Həkim səhlənkarlığının qurbanı olan Nərmin Hüseynli martın 10-da vəfat edib

Nazirlik xəstəyə aprelin 12-də yardım təklifinə dair məktub yollayıb

Xərçəng xəsətəsi Nərmin Hüseynli dünyasını dəyişəndən bür müddət sonra Səhiyyə Nazirliyinin ona yardım ediləcəyi barədə göndərdiyi məktub mərhumun ailəsinə yetişib. Bundan əvvəl, Nərmin hələ sağ ikən ailəsi xəstəyə kömək üçün müvafiq orqanlaraa müraciət etmişdi.
Gecikmiş məktubdan bəlli olur ki, Prezident Administrasiyası Səhiyyə Nazirliyinə müraciət edərək, xəstəyə köməklik göstərilməsi üçün xahiş edib. Səhiyyə Nazirliyi də həmin müraciətə baxaraq müsbət rəy verib və yardım göstəriləcəyi ilə bağlı məktubu mərhumənin ailəsinin yaşadığı Sumqayıtdakı ünvana göndərib. Nərmin Hüseynli martın 10-da dünyasını dəyişib. Məktub isə Səhiyyə Nazirliyinin Tibbi Yardımın Təşkili Şöbəsinin müdiri Gülmirzə Poladov tərəfindən düz 21 gün sonra – martın 31-də imzalanıb. Prezident Administrasiyasının həmin müraciəti Səhiyyə Nazirliyinə nə zaman ünvanladığı isə məlum deyil.
Bu etinasızlıq nə ilə bağlıdır, axı Nərmin Hüseynli hələ martın 10-da dünyasını dəyişərkən bütün KİV-lərdə və sosial şəbəkələrdə, hətta TV-lərdə belə, bu xəbər yayımlandı. Belə olduğu halda, ölüm hadisəsindən düz 21 gün sonra nazirlik rəsmisinin o məktuba imza atması nədən xəbər verir? Məsələyə münasibət bildirən millət vəkili Zahid Oruc mətbuata bildirib: “Qanunlar bir qayda olaraq vətəndaşların mənafeyi baxımından normal müəyyənləşdirilib. İndiyə qədərki dövrdə də parlamentdə müxtəlif xarakterli təkliflər, baxışlar olub. Xarakterindən asılı olaraq orada həmin məsələyə dövlət idarəetmə sisteminin təsisçilərinin cavab verməsi üçün zaman müəyyənləşib. İlk növbədə müəyyən olunmalıdır ki, məsələ hansı formalı, hansı xarakterlidir”.
Millət vəkili bildirdi ki, bu konkret olaraq bir fərdin və ya məmurun deyil, eyni zamanda kommersiyanın və yaxud məsələ ilə bağlı çıxarılmış başqa xarakterli rəylər, tibbi məsələlərin hamısı ilə nəzərə alınan qərarlardır.
“Ona görə də, burada birmənalı fikir söyləmək çətindir. Demək olmaz ki, məsələ hüququ boşluqdan, konkret olaraq məmur məsuliyyətsizliyindən irəli gəlir. Bunu araşdırıb qərar vermək olar”. Z.Oruc məsələnin başqa bir tərəfini də şərh edib: “Hər hansı bir dövlət qurumu məsələyə rəsmi müraciət olmadan da başqa xarakterli mənbələrin, o cümlədən kütləvi informasiya vasitələrindəki reaksiyalardan da münasibət göstərə bilərdi. Ona görə də, Nərmin Hüseynli hadisəsi üzərində fikir yürütmək mənə çox çətindir. Bilirəm ki, cəmiyyət ona çox həssaslıqla yanaşdı. Fərdi təşəbbüslərlə ona kömək etməyə çalışdılar, hətta parlamentin üzvlərini də bu işə cəlb etdilər. Cəmiyyətin yaxşı bir qatqısı və həmrəyliyi vardı. Əlbəttə, sonuc yaxşı olmadı. Çox təəssüf ki, onu erkən yaşda itirdik. Ona görə də bu məsələdə Səhiyyə Nazirliyinin nə qədər məsuliyyət daşıdığını söyləmək mənə çox çətindir. Bütöv bir qurummu bu məsələdə məsuliyyət daşıyır, yoxsa konkret olaraq ayrı-ayrı funksiyaları yerinə yetirən şöbələrmi, konkret komissiyamı? Bunu aydınlaşdırmaq lazımdır. Buna görə də, ola bilsin ki, Nərmin Hüseynli hadisəsində günahı olan şəxsin özündən danışa bilərik.
Amma müxtəlif dövlət orqanlarına vətəndaş müraciətlərinin cavablarının təmin olunması üçün bütün hüquqi baza var. Hətta buna görə, vətəndaşların daha ciddi və kəskin şəkildə məhkəməyə müraciət etməsi, onların məsuliyyətini müəyyənləşdirəcək daha başa xarakterli addımlar atması imakanları da orada təsdiq olunub. Konkret olaraq qanunlar var. Lakin hər hansı bir şəxs və ya qurumun nümayəndələri onu nə dərəcədə gözləyiblər, bu ayrı bir məsələnin mövzusudur”.

Nemət Orucov