“Paytaxt sakininin dəm qazından boğulub ölməsi ilə əlaqədar cinayət işi başlanılıb” – AzərTac xəbəri belə yazmışdı. Onu sıradan biri kimi təqdim etmək üçün daha nə fikirləşmək olardı?: Bəli, o, Bakının dörd milyon sakinindən biri idi. Dünyada yaşayan səkkiz milyard, ölüb getmiş yüz milyard bəşər övladından biri idi. Ölkəmizdəki yüzlərlə hüquqşünasdan, minlərlə jurnalistdən biri idi. Ona şəxsiyyət vəsiqəsi vermiş daxili işlər nazirinin gözündə böhtançı idi. Çəkişdiyi müstəqil olmayan məhkəmə hakimlərinin gözündə şeytanın vəkili idi.

Amma o, həm də indiki informasiya bolluğu şəraitində əsl həqiqəti arayan oxucunun gözündə Ədalət İlahəsinin adını daşıyan “Femida” qəzetinin baş redaktoru idi. Haqqı tapdalanmışlar üçün insan və vətəndaş hüquqlarının etibarlı müdafiəçisi idi. Seçicisinin gözündə səsi oğurlanmış gerçək millət vəkili idi.
Jurnalist həmkarlarından hüquq məsləhətlərini əsirgəməzdi, əlindən gələn köməyi göstərərdi. Birdəfəlik deyil, bir ömürlük nəsihətlər verərdi. Gözəl də müsahib idi. Ölkə həyatında geniş rezonans doğuran hadisələrə ən dürüst şərh verməyi bacaran fəal ictimai xadim idi. O, Əyyub Kərim idi…
Orta əsr ispan mütəfəkkiri Baltasar Qrassian deyib ki, qəhrəmana rəğbət bəsləmək məhz qəhrəmana xas xüsusiyyətdir. Bu gizli və gözəl xüsusiyyət təbiətin möcüzələrindən biridir.Ürəklərin və xarakterlərin oxşarlığı mövcuddur. Rəğbət olan yerdə nəyə isə inandırmaq üçün sözə, əldə etmək üçünsə zəhmətə ehtiyac yoxdur. Belə əsrarəngiz meyl öz-özünə yaranmasa, heç bir inadlı səy onun yaranmasına kömək edə bilməz. Əyyub Kərimə də çoxları, elə bu sətirlərin müəllifi də rəğbət bəsləyirdi. Ancaq onun özünün kimə, kimlərə rəğbət bəsləməsi də çoxlarına məlum deyildi. Redaksiya kabinetində İtaliya kinematoqrafçılarının ərsəyə gətirmiş olduqları “Sprut” mafiya serialının qəhrəmanı komissar Kataninin böyük şəklini asmışdı. Baş redaktorun stellaj rəflərində həmçinin suvenir tapançalar, oyuncaq muşketlər diqqəti çəkirdi. Otaqdakı əşyaların müşahidəsi belə nəticə çıxarmağa əsas verirdi ki, Əyyub Kərim prinsipial Korrado Kattani obrazına rəğbət bəsləyir. Eynən komissar kimi ədalətsizliyə qarşı barışmazdır. Həmin filmin mənfi qəhrəmanlarından olan vəkil Terrazini kimilərə nifrət edir. Mafiyaya satılmış müstəntiqlərə, prokurorlara qarşı qeyri-bərabər imkanlarla da olsa, savaşır. Azərbaycandakı SPRUT ilə mübarizə aparır.
Kattani obrazını sevdiyi qədər də komissar rolunu məharətlə oynayan məşhur aktyor Mikele Plaçidonu sevirdi. Bilirdi ki, Plaçido yaratdığı qəhrəmanın gözdən düşməməsi üçün onun öldürülməsini rejissorun qarşısına tələb kimi qoyub. Başqa sözlə, qurban verib, serialın çox uzanmasına razı olmayıb. Təbii ki, vəd olunan pullardan da imtina edib.
Çox güman, Əyyub Kərim sağlığında öz ölümü barədə fikirləşmiş, hüquq müstəvisində çəkişmələrdə kürəklərini yerə vurduğu imkanlı, yüksək mənsəbli şəxslərdən biri və ya bir qrupu tərəfindən öldürülə, eynən komissar Kattani kimi küçənin ortasındaca güllələnə biləcəyini də təsəvvür etmişdi. Hərçənd, insanın ölümü onun ölümə münasibətini ifadə edən formada səhnələşməyə də bilər. Dəm qazından boğulub öləcəyi heç kəsin ağlına gəlməzdi. Tanıyanıar bilir ki, naqolay təsadüflərdən ehtiyatlanan adamdı. Bəlkə də 2 mart 2018-ci il tarixdə evində duş qəbul edərkən, ilk və son səhlənkarlığına yol vermişdi. İlk əvvəl onun da ölümü faktı ilə barışmayanlar, başqa səbəblər axtaranlar oldu. Bu cəhdlərdə bulunanları da başa düşmək olar. Onlar təxminən belə düşünürlər: “Əyyub müəllimi aramızdan aparan gün təqvimin sıradan bir səhifəsi olmamalıydı, hansısa əlaməti ilə seçilməliydi. Ölüm mələyi onunla hamıyla davrandığı kimi davranmamalıydı. Bu, başqa vaxt, başqa cür baş verməliydi…”
Mətbuat Şurasının nekroloqu özünü çox gözlətmədi. Qeyd olundu ki, Əyyub Kərimov Şuranın qurucularından olub, bir vaxtlar Rəyasət Heyətinin üzvü kimi hüquq komissiyasına sədrlik edib. Niyə heyət üzvlüyündən kənarlaşıb; niyə komissiya sədrliyinin daşını atıb; niyə qalıb KİVDF-nin pul bölgüsündə, ev pay-püşkündə iştirak etməyib; olmaya, Bizim Komissar Kattani aparıcı media cameəsində SPRUTla rastlaşıb? – Bütün bunlar əlbəttə ki, cavabı nekroloqun mətnində axtarılası suallar deyillər. Bir o bəllidir ki, Allahın bəxş etdiyi həyat payını Əyyub Kərim şərəflə yaşadı. Üzüağ, alnıaçıq, başıuca ömür sürdü. Rəhməti də elə bu dünyada qazandı. Getdi və özü ilə bir çox sirləri apardı. Məkanı cənnət olsun!

Pünhan Şükür,
“Dərkənar” qəzetiin baş redaktoru