YAP-dan AXCP-dəki partlayışla bağlı ittihamlara da cavab verildi

Hakim Yeni Azərbaycan Partiyası müxalif Xalq Cəbhəsi Partiyasının yerləşdiyi qərargahda baş verən partlayışla bağlı ittihamlara cavab verib. Məlumata görə, YAP icra katibinin müavini, deputat Mübariz Qurbanlı jurnalistlərə deyib ki, partlayışa görə hakimiyyətin günahlandırılması absurddur: “AXCP və müxalifətin radikal qanadı onlarla bağlı baş verən bütün hadisələrdə hakimiyyət, hökumət izi axtarır. Radikallar nədənsə hər zaman belə mövqe tuturlar. Amma bu, çox yanlış yanaşmadır”.
Mübariz Qurbanlı bildirib ki, ölkənin müxtəlif yerlərində qəza, yanğın baş verə bilər və bunlar təbii hadisələr, qəzalardır: “Belə qəzalar baş verəndə Fövqəladə Hallar Nazirliyi bunun səbəbini çox peşəkar formada araşdırır, aydınlaşdırır və şəffaf formada cəmiyyətə çatdırır. Yenə də belə bir qəza baş verib. Bu təsadüfi bir hadisədir. Bunu siyasiləşdirmək, bundan siyasi divident qazanmağa çalışmaq yolverilməzdir. Hesab edirəm ki, onların hadisəyə yanaşmaları, məsələni siyasiləşdirməyə çalışmaları doğru deyil. Bu, çox cəfəng yanaşmadır”.
YAP icra katibinin müavini bəyan edib ki, hakimiyyət AXCP-ni cəzalandırmaq siyasəti yürütmür və partiya üzvlərinin kütləvi formada həbs edilməsi haqda deyilənlər doğru deyil: “Onlar “kütləvi həbs”, “partiya üzvlərinin kütləvi formada polisə aparılması” haqda danışırlar. Gərək kütləvi sözünü oradan çıxarsınlar. Çünki AXCP kütləvi partiya deyil ki, orada da kütləvi həbs aparılsın. Bu partiya imitasiya ilə məşğul olur. Əli Kərimlinin ətrafında çox az sayda adam və müxtəlif vasitələrlə çap olunan “Azadlıq” qəzeti qalıb. Onlar qəzet ətrafında fırlanan bir qrup adamdır. Eyni zamanda müxtəlif saytlara müsahibələr verirlər. Kütləvi həbs nəyə deyirlər? Bir neçə nəfər həbs olunub. Onlar da törətdikləri əmələ görə məsuliyyətə cəlb olunublar. Bakı böyük bir şəhərdir və burada ictimai asayişi pozan, xuliqanlıq və müxtəlif cinayətlər törədən hər kəs məsuliyyətə cəlb olunur, cəzalandırılır. Bunu Xalq Cəbhəsinə qarşı basqı kimi qələmə vermək özünü şişirtmək cəhdindən başqa bir şey deyil. Xalq Cəbhəsi hakimiyyət üçün subyekt, maraq doğuracaq obyekt deyil. Ona görə də biz AXCP-yə qarşı basqı-filan üzərində düşünmürük. Vaxtımızı belə məsələlərə sərf etmirik. Onlar kimdir ki, hakimiyyət onlara basqı edə? Azərbaycanda böyük inkişaf var, hakimiyyət gücü, dəstəyi xalqdan alır. Bununla müqayisədə AXCP və onun ətrafındakılar bizim üçün o qədər də güclü təşkilat, müqavimət göstərəcək dairə hesab olunmur ki, onlara qarşı hansısa basqı olsun. Ona görə də heç bir basqıdan söhbət gedə bilməz. Xırda məsələləri şişirdib özlərini şişman göstərmək istəyirlərsə, bu da alınmayacaq”.
Mübariz Qurbanlı açıqlamasını belə bir replika ilə bitirib: “Bəs deyidrilər AXCP-nin qərargahı yoxdur. Bu qərargah haradandır?”.
“Müxalifət bir hadisə baş verdikdə, onun məsuliyyətini iqtidarın üstünə atmağa çalışır. Hər hansı bir AXCP üzvü yolla gedərsə və külək ağacı onun üstünə aşırsa, deyəcəklər ki, bu iqtidarın təxribatıdır”. Bunu YAP icra katibinin müavini, millət vəkili Siyavuş Novruzov deyib. O, AXCP-nin qərargahında baş vermiş partlayışı hakimiyyətin təxribatı kimi qiymətləndirənləri tənqid edib. YAP rəsmisinin sözlərinə görə, burada hər hansı bir təxribatdan söhbət gedə bilməz və hadisə səhlənkarlıqdan baş verib.
“Səhlənkarlıq nəticəsində digər yerlərdə və dövlət idarələrində də belə hallar olur”, - deyə S.Novruzov bildirib. Qeyd edək ki, AXCP-nin qərargahında partlayış olub. İlkin versiyalara görə, hadisə qaz sızmasından olub. AXCP sədrinin müavini Fuad Qəhrəmanlı isə açıqlamasında hadisəni hakimiyyətin təxribatı kimi dəyərləndirib.
