Deputat seçkilərdəki mövqeyinə və rektor
həmkarlarının istefa tələbinə görə qəzəbə tuş gəlib; biznesi çökdürülür

Deputat İlyas İsmayılovun biznesi əlindən alınıb. Seçkidən sonra radikallaşan Ədalət Partiyasının sədri hakimiyyətin maraqlarına cavab vermədiyinə görə hədəfə alınıb. Parlamentin spikeri Oqtay Əsədov arasında yaşanan söz çəkişməsi də məhz gərginliyin tərkib hissəsidir.
Bu barədə “Gündəm-xəbər”in əldə etdiyi məlumata deyilir ki, İ.İsmayılov ictimai-siyasi həyatda hörmət qazanmış fiqurdur. Onun iqtidarla münasibətlərinin yaxşılaşması və parlamentə mandat əldə etməsi bir qədər müxalifətçilik imicini gözdən salmışdı.
Son seçkilərdən sonra deputatın çıxışları və seçki debatlarında iştirak etməməsi, müxalifət namizədi Cəmil Həsənlinin əleyhinə danışmaması iqtidarın xoşuna gəlməyib. Növbəti parlament seçkilərindən kənarda qalacaq partiya sədri millət vəkili ola bilməyəcək.
Mənbənin sözlərinə görə, hakimiyyət bağları qopan deputat özünü alçaldılmış və təhqir olunmuş hesab edir: “İlyas İsmayılov seçkilərdə müxalifətin əleyhinə danışmadı. Bununla hakimiyyətin ilk planını pozdu və sifariş yerinə yetirmədi. Əksinə, debatlarda öz nümayəndəsi iştirak edirdi. Hakimiyyət cavab olaraq onu cəzalandırmaq istədi. İlyas müəllimə çox aşağı səs yazıldı. Hətta özü də bu məsələni ictimailəşdirdi. Məhz bu faktor münasibətləri gərginləşdirdi. İqtidarın ən yüksək eşelonu ilə İlyas İsmayılov arasında dartışma gedir. Oqtay Əsədovla mübahisəsi də davamıdır”.
Mənbə iddia edir ki, deputatın biznesi çökdürülüb, ona mandat verilməyəcəyi qərara gəlinib: “Plan belə idi ki, İsmayılov efirdə müxalifətin əleyhinə danışsın. Ancaq deputat imtina edib və öz ləyaqətini qoruyub, bu addımı atmayıb. Nəticə etibarı ilə ona qarşı hücumlar başlanıb.
Son müsahibəsində Oqtay Əsədova deyib ki, özünə, daşıdığı vəzifəyə hörmət qoyan adam bu cür danışarmı? Oqtay Əsədovun heç bir əndazəyə sığmayan bu çıxışı ictimai rəydə də yaxşı qarşılanmadı. Hətta mətbuatda onu “bazarkom”, “müasir Xudayar bəy” adlandıranlar da oldu. Mətbuat nümayəndələrindən fərqli olaraq mən onu başa düşürəm”.
Deputat bildirib: “Çoxillik hüquq təcrübəmdən bilirəm ki, hər bir insan yaşadığı, işlədiyi və onun xarakterini formalaşdıran mühitin məhsuludur. Oqtay Əsədovun bu cavabını da əvvəllər işlədiyi təsərrüfat təşkilatlarında formalaşmış xarakterinin təzahürü kimi qəbul etdim. Mən belələrini layiq olduqları yerlərdə çox görmüşəm”.
Xatırladaq ki, deputat son prezident seçkilərində namizəd olub. Amma teledebatlarda iştirak etməyib. Hətta səsverməyə belə qatılmayıb.
Rafiq Qara