Elsəvər Ağayev nazirin həbs olunması üçün əlindən gələni edir

Səhiyyə Nazirliyində aptek biznesi uğrunda savaşNazir Elsevər Ağayevin əleyhinə olan kompromatları Korrupsiyaya Qarşı Mübarizə İdarəsinə göndərib; qurumda faktiki olaraq ikihakimiyyətlilik yaranıb. Səhiyyə naziri Oqtay Şirəliyevlə müavini Elsevər Ağayev arasında münaqişə dərinləşib. Aptek biznesinə nəzarət uğrunda gedən savaş ikincinin qələbəsi ilə bitib. Nazir müavini nazirə qarşı faktiki itaətsizlik nümayiş etdirir. Müavininə uduzmasını həzm edə bilməyən nazir onunla bağlı kompromatları Baş Prokuror yanında Korrupsiyaya Qarşı Mübarizə İdarəsinə göndərib.
Elsevər Ağayev Səhiyyə Nazirliyindəki mənbə məlumat verib. Mənbə deyir ki, E.Ağayev hakimiyyətdəki kürd mənşəli qruplaşmanın çətiri altında olduğundan nazir onu ram edə bilmir. Məhz bu qruplaşmanın çətiri altında olduğundan E.Ağayev sabiq səhiyyə naziri Əli İnsanov dəmir barmaqlıqlar arasına düşdükdən sonra da nəinki postunu və biznesini qoruya bildi, hətta nazirlikdəki mövqeyini daha da gücləndirdi. Üstəlik də aptek biznesinin sərhədlərini kifayət qədər genişləndirdi. Yeri gəlmişkən, E.Ağayev sabiq nazirin müavinləri arasında sudan quru çıxmağı bacaran yeganə şəxsdir.
Hazırda E.Ağayev dərman biznesinin əhəmiyyətli hissəsini nəzarətə götürə bilib. Yaxın keçmişdə dərman bazarının əsas oyunçuları, o cümlədən də mərhum Aqil Əliyevin yaxınları bazardan sıxışdırılıb. E.Ağayev Cənubi Qafqazda ən böyük dərman deposuna sahib olan “Avromed” dərman şirkətini himayə edir (şirkətin faktiki idarəçiliyi deputat Cavanşir Feyziyevin əlindədir). Bundan başqa, E.Ağayevin birbaşa nəzarətində olan nəhəng aptek şəbəkəsi var. Səhiyyə naziri Oqtay Şirəliyev isə faktiki olaraq dərman biznesindən kənarda qalıb. Bu səbəbdən də O.Şirəliyev antikorrupsiya kampaniyasının ikinci dalğasında müavini ilə olan problemi tam çözmək qərarına gəlib. Onun Korrupsiyaya Qarşı Mübarizə İdarəsinə yolladığı kompromatlar məhz buna xidmət edir.
Qaynaq bildirir ki, kompromatlara Əli İnsanov dönəmində səhiyyə müəssisələrinin özəlləşdirilməsi məsələləri də daxildir. Yəni Ə.İnsanovun yaxın adamı kimi E.Ağayev səhiyyə müəssisələrinin özəlləşdirilməsində bilavasitə iştirak edib və hətta bir neçə obyekti öz yaxınlarının adına keçirə bilib. Ə.İnsanovun məhkəməsində E.Ağayevin yaxınlarının adına özəlləşdirilən obyektlər araşdırılmadı (sabiq nazirə irəli sürülən ittihamlardan biri də səhiyyə müəssisələrinin qanunsuz özəlləşdirilməsi ilə bağlı idi). İndi O.Şirəliyev Korrupsiyaya Qarşı Mübarizə İdarəsindən həmin obyektlərin özəlləşdirilməsi ilə bağlı araşdırma aparmağı tələb edir. Mənbə onu da bildirir ki, nazirin hətta müavinin hərəkətləri ilə bağlı ölkə prezidentinə məruzə edəcəyi də gözlənilir. Çünki E.Agayevin nazirə qarşı itaətsizliyi O.Şirəliyevin idarəçiliyində ciddi problem yaradır. Müşahidəçilər deyir ki, E.Ağayev postunda qalsa, bu, faktiki olaraq nazirlikdə ikihakimiyyətliliyin davamı kimi qəbul olunacaq.
Məlumatlara əsasən nazirin haqqında hətta Prezident Adminstrasiyasına göndərilən şikayət məktubları ilə bağlı da kampaniya təşkil edənlər bəlli adamlardır. Hətta bu yaxınlarda dövlət başçısının müvafiq sərəncamına uyğun olaraq mətbuatda və ictimayyət arasında səhiyyə barədə informasiyalar yayılan zaman mühim olaraq məlumatlar verilirdi ki, bütün informsiyalar yoxlanılacaq.Məlumatlara əsasən bu qərarın icra edilməsi üçün nazirvə onun rəqibləri arasında sözün bütün mənalarında savaş başlayıb.

ORXAN