Fevralın 11-də Abşeron rayon İcra Hakimiyyətində rayon ərazisində fəaliyyət göstərən radikal dini qruplaşmalarla bağlı xüsusi toplantı keçirilib.
Abşeron RİH-nin təşkilatçılığı ilə keçirilən toplantıda rayonda fəaliyyət göstərən idarə və müəssisələrin rəhbərləri, hüquq-mühafizə orqanlarının əməkdaşları, hətta tikinti şirkətlərinin təmsilçiləri də iştirak edib. İcra hakimiyyətindən verilən məlumata görə, başçı Zakir Fərəcov iclasdan öncə Polis İdarəsindən və Milli Təhlükəsizlik Nazirliyinin Abşeron rayon Şöbəsindən rayondakı radikal dini qruplaşmalarla bağlı ilginc məlumatlar alıb. Bəlli olub ki, bəzi şəxslər, müxtəlif müəssisə rəhbərləri dini qruplaşmalara müəyyən köməkliklər göstərirlər. Bu köməklik maliyyə yardımı ilə yekunlaşmır. Bir çox hallarda həmin şəxslər radikal dini qruplaşma üzvlərinin işlə təmin edilməsini həyata keçirirlər. Buna görə də başçı məlumatların müzakirəsi məqsədilə təcili toplantı çağıraraq, idarə müdirləri, müəssisə rəhbərləri ilə söhbətlər aparıb. İclasda əməkdaşları arasına radikal dini qruplaşma üzvlərinin olduğu idarə və müəssisələrin rəhbərləri ilə gələcəkdə həyata keçiriləcək fəaliyyətlə bağlı müzakirələr açılıb.
Məlumata görə, Z.Fərəcəv radikal dini qruplaşma üzvlərinə kömək göstərən şəxslərlə bağlı ciddi ölçü götürüləcəyi barədə xəbərdarlıq edib.

Toplantıda hətta “AAAF İNŞAAT MMC”nin təsisçisi Tofiq Heydərovun iştirak etdiyi və şirkət rəhbərinə şəxsən xəbərdarlıq edildiyi də əldə etdiyimiz məlumatlar sırasındadır. Başçı hər bir tədbir iştirakçısına işçilərinə nəzarət etməyi tapşırıb, dini qruplaşmaların işinə yardımçı olmağın böyük risk olduğunu söyləyib. Onların diqqətinə çatdırıb ki, radikal dini qruplaşma üzvləri ilə hər hansı formada əməkdaşlıq və ya onlara yardımla bağlı xəbərlər təsdiqlənəcəyi təqdirdə heç kəsə güzəşt edilməyəcək.

Elnur