ABŞ xüsusi təyinatlıları Liviya ərazisində vaxtilə Pakistanda “Əl-Qaidə” lideri Üsəma bin Ladenin öldürülməsi əməliyyatı ilə müqayisə oluna biləcək məxfi əməliyyat keçirib.
Birləşmiş Ştatlar ordusunun xüsusi təyinatlıları Liviyaya girərək 2012-ci ilin sentyabrında Benqazi şəhərindəki ABŞ konsulluğuna hücum edərək səfir Con Stivensi və daha üç diplomatı öldürən “Əl-Qaidə”çini yaxalayıb.
Liviya ərazisində məxfi əməliyyatın keçirildiyi barədə xəbəri əvvəlcə Amerika rəsmiləri, o cümlədən Pentaqonun mətbuat katibi, kontr-admiral Con Kirbi açıqlayıb. Daha sonra prezident Barak Obama bu barədə yazılı bəyanatla çıxış edib. Bəyanatda deyilir ki, iyunun 15-də Benqazi şəhəri yaxınlığında Ahmed Əbu Xatalla yaxalanıb. O, Benqazidəki Amerika konsulluğuna hücumu həyata keçirən əsas şəxsdir. Əməliyyatda ABŞ xüsusi təyinatlıları ilə yanaşı hüquq-mühafizə orqanlarının əməkdaşları da iştirak edib. Söhbət Federal Təhqiqatlar Bürosunun əməliyyat qrupundan gedir. Əməliyyatda iştirak edən personal sağ-salamat geri dönüb, dinc əhali arasında xəsarət alan olmayıb.
Amerika mediası yazır ki, əməliyyat bir neçə aydır hazırlanırdı. Əbu Xatalla hazırda ABŞ hərbi gəmilərindən birində saxlanılır, gözlənilir ki, o, tezliklə ABŞ məhkəməsi qarşısında dayanacaq. Əməliyyatın detalları haqda hələlik məlumat yoxdur. Benqazidəki ABŞ konsulluğu həm də Mərkəzi Kəşfiyyat İdarəsinin bazası kimi fəaliyyət göstərib. Konsulluğa hücumla bağlı ABŞ administrasiyası respublikaçılar tərəfindən kəskin tənqid olunurdu. Prezident Barak Obama bu hücuma görə məsuliyyət daşıyan şəxsin yaxalanması üçün əməliyyata bu günlərdə sanksiya verdiyini bildirib. “İndi o Amerika ədliyyə sisteminin bütün ağırlığını üzərində hiss edəcək” deyə Obama bildirib.