Bakı Ağır Cinayətlər Məhkəməsində özünü polis əməkdaşı kimi təqdim edərək vətəndaşlara qarşı küllü miqdarda dələduzluq edən şəxsin məhkəməsi başlayıb.

Cinayət məcəlləsinin 178.3.2-ci maddəsi ilə təqsirləndirilən Ədilov Zaur İldırım oğlunun məhkəmə prosesinə hakim Cavid Hüseynov sədrlik edəcək. Qeyd edək ki, cinayət işində 4 nəfər zərəçəkən qismində tanınıb.
2015-ci ilin fevral ayında Bakıda polis adından istifadə edərək külli miqdarda dələduzluq edən şəxslər saxlanılıb. Bakı şəhər Baş Polis idarəsindən verilən məlumata görə, Bakı şəhər Baş Polis İdarəsi Cinayət Axtarış İdarəsi əməkdaşlarının keçirdiyi əməliyyat-axtarış tədbirləri nəticəsində 2015-ci il yanvarın 21-də saat 22:20 radələrində, Ə.Ələkbərov küçəsi 10-da yerləşən daşınmaz əmlak ofisində Bakı şəhər sakini 1976-cı il təvəllüdlü Elşad Muradovun etibarından sui-istifadə edərək 10.000 manat, yanvarın 28-də saat 18 radələrində, Azərbaycan prospektində - Daxili İşlər Nazirliyinin inzibati binasının yaxınlığında 1982-ci ildə Kəlbəcər rayonunda anadan olmuş və hazırda Novxanı qəsəbəsində yaşayan Abşeron rayon sakini Elgün Vilayət oğlu Ələkbərovun etibarından sui istifadə edərək, özünü nazirliyin əməkdaşı kimi təqdim edən Rüfət adlı şəxsə Binəqədi rayonunda “Oba” MTK tərəfindən inşa edilən çoxmərtəbəli binada ev almaq məqsədi ilə 95 min manat pul verib. Lakin sonradan məlum olub ki, ona verilən ev sənədləri saxtadır. 95.000 manat pulunu dələduzluq yolu ilə mənimsəməkdə şübhəli bilinən Bakı şəhər sakinləri - 1978-ci il təvəllüdlü, Nazim Tahir oğlu Məmmədov, 1982-ci il təvəllüdlü, Zaur İldırım oğlu Ədilov və Tovuz rayon sakini 1993-cü il təvəllüdlü İlkin Samir oğlu Bayramov tutulublar.

Şübhəli şəxslər ətrafında keçirilən təxirəsalınmaz istintaq və əməliyyat-axtarış tədbirləri ilə müəyyən olunub ki, əvvəllər oğurluq, dələduzluq, hədə-qorxu ilə pul tələb etmə maddələri ilə məhkum olunmuş N.Məmmədov vətəndaşların etibarını qazanmaq üçün özünü məsul polis əməkdaşı kimi təqdim edərək, qanunsuz olaraq xidməti polis mundirində, mayor xüsusi rütbəsində, Z.Ədilov polis baş leytenantı rütbəsində Bakı şəhərində tikilməkdə olan çoxmərtəbəli yaşayış binalarında yerləşən mənzillərin sənədlərini saxtalaşdıraraq alqı-satqısını həyata keçiriblər.