Prezident Administrasiyası önünə gedən 50 qadın təkrar aksiya qərarı verdi

“Azəriqaz” İstehsalat Birliyinin qadın əməkdaşları Prezident Administrasiyasının (PA) qarşısında toplaşaraq aksiya keçirməyə cəhd etdilər. Təxminən 50-yə yaxın qadın ləğv olunmuş iş yerlərinin əvəzinə yeni iş yerləri tələb edirdilər. “Azəriqaz”ın əməkdaşı Rəna Axundova isə mediaya açıqlamasında bildirdi ki, onlar rayon qaz qəza xidmətləri ləğv olunandan sonra işdən çıxarılıblar: “Bizim aramızda tənha qadınlar, şəhid ailələri, həyat yoldaşı əlil olanlar var. Ailəmizi yalnız məvaciblə dolandırırdıq. İndi isə əlavə iş yeri təklif olunmadan bizi işdən çıxarırlar. Kredit borcu olan ailələr necə dolanacaqlar? Tək çarəmiz aksiya keçirməklə durumumuzu anlatmaqdır”. PA-dan onların qəbul edilməsini tələb edən aksiya iştirakçıları Dövlət Neft Şirkətinin qarşısında da aksiya keçirəcəklərini bildirdilər.
Günortaya yaxın aksiya iştirakçıları Prezident Administrasiyasında qəbul edildilər. Aksiya iştirakçısı olan Rəna Axundova dedi ki, ərazidə olan polis əməkdaşları aksiya iştirakçılarından bir neçə nəfərin qəbul ediləcəyini açıqlayıb. Bundan sonra aksiya iştirakçıları arasından nümayəndələr seçildi. “Hər rayondan gələn bir nəfər seçildi. 6 nəfər polis əməkdaşları ilə birgə Prezident Administrasiyasına getdi. Onların kim tərəfindən qəbul olunacağı isə bildirilmədi. Hazırda biz qəbul otağının qarşısında gözləyirik. Polis əməkdaşları dedilər ki, səs-küy salsanız, sizi ərazidən uzaqlaşdıracağıq. Buna görə də hələlik sakitcə gözləyirik. Ümid edirik ki, şikayətimizi dinləyəcək, tələblərimizi nəzərə alacaqlar”.
Az sonra məlum oldu ki, onlar Prezident Administrasiyası önündə aksiya keçirən “Azəriqaz” İstehsalat Birliyinin qadın işçiləri PA qəbul şöbəsinin əməkdaşları tərəfindən diqqətlə dinlənilib.
Onlara prezident İlham Əliyevin adına məktub yazmağı məsləhət gördülər: “Etiraz edən qadınlar prezident İlham Əliyevə ünvanlanan şikayət ərizəsi yazdılar. Bundan sonra PA-nın əməkdaşları “Azəriqaz”ın rəhbəri Əkbər Hacıyevlə əlaqə saxladı. Əkbər Hacıyev isə aksiyaçıları qəbul edərək şikayətlərinə baxacağını vəd etdi”. Daha sonra etirazçılar Əkbər Hacıyevin qəbuluna gedirlər. Onlar Əkbər Hacıyevlə qəbuldan sonra Dövlət Neft Şirkətinə də gedib şikayətlərini bildirəcəkdilər.
Lakin sonradan qurumun rəhbəri Əkbər Hacıyev etirazçılarla görüşmək istəmədiyi bəlli oldu. O, binanı arxa qapıdan tərk edib: “ Bundan sonra mühafizəçilər qadınların qarşısını kəsməyə çalışdılar. Bu isə qadınları əsəbiləşdirdi. Onlar mühafizə əməkdaşlarını döyüb mühafizə zolağını qırdılar. Hazırda binaya girən qadınlarla mühafizəçilər arasında dava başlayıb”.
Bundan sonra isə aksiyaçı qadınlarla “Azəriqaz” əməkdaşları arasında münaqişə baş verib. Aldadıldığını görən qadınlar bina mühafizəçilərini döyüblər.
Günün sonunda isə bəlli oldu ki, etirazçı qadınların şikayətləri təmin edilməyəcək. “Azəriqaz” İstehsalat Birliyində struktur islahatlar aparılır. Qadınların çalışdıqları ştatlar ləğv olunduğundan onlar ixtisar olunublar”. Bunu günün sonunda jurnalistlərə “Azəriqaz” İstehsalat Birliyinin mətbuat katibi Araz Ağayev dedi. Onun sözlərinə görə, etiraz aksiyası keçirən qadınlarla birliyin baş direktor müavini Ruslan Əliyev görüşüb: “Görüşdə bizim hüquq departamentinin rəhbərliyi də iştirak edib. Onlar qadınlara aparılan islahatlarla bağlı məlumatlar veriblər”. Mətbuat katibi qadınlara iki ay əvvəl işdən çıxarılacaqları ilə bağlı bildiriş verildiyini qeyd etdi: “Qəza xidməti ləğv olunub. Buna görə də ixtisarlar aparılır. Əgər yeni yaradılan qurumlarda iş olarsa, ixtisara salınanlar işlə təmin oluna bilərlər”.
Qeyd edək ki, aksiya iştirakçıları bu gün Ailə, Qadın və Uşaq Problemləri üzrə Dövlət Komitəsinin qarşısında toplaşacaqlar.
E.Cavadlı