Bu gün Bakı Ağır Cinayətlər Məhkəməsində dələduzluqda təqsirləndirilən Samir Nəbiyevin cinayət işi üzrə məhkəmə prosesi davam etdirilib.

Gündəm xəbər APA-ya istinadən xəbər verir ki, hakim Şəkər Məmmədovanın sədrlik etdiyi iclasda zərərçəkmiş Əlikram Camalov mülki iddia qaldırıb. Məhkəmə iddianı icraata qəbul edib.
Ə.Camalovun vəkili isə jurnalistləri məhkəməyə verəcəyini deyib. Bildirib ki, mətbuatda Ə.Camalovun qardaşının və prokurorluqda işləyən qohumunun adı hallanır, bu isə yolverilməzdir.

Daha sonra Ə.Camalov ifadə verib. Bildirib ki, S.Nəbiyevlə münasibəti yaranıb, ona altı aya qaytarmaq şərti ilə pul verib. Lakin o, vədinə əməl etməyib: "Mən də istəmirəm ki, o tutulsun. Məni yaxınlarımla şantaj edir. Bu şantaj yolu ilə həll olunan məsələ deyil. Mən pulu ona köməklik məqsədi ilə verdim. Ona 11 613 dollar pul verdim. Altı ay müddətində hər ay 1250 dollar qaytarmalı idi. Xahiş edirəm mülki iddiam təmin olunsun. Əgər şantaj etməsəydi belə olmazdı. Məni aldadıb, dələduzluq edib, şikayət etmişəm. Bir neçə dəfə mağazasına getdim, dedi ki, pulu qaytaracam".

S.Nəbiyev isə deyib ki, pulun bir hissəsini qaytarıb, qalanını qaytarmağa imkanı olmayıb.

Proses avqustun 23-də davam edəcək.

Qeyd edək ki, ötən iclasda məhkəmə istintaqının təzələnməsi barədə qərar qəbul edilib.

Prokuror S.Nəbiyevin 9 il müddətinə azadlıqdan məhrum edilməsini istəyib.

İttihama görə, 2015-ci ildə S. Nəbiyev Əlikram Camalova birgə biznes qurmaq təklif edərək, ondan icarəyə götürüb işlətdiyi Nəsimi rayonu, Ceyhun Hacıbəyli küçəsində yerləşən "Brend Elektrik" elektrik avadanlıqları satışı mağazasına investisiya qoymasını istəyib. Əvəzində isə qazancın yarısını Ə. Camalova verəcəyini vəd edib. Ə. Camalov razılaşıb və Nərimanov rayonu, Ağa Nemətulla küçəsində yerləşən ofisdə S.Nəbiyevə 2015-ci il noyabrın 3-də 18 min manat, 2016-cı il fevralın 1-də isə 3 min 993 manat pul verib. S. Nəbiyev isə vəsaiti mənimsəyərək Ə. Camalova pulu qaytarmayıb. Bundan sonra Ə. Camalov polisə müraciət edib. Təqsirləndirilən S.Nəbiyevə Cinayət Məcəlləsinin 178.3.2 maddəsi ilə cinayət işi açılıb və onun barəsində polisin nəzarətinə vermə qətimkan tədbiri seçilib.

Zərərçəkmiş Əlikram Camalov kəndli fermer təsərrüfatının təsisçisi və müdafiə sənayesi naziri Yavər Camalovun qardaşıdır.