atam araq içdiyimə görə mənimlə mübahisə edəcək. Həm də anam namaz qılır, içkili getsəydim, onunla da mübahisəmiz olacaqdı. Ona görə də, Habilgilə getdim”.

S.Həmidovun ifadəsinə görə, ev sahibi ikinci mərtəbədə ona yataq salsa da, gözünə yuxu getməyib. Borclarını qaytarmaq üçün yollar axtaran qonaq qohumunun evindən oğurluq etməyi qərara alıb. Hamının yatdığına əmin olduqdan sonra yataq otağına keçib və dolabları axtarmağa başlayıb. Ev sahibəsinin yuxudan oyanması oğurluq planını alt-üst edib.

Şahid qismində dindirilən Sahibə Mirzəyeva ifadəsində göstərib ki, S.Həmidovu gecə otağa girərkən görüb qışqırmaq istədikdə əli ilə onun ağızını tutaraq sakit olmasını, əks halda, uşaqlarını və özünü öldürəcəyini deyib. Onun əlindən qaçarkən qolu qapıya dəyib, səsə həyat yoldaşı oyanıb.

Şahid qismində dindirilən ev sahibi Habil Sultanov ifadəsində evindən oğurluq emtək istəyən qohumu ilə münasibətlərinin yaxşı olduğunu, Səbuhinin atası ilə münasibətlərinin isə yaxşı olmadığını bildiyindən ona evində qalmağı təklif etdiyini göstərib.

Təqsirləndirilən S.Həmidovun atası Mirhəmid Həmidov şahid qismində ifadə verərkən bildirib ki, son vaxtlar oğlu ilə münasibətləri yaxşı olmayıb: “Gecə saatlarında qohumum Habilgil bizə gəldilər. Dedilər ki, Səbuhi onların evindən oğurluq etmək istəyib. İnanmadım. Səbuhini çağırdıqda, gördüm ki, evdə yoxdur. Həmin gecəni yata bilmədim. Səhər tezdən Səbuhi evə gəldi. Ondan hadisə barədə soruşanda borcu olduğunu, işləmədiyi üçün belə etdiyini dedi”.

Məhkəmə prosesi davam edir./virtualaz.org/