Mühafizə Xidmətinin əməkdaşları qadınlara belə, zor tətbiq edib

“Riyad” Mühafizə Xidməti əməkdaşlarının vətəndaşın torpaq sahəsindən ona məxsus avtomobili oğurlatdığı haqda məlumat vermişdik. Qeyd etmişdik ki, Mühafizə Xidməti əməkdaşları saxta müqavilə əsasında qoruduqları ərazidən torpağın əsl sahibinin “MERCEDES-600” markalı avtomobilini oğurladıblar.
Bu haqda redaksiyamıza məlumat verən zərərçəkən şəxs bildirmişdi ki, onun avtomobilinin oğurlanmasında “Riyad” Mühafizə Xidmətinin Suraxanı rayon şöbəsinin rəis müavini olan Elgizin (soyadını dəqiqləşdirə bilmədik – red.) rolu var. Hansı ki, vətəndaş polisə müraciət etdikdən bir neçə gün sonra həmin avtomobil Nərimanov rayon Dövlət Yol Polisi şöbəsinin cərimə meydançasında aşkarlanmışdı…
Vətəndaşın avtomobilini oğurlatmaqda ittiham olunan Mühafizə Xidmətinin şöbə rəisinin müavini dünən yenidən həmin əraziyə basqın edib. Bu haqda redaksiyamıza daxil olan məlumata görə, “Riyad”ın bir neçə əməkdaşı Elgizin rəhbərliyi ilə torpaq sahəsinin sahibinə və onun ailə üzvləri olan qadınlara qarşı zor tətbiq ediblər. Məlumata əsasən, qonşudakı sakinlərin torpaq sahiblərinə köməkliyi nəticəsində mühafizə xidmətinin əməkdaşları ərazidən uzaqlaşmağa məcbur olub. Bununla belə, onlar ərazini tərk etdikdə, torpaq sahiblərini ölümlə hədələyiblər.
Qeyd edək ki, “Riyad” Mühafizə Xidməti əməkdaşlarının qanunsuz əməlləri ilə bağlı polisə müraciət olunsa da, vətəndaşların şikayətinə baxılmır. İdarədə açıq-aşkar bildirirlər ki, “Riyad” rəhbərliyinin əli “yuxarılara” çatdığından, onlarla bağlı hansısa tədbir görməkdən ehtiyat edirlər./hurriyyet.org