Ləğv edilmiş Milli Təhlükəsizlik Nazirliyinin odioz generalı Akif Çovdarov təkcə iş adamlarının başına oyun açmayıb.

2015-ci ildən məhbəs hücrəsində, dörd divar arasında yaşayan, vaxtilə lüks həyatı olan general ev-eşik sahibi olmaq istəyən vətəndaşları da soyub, küçələrdə qoyub.

“Arxin-M LTD” MMC fırıldağı

İndi mənzillərinə köçməli olan payçıların pulu da batıb, binanın tikintisi də yarımçıq saxlanıb, cavabdeh tərəflər ötür-ötür oyunu oynayırlar. Söhbət Çovdarovun qızının adına rəsmiləşdirilən binanın tikintisinin dayandırılmasından gedir.

“Arxin-M LTD” MMC Bakının Binəqədi rayonu, 7-ci mikrorayon, Abay Kunanbayev küçəsində 2014-cü ildə yaşıllıq zolağını məhv edərək yerində yaşayış binası inşa edib.

Elə ki, Çovdarov tutulub, binanın tikintisi dayandırılıb. “Arxin-M LTD” MMC binada yerləşən satış ofisini bağlayıb.

Çovdarovun qızı Aidə Qasımovaya məxsus olan şirkət payçılardan aldığı pulu geri qaytarmayıb. Əvəzində isə bina başqa bir şirkətə həvalə edilib. Ən pisi budur ki, həmin törəmə şirkət mənzil sahiblərinə evləri təzədən satır.

Bu dələduzluq əməlinə etiraz edən payçılar yaxın günlərdə aksiyaya keçirməyə hazırlaşırlar. Onların sözlərinə görə, Çovdarovlar onların milyonlarını mənimsəyib, indi də evi yenidən satırlar.

Həmin binada olarkən tikintinin hələ də getmədiyini gördük. Ətrafda yaşayanlar deyirlər ki, bu ərazi park olmalıydı.

Amma Binəqədi rayon İcra Hakimiyyəti MTN generalına boyun əyərək yaşıllığı ona təslim edib. İndi nə yaşıllıq qalıb, nə payçılar evinə köçə bilib, nə də tikinti yekunlaşıb.

3 milyon hara gedib?

Prezident Administrasiyasının qarşısını toplaşmağa hazırlaşan aldadılmış payçılar dövlətdən məsələyə müdaxilə olunmasını tələb edəcəklər. Bu bina 4941 kvadrat metr sahəyə malik 6 mərtəbəli, zirzəmili və mansardlı binadır.

Generalın həbsindən sonra əmlaklarına həbs qoyularkən adı çəkilən bu tikilinin dəyəri 3 milyon 178 min manat olaraq qiymətləndirilib.

Qısa zaman ərzində ucaldılan binanın tikintisi Çovdarovun həbsi ilə yarıda qalıb. Amma həmin bina sakinlərə təzədən satılır. Onlara deyilir ki, bina artıq başqa şirkətin balansına keçib.

Nəticədə verilən pullar da mənimsənilib. İndi binanın tikintisini yekunlaşdırmaq və təhvil vermək üçün təkrar ödəniş olmalıdır. Sakinlər etirazlara hazırlaşır.

Yaxınlıqdakı binalarda yaşayanlar isə deyirlər ki, ən böyük zərər onlara dəyib: parkın yeri satılıb, yaşıllıq məhv edilib, gün işığının qarşısı kəsilib.

Qeyd edək ki, Çovdarovun Bakının Nəsimi, Səbail, Binəqədi, Xətai, Nərimanov, Nizami, Yasamal, Sabunçu və bölgələrdə- Qəbələ, Kürdəmir, Xızı, Abşeron, Şamaxı rayonlarında olan və üzərinə həbs qoyulan əmlaklarının ümumi dəyəri 32.256.900 manat təşkil edir./azeuronews.com