Rəsmi qurumlar heç bir arqument gətirə bilmir

Prezident İlham Əliyevin 2011-ci ilin aprel ayında imzaladığı sərəncam hələ də axıra qədər yerinə yetirilməyib. Söhbət Sabunçu rayonunda tikilən tibb ocağından gedir...
Belə ki, İlham Əliyev 2011-ci il, aprelin 27-də Sabunçu rayonunda görülən işlərlə tanış olarkən sakinlərlə də görüşmüş və onların problemləri ilə tanış olaraq onların ehtiyac və istəklərini də dinləmişdi. Sakinlər söhbət zamanı rayon ərazisində uşaqlar və böyüklər üçün fəaliyyət göstərən 12 və 18 saylı poliklinikaların istifadəyə yararsız olması haqda prezidentə məlumat vermişdilər.
Bundan sonra İlham Əliyevin sərəncamı ilə yeni poliklinikanın tikintisinə başlanılmışdı. Tibb müəssisəsi tikilməyinə tikildi, amma açılmadı...
Prezidentin 2011-ci ilin aprel ayında yeni poliklinikanın tikilməsi haqda sərəncamın verməsindən sonra 18 saylı poliklinika söküldü və bir neçə ay ərzində onun yerində ikimərtəbəli yeni bina tikildi. Binanın hazır olmasından 2 ildən çox vaxt keçməsinə baxmayaraq o, hələ ki, istifadəyə verilmir. Səbəb isə bir neçə cür izah olunur. Bu səbəbləri köhnə poliklinikanın yararsız vəziyyətindən şikayət edən sakinlərdən soruşduq.
Rayon sakinləri “Gündəm xəbər”ə dedilər ki, poliklinika tikildikdən sonra bir neçə səlahiyyətli şəxs gəlib binaya baxış keçirdilər: “Deyəsən, görülən işlərdən razı deyildilər. Tikiliyə baxdılar, narazı şəkildə çıxıb getdilər”.
Başqa bir sakin isə deyir ki, poliklinikanın bir neçə metr yaxınlığında 3 saylı Sabunçu Mərkəzi rayon Xəstəxanası (MRX) var və həmin xəstəxananın ərazisi genişdir: “Bu poliklinikanı da söküb xəstəxananın həyətində tikmək istəyirlər”.
“Poliklinika söküləcək” deyən sakinin bu sözlərindən sonra bir məsələni də qeyd edək ki, 3 saylı Sabunçu MRX-da hazırda yenidənqurma və təmir işləri aparılır. Xəstəxana tam hazır olduqdan sonra prezidentin iştirakı ilə açılış mərasiminin keçiriləcəyi də gözlənilir.
Köhnə poliklinikaların xidmətindən bezən sakinlər deyir ki, Sabunçu rayon İcra Hakimiyyətinə (RİH) bir neçə dəfə müraciət ediblər: “Gah bu bayram, gah da o bayram açılış olacaq deyərək bizi yola salıblar”. Poliklinikanın yüz faiz söküləcəyini iddia edən sakinlər də var.
Sakinlərlə söhbət edib onların fikirlərini dinlədikdən sonra 3 ilə yaxındır tikilən və qapısına “İşləmir” yazılmış lövhə asılan poliklinikanın taleyi haqda rəsmi məlumat öyrəndik.
İlk rəsmi məlumatı Səhiyyə Nazirliyindən aldıq. Nazirliyin mətbuat xidmətinin rəhbəri Anar Qədirli mətbuata açıqlamasında bildirdi ki, poliklinika Sabunçu RİH tərəfindən tikilib: “Bəzi texniki problemlər olduğundan poliklinikanın açılışı bu vaxtadək uzanıb. Amma Novruz bayramı ərəfəsində, ya da ondan sonra açılış olacaq”.
