“Milyarderlər İttifaqı” rəhbəri seçkilərdəki xətalarına görə
çıxış yolu axtarır, vətənə dönmək və oğlu üçün ölkə rəhbərliyinin
işarəsini gözləyir, Rüstəm İbrahimbəyov da qayıda bilər

Abbas Abbasov son müsahibəsi ilə ölkəyə gəlişini sığortalayıb. Son müsahibəsi ilə yenidən gündəmə gələn, özünün və ailəsinin Bakıdan ölümlə təhdid olunduğunu bəyan edən baş nazirin keçmiş müavini vətənə dönmək istəyir.
Bunun üçün ölkə rəhbərliyinin təminatını gözləyən A.Abbasov seçkilər ərəfəsində baş verənlərə aydınlıq gətirmək fikrindədir. Abbasov oğlunun da girov kimi saxlanmasından narahatdır deyə, hakimiyyətlə münasibətləri yumşaltmaq qərarına gəlib.
Son müsahibədə səsləndirdiyi fikirlər əslində onun hansı qüvvə tərəfindən təhdid olunduğunu tam təsbit etdi. Bununla belə, məsələ həllini tapmayıb. Deputat oğlunun və özünü taleyinə aydınlıq gəlməyib deyə danışıqlar gedir. Onun son müsahibəsi də razılaşdırılmış bir layihədir. Məqsəd ölkə rəhbərliyinin münasibətini dəyişməkdir.
Məlumata görə, ölüm təhdidlərindən sonra A.Abbasovun Azərbaycanda yaşayan oğlu, deputat Aydın Abbasov da ailə üzvlərini Bakıdan çıxarıb. Ancaq “Gündəm-xəbəri”i bilgiləndirən qaynaq deyir ki, bu yanlış məlumatdır.
Belə ki, deputat Bakıdadır və atasının da ölkəyə qayıdışı üçün danışıqlar aparılır. Mənbə bildirir ki, “Milyarderlər İttifaqı” rəhbəri seçkilərdəki xətalarına görə çıxış yolu axtarır, vətən dönmək və oğlu üçün ölkə rəhbərliyinin işarəsini gözləyir.
Ancaq əks qərar da istisna deyil. “Abbas Abbasov seçkilər ərəfəsində hakimiyyətə problem yaratdı. İqtidarı qıcıqlandırmaqla məşğul idi. Putinin Azərbaycan üzrə sözçüsü kimi çıxış edirdi. Ona görə də ölkə rəhbərliyi onu qara siyahıya salmışdı.
Hətta seçkilər ərəfəsində gəlib, prezidentlə də görüşdü. Amma yenə qəzəb soyumadı. İndi isə növbəti cəhdlərə əl atıb. Müsahibə verir, müəyyən məmurlara söz atır. Ona kimlərin hücum etdiyini sətiraltı açıqlayıb”.
Mənbə bildirir ki, Rüstəm İbrahimbəyovun da ölkəyə qayıtması gündəmə gəlib. Onun hakimiyyətə düşmən kəsilməsinə baxmayaraq, müəyyən razılaşma ola bilər. Çünki İbrahimbəyov qırmızı xətti keçməyib və özünü yaxşı aparıb. Odur ki, onun da bağışlanması təəccüblü olmaz. Hakimiyyət 2015-ci il seçkiləri ərəfəsində müəyyən strateji addımlar ata bilər.
Mənbə bildirir ki, hakimiyyət ona xəyanət edənləri əslində bağışlamır. Ancaq Abbasov lazımlı kadrdır. Elə özü də müsahibəsində deyib ki, onun rus məmurlarla əlaqələri yaxşıdır və hökumət bu imkanlarından istifadə etsin. Ondan düşmən düzəltməsin.
Xatırladaq ki, “Milyarderlər İttifaqı”nın yaradılması ilə iqtidarla münasibətləri pisləşən Abbas Abbasov Rusiyada miqrantlarla bağlı baş verən proseslərə münasibət bildirməsilə Azərbaycan hakimiyyətini hiddətləndirmişdi.
Seçkilərdə verdiyi bəyanatlar isə hakimiyyəti daha da qəzəbləndirmişdi. Mətbuatda və efirdə ona qarşı kompaniya gedirdi. Lakin Putinin Bakıya səfəri planları alt-üst etdi. İndi Abbasov da öz səhvlərini düzəltməyə çalışır. Bunun alınacağı isə sual altındadır. Hər halda proseslərin necə cərəyan edəcəyinin şahidi olacağıq.
Rafiq Qara