AZAL şefinin Rusiyaya səfir göndəriləcəyi xəbəri var

AZAL prezidenti Cahangir Əsgərov haqda şok məlumat əldə etmişik. Mötəbər qaynaqlardan “Gündəm-xəbər”ə verilən xəbərə görə, AZAL şefi vəzifəsi ilə vidalaşmaq üzrədir. Onun yaş faktoruna görə postunu tərk edəcəyi gözlənilir.
Məlumatlı mənbə qeyd edir ki, Cahangir Əsgərov təcrübəli və peşəkar mütəxəssisdir, işini bilir və uzun illərdir bu sahədə yetkinləşib. Ancaq iqtidarın gəncləşdirmə siyasətinin davamı olaraq ölkə başçısının AZAL prezidenti barəsində sərəncam verəcəyi gözlənilir.
Mənbə iddia edir ki, Cahangir Əsgərov MTN-nin keçmiş rəisi Namiq Abbasov kimi səfir göndəriləcək. Bu təyinatın nə zaman olacağı bilinməsə də, yaxın gələcəkdə belə bir qərar nəzərdə tutulub. Hətta AZAL şefi özü də məsələdən xəbərdardır və vəzifədən alınacağına hazırlaşır.
Mənbə iddia edir ki, C.Əsgərov buna etiraz etməyib, prezidentin əsgəri olduğunu öz ətrafındakı adamların diqqətinə çatdırıb və hara təyinat olacaqsa getməyə hazır olduğunu bildirib.
Mənbənin sözlərinə görə, ən maraq doğuran məsələ də onun C. Əsgərovun hansı ölkəyə səfir göndəriləcəyidir. Belə ki, daha çox hakimiyyətin rus dilli zümrəsinin nümayəndəsi kimi tanınan, rus dilində daha çox danışan C. Əsgərov həm də Rusiya hakimiyyətinin siyasi elitasında müəyyən əlaqələrə malikdir. Bu əlaqələrin olması da ölkə başçısı üçün mühüm amildir. Çünki Rusiya ilə münasibətlərdə əlaqələrin sıxlaşması, möhkəmlənməsi prioritet məsələdir. Odur ki, ən layiqli kadr kimi C. Əsgərovun Rusiyada səfir təyin olunması gözlənilən hadisədir. Belə olan halda isə indiki səfir Polad Bülbüloğlunun vəzifəsindən çıxarılacağı və başqa bir post-sovet ölkəsinə səfir göndəriləcəyi istisna olunmur.
Mənbə qeyd edir ki, Cahangir Əsgərovun yerinə AZAL rəhbərliyinə kimin gələcəyi məlumdur: “Ancaq hələlik tam dəqiqləşmədiyi üçün adını açıqlamırıq. Bizə məlum olan həmin şəxs avia şirkətlərdən birinin rəhbəridir, kifayət qədər təcrübəsi, səriştəsi var”.
Mənbə bildirdi ki, hakimiyyət artıq kadr islahatlarında bir inqilab etmək fikrindədir: “Bunu da geridə qalan zaman kəsiyində müşahidə etdik. Ölkə başçısı bir neçə naziri istefaya göndərdi, onların yerinə gəncləri təyin etdi, ASAN xidmət fəaliyyətə başladı. Sadəcə, nurçu qalmaqalı bir neçə gənc məmura zərbə vurdu.
Hakimiyyət qarşısında şərt qoyub ki, gənclərə üstünlük verilməlidir. Çünki xaricdə təhsil alan, bilikli kadrları özündən uzaqlaşdırmaqla, bürokratik əngəllər yaratmaqla, qoca korrupsioner məmurları illərlə vəzifədə saxlamaqla gəncliyi özünə düşmən seçirsən. Onlar istər-istəməz ölkədə müxalif cəbhədə yer alırlar.
Bu da qaragüruhçu deyil, təhsilli gəncliyin müxalifətdə təmsil olunması ilə nəticələnir. Ağıllı, savadlı müxalifət isə hakimiyyətə çox ciddi problem yarada bilir. Bunu başqa ölkələrin nümunəsində görmək olar. Bu mənada Cahangir Əsgərovun da yerinə gənc bir mütəxəssis təyin olunacaq”.
Toğrul ƏLİYEV