A.Qədirlinin bu açıqlamasından belə aydın olur ki, poliklinikanın açılmaması rayon icra hakimiyyətindən asılı olan məsələdir. Sabunçu rayon İcra Hakimiyyətindən aldığımız cavab isə maraqlı oldu. İcra başçısının müavini Arzu Məmmədova isə mətbuata açıqlamasında bildirdi ki, poliklinikanın istifadəyə verilməsi Sabunçu RİH-in səlahiyyətində deyil: “Doğrudur, prezidentin sərəncamı ilə Sabunçu rayonunda yeni poliklinika inşa olunub. Amma həmin poliklinikanı Sabunçu rayon İcra Hakimiyyəti tikdirməyib”.
A.Məmmədova poliklinikanın tikilməsinin RİH-in səlahiyyətləri daxilində olmadığı üçün onun nə zaman istifadəyə veriləcəyi haqda da dəqiq məlumatının olmadığını söylədi. RİH nümayəndəsi poliklinikanın Novruz bayramı ərəfəsində və ya ondan az sonra açılacağından xəbərsiz olduqlarını da dedi. Önəmli bir məsələni də xatırladaq ki, yeni tikilən binaya çoxdandır lazımi qurğular, müasir tibbi avadanlıqlar da gətirilib.
Qeyd edək ki, böyüklər üçün nəzərdə tutulan 18 saylı poliklinika 1898-ci ildə tikilən binada, 12 saylı uşaq poliklinikası isə 1925-ci ildə tikilən binada fəaliyyət göstərirdi. 18 saylı poliklinika söküldükdən sonra yerində prezidentin sərəncamı ilə yeni bina tikilib. Hələlik böyüklər üçün olan poliklinika fəaliyyətini 12 saylı poliklinika ilə birlikdə köhnə binada davam etdirir.
Araşdırmalarımız zamanı poliklinikanın açılmamasının səbəbi haqda başqa bir maraqlı məlumat da əldə etdik.
Bu məqamı qeyd etməmişdən əvvəl prezident İlham Əliyevin sərəncamını prezidentin rəsmi saytına istinadən təqdim edirik:
“Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
1. Sabunçu qəsəbəsində yeni poliklinikanın tikintisi və onun lazımi avadanlıqla təchizatı üçün Azərbaycan Respublikasının 2011-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Bakı şəhərinin Sabunçu rayonu İcra Hakimiyyətinə 2,0 (iki) milyon manat vəsait ayrılsın.
2. Azərbaycan Respublikasının Maliyyə Nazirliyi bu sərəncamın 1-ci hissəsində nəzərdə tutulmuş vəsaitin maliyyələşdirilməsini müəyyən olunmuş qaydada təmin etsin.
İlham Əliyev Azərbaycan Respublikasının Prezidenti
Bakı şəhəri, 29 aprel, 2011-ci il”.

Sərəncamdan da göründüyü kimi, poliklinikanın tikintisi üçün 2 milyon manat vəsait ayrılıb. Maraqlı məqam isə ondan ibarətdir ki, ölkə başçısı bu sərəncamı imzalayarkən Sabunçu RİH-in başçısı Əlibaba Əliyev idi. Əlibaba Əliyev prezidentin 14 aprel, 2012-ci il tarixli sərəncamla vəzifəsindən uzaqlaşdırılıb. 2012-ci ilin aprel ayında isə prezidentin sərəncamı ilə Adil Vəliyev Sabunçu RİH başçısı vəzifəsinə təyin edilib.
Ola bilsin ki, yeni icra başçısı əvvəlki həmkarının işini davam etdirməyib və ya bu məsələyə məsuliyyətsiz yanaşıb. Əldə etdiyimiz məlumata görə, əvvəlki icra başçısı Əlibaba Əliyevin işdən çıxarılmasının səbəbi vəzifəsini layiqincə yerinə yetirməməsi olub.
Məqsədimiz köhnə və təzə icra başçılarının vəzifəsini necə icra etdiyini araşdırmaq deyil, maraqlı olan prezident tərəfindən ayrılan 2 milyon manat vəsaitin necə xərclənməsi və 3 ilə yaxındır ki, inşa olununan poliklinika binasının taleyinin necə olacağıdır. Çünki burada daha diqqətçəkən və qaranlıq qalan məqam məhz əhalinin rahatlığı və dövlət başçısının bunun üçün ayırdığı dövlət vəsaitinin taleyidir.
E.QASIMOV