AXCP sədri Əli Kərimli bu gün partiyanın qərargahında baş verən partlayışla bağlı açıqlama verib. Partiya sədri facebook hesabında partlayışın təsadüfi olmadığını qeyd edib: “ AXCP-nin müvəqqəti qərargahında partlayış baş verib. Əslində partlayış qərargahın altındakı zirzəmidə baş verib, amma qərargaha da ziyan dəyib. Partiyamıza qarşı son günlər daha da artan təzyiqlər, gənc cəbhəçilərin kütləvi həbsləri fonunda partlayışın təsadüfi olmadığı bilinirdi. Amma indi hər şey tam olaraq aydınlaşdı. Hakimiyyətimiz müxalifəti ilə artıq terror, partlayış dili ilə danışır. Qərargahın sahibinin ailə üzvləri partiyamızın nümayəndələri ilə söhbətdə açıq etiraf ediblər ki, hakimiyyət onları çoxdan hədələyirmiş.
Fövqəladə hallar naziri Kəmaləddin Heydərovun adından sahibkardan tələb edirmişlər ki, qərargahı AXCP-dən geri alsın . Əks təqdirdə binada partlayış və yanğın ola biləcəyi ilə hədələyirmişlər. Bu məlumat artıq heç bir şübhə yeri qoymur ki, partlayış öz-özünə baş verməyib. Partlayışı AXCP-yə təzyiq etmək, onu yenidən qərargahsız qoymaq məqsədi ilə törədiblər. Mən Azərbaycan hökumətini məsuliyyətli olmağa, dünyada baş verənlərdən nəticə çıxarmağa, AXCP-yə qarşı təzyiqləri dayandırmağa çağırıram. AXCP-nin gücü onun qərargahında, daşda, divarda deyil. AXCP-nin gücü azadlıq, ədalət, xalqın mənafeləri uğrunda, xalqla birlikdə, səmimi və ardıcıl mübarizə aparmasındadır. Bütün maneələrə baxmayaraq, mübarizəmiz davam edir”.
“Amerikanın səsi”nin hadisə yerində olan müxbirinin verdiyi məlumata görə, binanın bir neçə hissəsində çat yaranıb. “Partlayışın gücündən binanın içərisində olan avadanlığa da ziyan dəyib. İtki və ya xəsarət alan yoxdur” - deyə “Amerikanın səsi”nin müxbiri bildirir.
AXCP-nin baş qərargahının yerləşdiyi binanın zirzəmisini icarəyə götürmüş biznesmen “Amerikanın səsi”nə bildirib ki, zirzəmi üzlük daşlar anbarıdır və orada heç zaman qaz balonundan və ya qazdan istifadə edilməyib.
“Dünən axşam saatlarında biz zirzəmini tərk etmişik və orada hər hansı qaz balonu olmayıb” - deyə adının çəkilməsini istəməyən biznesmen bildirib.
AXCP mətbuat xidməti qərargahlarında baş verən partlayışla bağlı açıqlama yayıb. Mətbuat xidmətinin rəhbəri Natiq Ədilov bildirib ki, partlayışın səbəbi hələki bilinmir: "Bu gecə səhərə yaxın AXCP-nin müvəqqəti qərargahının başqa bir vətəndaşa aid olan zirzəmisində partlayış olub. Səbəbini biz hələlik bilmirik. Bizdən soruşurlar ki, baş verən hadisə nədir? AXCP-yə qarşı terror xəbərdarlığı, AXCP-ni qərargahdan çıxarmaq üçün düşünülmüş bəhanə, qərargahın sahibini qorxutmaq cəhdi, yoxsa həqiqətən də AXCP-yə aid olmayan zirzəmidə hansısa təhlükəsizlik qaydalarının pozulması nəticəsində baş vermiş təsadüfi partlayış?"
N.Ədilov bu sualların cavabını özlərinin də bilmədiyini deyib: "Hazırda biz özümüz də bu sualların cavabını bilmirik. Amma əminik ki, tezliklə dövlət orqanlarının baş vermiş hadisəyə münasibətindən aydın olacaq ki, bu partlayış necə baş verib, niyə baş verib, bu partlayışın baş verməsi kimə lazım imiş? Hələlik isə mətbuat və ictimaiyyət nümayəndələrini çağırırıq ki, məsələni diqqətdə saxlasınlar".
Azərbaycan Xalq Cəbhəsi Partiyasının mərkəzi qərargahının zirzəmisində partlayış baş verib. Bu barədə partiyanın mətbuat katibi Natiq Ədilov öz facebook səhifəsində yazıb. O qeyd edib ki, partlayış partiyanın zirzəmisindəki bərbərxanada, gecə saat 04:35 radələrində baş verib. Partlayış nəticəsində qərargahın zalı zədə alıb. “Biz ümidvar olmaq istəyirik ki, partlayış AXCP-yə qarşı növbəti məkrli planın tərkib hissəsi deyil. Medianı baş verən hadisəni diqqətdə saxlamağa, dərin araşdırma aparmağa səsləyirik", - deyə Natiq Ədilov bildirib.
O qeyd edib ki, partiya yetkililərinin hadisəyə uyğun açıqlaması olacaq".