Deputatın qarabağlıları təhqiri aranı elə qatıb ki, üzrxahlıq da işə
yaramır; ona gözdən itmək əmr edilib və jurnalistlərə cavab vermir

Deputat Etibar Hüseynov ölkədən çıxıb. Ona əmr olunub ki, bir müddət gözə görünməsin. Bu haqda mötəbər qaynaqdan verilən xəbərdə deyilir ki, qarabağlıları təhqir etməsi həm hökumətin, həm özünün başına iş açıb.
Ona görə də bir müddət ölkə kənarında qalması məsləhət görülüb. Bu müzakirələr səngiyən kimi parlamentə qayıdacaq. Amma qeyd etdiyimiz kimi, artıq onun vurulması kampaniyası başlanıb və prezident ona bərk qəzəblidir. Odur ki, mandatından məhrum ediləcək. Hətta deputatın üzrxahlıq etməsi də işə yaramayıb. Ona görə deputat ölkədən gedib və jurnalistlərin suallarına da cavab vermir.
Spiker Oqtay Əsədovun apardığı söhbətdən sonra o, “bacardığı qədər” üzr istədi. Kulislərdə dolaşan söhbətlərə görə, Oqtay Əsədovla Etibar Hüseynovun söhbəti kifayət qədər gərgin atmosferdə keçib və ikinci öz üslubuna xas formada spikerdən tənələr qəbul etməli olub. Lakin istisna etmək olmaz ki, hansısa başqa səbəbdən Etibar Hüseynovun hakimiyyət daxilində də bəzi qruplarla ulduzu barışmır və hər belə səhvindən istifadə edib onu cəzalandırırlar. Bu fikri ona görə iddia ilə yazırıq ki, Etibar Hüseynov ənənəsinə sadiq qalıb bu məsələdə də müxalifəti şərləyə bilərdi. Deyərdi ki, onun dövlətçiliyə, İlham Əliyevə sədaqətini həzm etməyən müxalifət buna görə onu gözdən salmaq istəyir. Amma o, bunu demir və işarə edir ki, onu ictimai basqı altına salanlar öz səngərində olanlardır.
“Dağlıq Qarabağ bölgəsinin Azərbaycanlı İcması” İctimai Birliyinin sədri, Şuşa rayon İcra Hakimiyyətinin başçısı Bayram Səfərov Milli Məclisin deputatı Etibar Hüseynovun ANS telekanalında Qarabağ qaçqın və məcburi köçkünləri haqda söylədiyi fikirlərin etirazla qarşılanması məsələsinə münasibət bildirib.
B.Səfərov deyib:
“Etibar Hüseynov səhvini başa düşüb Milli Məclisdə üzr istədi. Etibar Hüseynov səhv etmişdi, ancaq öz səhvini başa düşdü. Məncə bu məsələni çox şişirtməyə də ehtiyac yoxdur. İndi səhvdir də edib. Bəlkə də fikrini düz çatdıra bilməyib.
Hər kəsin öz danışıq forması var da. Əsas odur ki, səhvini başa düşüb üzr istəyib. Səhvini başa düşənin isə günahından keçmək lazımdır”. Milli Məclisin iclasında deputat Etibar Hüseynov Qarabağ camaatından üzr istəyib. “Gərək elə deməyəydim” deyən E.Hüseynov parlamentdəki bugünkü çıxışı zamanı üzr istəyib.
Ancaq ehtimalla demək olar ki, bu dairənin əsas təmsilçilərindən biri elə spiker Oqtay Əsədovdur. Əsədovun Etibar Hüseynova qarşı mövqeyi bu vaxta qədər tək-tük deputatlara göstərdiyi qədər sərt olub. Son sessiyada o, Etibar Hüseynova “sən nə qədər az danışsan, o qədər yaxşıdır” demişdi. Bundan əvvəl də, spiker Hüseynovu “tormozu olmamaqda” günahlandırmışdı.
Rafiq QARA